APOCALIPSIS 19 - Quichua Imbabura 2016

Jahua pachapica ninandapachami alicachinajushca

1Chai jipami jahua pachapica, ashtaca ashtacacuna cashna nishpa, ninanda caparinajujta uyarcani:

“¡Aleluya! Quishpichinapash, alicachi tucunapash, punchapambagu canapash,

ninan ushaipash, ñucanchita Mandaj Taita Diospajmi capan.

2Paica, alitalla ruraj cashpami, tapuchishpa llaquichijun.

Culquimanda huainayaj huarmitaca,

cai pachapi causajcunata huainayachishpa huaglichishcamandami, tapuchishpa llaquichijungui.

Shinallata, Diospajta rurajcunatapash, chai huarmimi huañuchishpa yahuarta jicharca.

Chaimandami, paitapash chashnallata llaquichishcangui” ninajurcami.

3Shinallata cutinmi cashna ninajurca:

“¡Aleluya! Chai huarmita rupachijuj cushnica,

causaita causaicaman cushnijungallami” ninajurcami.

4Shinallata, ishcai chunga chuscu rucucunapash, causaita charij chuscupurapash, mandashpa tiyarinapi tiyajuj Taita Diospaj ñaupajpi alpaman urai cumurishpami: “¡Aleluya! ¡Chashna cachun!” ninajurca.

5Chai jipami, mandashpa tiyarinamandaca, cashna nijuj uyarirca:

“Ñucanchi Taita Diospajta tucuita rurajcunapash,

Paita manllashpa causajcunapash, uchillacuna cashpa, jatunguna cashpapash,

tucuicunami ninanda alicachina canguichi” nircami.

6Chai jipallami, ashtaca ashtaca gentecuna rimanajujtashna, yacucuna ninanda huacajujtashna, ninanda culun nijujtashna, cashna ninajujta uyarcani:

“¡Aleluya! ¡Tucui Ushaita Charij, ñucanchi Taita Diosmi tucuita mandajun! ninajurcami.

7Shinallata, ninanda cushijushpami, Paitaca ninandapacha alicachina canchi.

Llamaguhuan cazarana bodami, ña chayamushca.

Paipaj huarmipash, ña alichirishcallami shuyajun.

8Paipaj huarmimanllami,

juyailla linota rurashca, yuraj, punchapamba churajunataca carashca” ninajurcami.

Chai juyailla linotaca, Diospajlla causajcuna, alitalla rurashpa causashcatami chashna nijun.

Llamaguhuan cazarai bodamandami villajun

9Shinallata, chai angelca cashnami nihuarca: “Caita quilcangui: ‘Llamaguhuan cazarai bodaman cayai tucushcacunaca, ninandami cushijunga’ nijujtaca quilcangui” nishpallami, cashnatapash nihuarca: “Cai shimicunataca, Taita Diosllatami na llullashpa villarca” nihuarcami.

10Shina nijpica, angelta ninanda alicachingapami, paipaj ñaupajpi cungurircani. Ashtahuangarin paica, cashnami nihuarca: “Ricui, na chashna ruranachu cangui. Ñucapash canshnallata, cambaj huauquicunashnallata, Diospajta rurajmi cani. Paicunaca, Jesús villajushca shimicunata aliguta catijcunami. Taita Diostallami ninanda alicachina cangui.

Jesusmanda villajushpaca, Diospaj Espíritu yarichijpimi chashna villajun” nihuarcami.

Yuraj caballopi tiyarishpa shamujujta ricushcamanda

11Chai jipami, jahua pacha pascarijta ricurcani. Chaipimi, shuj yuraj caballota ñapash ricurcani. Chai caballopi tiyajuj runaca, imatapash pactachij, Na Llullaj shutitami charirca. Paica, alitalla ruraj cashpami, ninan ushaihuan macanajurca.

12Paipaj ñavipash, nina rupajujshnami carca. Paipaj umapipash, tauca coronacunata churajushcami carca. Pipash na yachashca, Pailla yachashca shutita quilcashcami carca.

13Paipaj churajushcapash, yahuarhuan tinirishcami carca. Paipaj shutipash: “TAITA DIOS RIMASHCA SHIMIMI” nishcami carca.

14Paitaca, jahua pachapi causanajuj macanajuj runacunami, yuraj caballocunapi tiyarishpa catinajurca. Paicunaca, ali juyailla linota rurashca, na mapayashca yuraj churajunata churajushcami carca.

15Paipaj shimimandaca, shuj filo filo espadami, cai pachapi causajcunata chugrichingapa llujshijurca. Paica, jirru varahuanmi mandajunga. Shinallata, Paica, uvacunata cutana ucupi, uvacunata sarujshnami, Tucui Ushaita Charij Taita Dios ninanda fiñarishcataca ricuchijunga.

16Paipaj churajushcapipash, changapipash: “JATUN MANDAJCUNATA JATUN MANDAJMI, MANDAJ TAITACUNATA MANDAJMI” nishpa quilcashca shutimi tiyajurca.

17Chai jipami, shuj ángel indipi shayajujta ricurcani. Chai angelca, jahuata rij alasyu animalcunatami, cashna nishpa ninanda caparijurca: “Shamuichi, Taita Dios cayashca jatun micuiman tandanajumuichi.

18Jatun mandajcunapaj, macanajuj runacunata mandajcunapaj, ninan ushaita charijcunapaj, caballocunapaj, chai caballocunapi tiyarishcacunapaj, na gañangunapaj, gañangunapaj, uchillacunapaj, jatungunapaj, aichacunata micungapa shamuichi” nijurcami.

19Shinallata, manllanayai animaltapash, cai pachapi jatun mandajcunatapash, paicunapaj macanajuj runacunatapashmi ricurcani. Paicunaca, yuraj caballopi tiyarishpa shamujunhuan, paipaj macanajuj runacunahuambash macanajungapami tandanajushca carca.

20Ashtahuangarin, manllanayai animaltapash, llulla profetatapashmi prezu japirca. Chai llulla profetaca, manllanai animalpaj ñaupajpica, na pipash rurai ushanallacunata rurashpa ricuchishpami, manllanai animalpaj shutita churashcacunata, paiman rijchajta rurashcata alicachijcunataca umachijurca. Chai ishcanditami, azufrehuan rupajuj nina cuchaman, causajtallata shitarca.

21Chai macanajuj runacunataca, yuraj caballopi tiyarishpa shamujujmi, Paipaj shimimanda llujshijuj espadahuan huañuchirca. Chai huañuchi tucushcacunapaj aichacunataca, alasyu animalcunami na munangacaman micunajurca.