1Ñuca jalluhuan ama juchata rurangapami,
punllandi ali yarishpa purijuni.
Ñuca shimihuambash, ama pandaringapami jarcarijuni.
Diosta na cazuj gentecuna ricunajujpimi, chashna rurajuni.
2Shinamandami, alita rimana cajpipash, upalla saquirircani.
Shina cajpipash, ñuca nanaica ashtahuanmi mirashpa catirca.
3Ñuca shungupipash napacha jarcari usharcanichu.
Ñuca yuyaipash, nina japirinshna tucurcani.
Chaimandami cashna rimai callarircani:
4“Mandaj Dioslla,
ñuca ima punlla huañunata villahuailla.
Maicamanlla causanata yachangapami munapani.
Ñuca causai tucurinalla cajta yachangapami munapani.
5Ñuca causana punllacunatapash, ashatallami cuhuashcangui.
Ñuca causana huatacunaca,
Cambaj ñaupajpica imapash na canllu.
Tucui gentecunapaj causaica tucurinallami. Selah
6Runapaj causaica, llandushna chingangallami.
Imata ninanda rurajushcapash, yangapachami.
Ashtahuan imata charishpa mirachinajushpapash,
chaicunata maijan japinatapash na yachanllu.
7Jatun Dioslla,
¿cunanga imatashi shuyasha?
Ñucaca, Candallami shuyajuni.
8Tucui ñuca juchacunamanda quishpichihuayari.
Juizu illaj runacuna asishpa ricuchunga, ama saquihuaichu.
9Upaman saquirishpami, na rimarcani.
Canmi chashna cachun rurahuarcangui.
10Ñucamanda ninan ungüita anchuchipayari.
Cambaj maquihuan llaquichijpimi, tucurishpa catijuni.
11Juchata rurashcamanda llaquichishpami, runataca yachachijungui.
Pai ashtahuan alicachishpa charishcatami, polilla jurushna tucuchingui.
Tucui gentecunaca, yanga tucurinallami. Selah
12Mandaj Dioslla,
ñuca mañajujtaca uyahuayari.
Ñuca caparishpa mañajujtapash uyahuayari.
Ñuca huacajujtapash ricuhuayari.
Cambaj ñaupajpica, shuj llactamanda runashnami cani.
Ñuca ñaupa taitacunashnallata, shuj llactamanda yalijuj runashnallami cani.
13Ushaita cutin japingapa, samachihuayari.
Nara huañushpa rijpillata, samachihuayari” nishpami mañajurcani.
Who We AreWhat We EelieveWhat We Do
2025 by iamachristian.org,Inc All rights reserved.
