2 CRÓNICAS 23 - Quichua Imbabura 2016

1Ña canchis huata tucujpimi, Joiada shuti runaca shinlli tucushpa, ali macanajuj patsaj runacunata mandajcunata tandachirca. Paicunaca: Jeroham runapaj churi Azariaspash, Johanán runapaj churi Ismaelpash, Obed runapaj churi Azariaspash, Adaía runapaj churi Maasiaspash, Zicri shuti runapaj churi Elisafatpashmi carca.

2Paicunaca, tucui Judá llactata rishpami, Judá llactapi tiyaj tucui pueblocunamanda levitacunata, Israel huasi ucupuracunata mandajcunata tandachishpa Jerusalenman shamunajurca.

3Tucuilla tandanajushca gentecunami, Taita Diospaj huasipi, jatun mandajhuan pactachingapa ari ninajurca.

Joiada shuti runaca cashnami nijurca: “Ricuichi, jatun mandajpaj churica caipimi. Paimi, Davidpaj miraimandaca Mandaj Dios villashcashna mandanga.

4Cunanga, caita ruraichi: Cangunapuramanda quimsapi shicanyachishca, sacerdotecunahuan, levitacunahuanmi samana punllapi ricungapa yaicuj Diospaj huasi pungupi ricunajunga.

5Quimsapi shicanyachishcamanda caishujcunaca, mandana huasipimi ricunajunga. Chaishujcunaca, Callari Rumi shuti pungupimi ricunajunga. Shinallata, tucuilla gentecunaca, Mandaj Diospaj huasi patiocunapimi canga.

6Mandaj Diospaj huasipica pipash na yaicungachu. Diospajta rurangapa shicanyachishca sacerdotecuna, levitacunallami yaicunga. Tucui gentecunaca, Mandaj Diospaj huasi pungupimi ricushpa shayanajunga.

7Levitacunaca, macanajunacunata maquipi chaririyajmi jatun mandajta ricushpa muyundi shayanajunga. Diospaj huasi ucuman maijambash yaicushpaca huañungami. Cangunaca, jatun mandaj maiman rijpipash, tigramujpipash na saquishpami, paihuan rina canguichi” nijurcami.

8Levitacunapash, Judá llactapi causajcunapash, sacerdote Joiada mandashcashnami tucuita ruranajurca. Chaipi mandajcunaca, samana punllapi Diospajta rurangapa yaicujcunata, Diospajta rurashpa llujshijcunatapashmi, na richun saquishpa, imata rurana cajpipash rurachun mandanajurca. Sacerdote Joiadami chashna mandashca carca.

9Shinallata, sacerdote Joiadaca, jatun mandaj David, Diosta yarina huasipi charishca tucsishpa huañuchina jirrucunata, jarcarina jatun jirrucunata, jarcarina shuj jirrucunatapashmi, patsaj runacunata mandajcunaman curca.

10Chai jipaca, tucui gentecunatami callarishpa shayachirca. Paicunaca, espadata chaririyajmi, Diospaj huasipi, uramanda janajcaman, altar muyundipi, jatun mandajta chaupipi churashpa shayanajurca.

11Chai jipami, jatun mandaj Ocozías runapaj churita llujchimushpa coronata churachirca. Shinallata, Joiada runaca paipaj churicunandimi mandashca shimicunatapash cushpa, aceiteta talishpa javishpa, jatun mandaj cachun churanajurca. Shina churashpami: “¡Jatun mandajlla, causajupailla!” nishpa caparinajurca.

12Shina caparishpa calpanajujta, jatun mandajtapash alicachinajujta ricushpami Atalía huarmica, Mandaj Diospaj huasipi tandanajushca gentecunapajman shamurca.

13Chaiman yaicushpami jatun mandajtaca, imashna shayarina cashcashnallata, pilarpi quimiriaj shayajujta ricurca. Cati mandajcunapash, trompetacunata huacachijcunapash, jatun mandajhuan pacta shayanajujtami ricurca. Chai llactapi causaj tucui gentecunapash, bocinacunahuan, shuj taquinacunahuan ninanda cushijunajujta ricushpami Atalía huarmica, pai churajushcata liquishpa:

“¡Umachihuashcamari, umachihuashcamari!” nishpa caparirca.

14Ashtahuangarin, sacerdote Joiada runami, ali macanajuj patsaj runacunata mandajcunataca cashna nirca:

“Chai huarmitaca, Diospaj huasi ñaupajmanda canllaman llujchishpa apaichi. Pipash, paita catijpica espadahuan huañuchinguichilla” nirca.

Sacerdotellatami, Mandaj Diospaj huasipica, na huañuchinachu canguichi nishpa mandashca carca.

15Chai runacunaca, Atalía shuti huarmitaca. Mandana huasipi, caballocunata llujchina punguta yalishpa pushashpami huañuchirca.

16Chai jipaca sacerdote Joiada runami, jatun mandajtapash, gentecunatapash, Mandaj Dioshuan imatalla rurashpa pactachinajuchun, Mandaj Diospajlla causanajuchun ari nichirca.

17Chai llactapi causaj tucui gentecunami, Baal shuti diospaj huasiman yaicushpa, tucuillata urmachinajurca. Shinallata, chai ucupi tiyaj altarcunata, imamambash rijchaj dioscunatapashmi tucuillata faquirca. Baal shuti diospajta ruraj sacerdote Matán shuti runatapash, chai altar ñaupajpillatami huañuchirca.

18Chai jipami sacerdote Joiada runaca, Mandaj Diospaj huasipi imatalla ruranapi churarca. Paicunataca, sacerdotecuna, levitacunami mandanajurca. Davidca, Mandaj Diospaj huasipica, sacerdotecunata, levitacunata, Mandaj Diosman animalcunata cushpa tucuillata rupachinajuchun, cushijushpa candanajuchunmi, Moisés mandashpa quilcashcapi nijushcashna churashca carca.

19Mandaj Diospaj huasiman yaicuna pungucunapipash, na alicunata rurashpa mapayashca gentecuna maijan ñandapash ama yaicuchunmi, ricujcunata churarca.

20Chai jipaca, ali macanajuj patsaj runacunata mandajcunatapash, chaishuj mandaj runacunatapash, mandana huasipi ricuj runacunatapash, chai llactapi tucui causajcunatapashmi pusharca. Paicunami jatun mandajtaca, Mandaj Diospaj huasimanda, mandashpa tiyana jatun pungu chaupicaman pusharca. Chaipimi, jatun mandajcuna tiyarinapi tiyarirca.

21Chaimandami, chai llactapi tucui causajcunaca ninanda cushijunajurca. Atalía huarmita espadahuan huañuchishca jipami, ali causanajurca.