1Jahua pachapica, pipash na ricushca, jatun manllarinatami ricurcani. Jipaman canchis llaquichinacuna shamunatami, canchis angelcunaca, shuj shuj charinajurca. Chaicunahuanmi, Taita Dios ninanda fiñarishpa llaquichishcapash tucurina carca.
2Shinallata, ninahuan chapushca espejoshna, punchapamba mama cuchatapashmi ricurcani. Chai jahuapica, manllanayai animaltapash, paiman rijchajta rurashcatapash, paipaj shutipaj yupaitapash mishajcunami, Diospaj arpacunata chaririyaj shayanajurca.
3Taita Diospajta ruraj Moisespaj candanatapash, Llamagupaj candanatapash, cashna nishpami candanajurca:
“Tucui Ushaita Charij, Mandaj Taita Dioslla,
tucuita Can rurashcacunaca, juyailla ricunayaicunami.
Alitalla ruraj, na llullajmi capangui.
Diospajlla causajcunata, Jatun Mandajmi capangui.
4Jatun Dioslla,
¿pita Candaca na manllangayari?
¿Pita Cambaj shutitaca na jatunyachingayari?
Canllami jucha illaj cangui.
Chaimandami tucui llactacunamanda shamushpa, Candaca ninanda alicachinga.
Can llaquichina punllapash, ñamari chayamushca” nishpami candanajurca.
5Chai jipami jahua pachapica, Diospajlla huasitaca ñapash pascarijta ricurcani. Chaipica, Dioshuan ari nishpa quilcashca tiyajujtami ricurcani.
6Diospaj huasi ucumandaca, canchis llaquichinacunata apashpami, canchis angelcunaca llujshinajurca. Paicunaca, punchapamba yurajlla lino churajunata churajushca, pechopipash curi chumbicunata chumbilishcami carca.
7Chai canchis angelcunamanmi, causaita charij chuscupuramanda shuj animalca, canchis curi copacunata curca. Chai copacunapica, causaita causajuj Taita Dios ninanda fiñarishpa llaquichinacunata jundachishcami carca.
8Taita Dios cachamushca ninan ushaimi, Diospaj huasi ucupica cushni jundajshna jundarca. Chai canchis angelcuna, canchis llaquichinacunahuan tucuchingacamanmi, Diospaj huasi ucuman yaicuitaca, pipash na usharca.
Who We AreWhat We EelieveWhat We Do
2025 by iamachristian.org,Inc All rights reserved.
