2 CORINTIOS 12 - Quichua Imbabura 2016

Pablotaca, jirruhuan tujsijshnami llaquichishca

1Jariyashpalla imatapash nijushpaca, ima alitapash na japinichu. Ashtahuangarin, Apunchi Jesús muscuipishna ricuchijpi ricushcatami villangapa munani.

2Cristota crishpa causaj shuj runatami rijsini. Chai runaca, quimsa jahua pachamanmi apai tucurca. (Cuerpondichu, espiritupichu apai tucurca, chaitaca na yachanichu. Taita Diosllami chaitaca yachan). Chaica ñami chunga chuscu huata tucun.

3Chai runataca rijsinimi. (Cuerpondichu, espiritupichu apai tucurca, chaitaca na yachanichu. Taita Diosllami chaitaca yachan).

4Chai runaca, paraíso juyailla llactamanmi apai tucurca. Chaipica, pipash na rimai ushanalla, pipash na yachai ushanalla shimicunatami uyarca.

5Chai runata rijsishcamandami jariyai ushani, ñucamandallataca na jariyai ushanichu. Ñucaca, imatapash na rurai ushaj cashcatallami villai ushani.

6Ñucallata jariyangapa munashpapash, jariyaimanllami, chaita rurashpaca na yangallata cajpimi chashna rurajuiman. Shina cajpipash, pipash ama ñucata jatumbi churachunmi na imatapash ashtahuan ningapa munani. Ashtahuangarin ñuca rurajujta ricushcatalla, ñuca villajujta uyashcatalla yarichunmi munani.

7Jatun juyaillata ricushcamanda, ama ninanda jariyachunmi, ñucataca jirruhuan tujsijshna, Satanaspaj ángel ñavipi huajtachun saquirca. Chaitaca, ama ñuca ninanda jariyachunmi chashna rurachun saquirca.

8Chaimandami, “nanaita ñucamanda anchuchipai” nishpa, Apunchi Jesustaca quimsacaman ninanda mañarcani.

9Shina mañajpica cashnami nihuarca: “Ñuca juyajujta yachashcamandami cushijuna cangui. Ñucapaj ninan ushaitaca, chai llaquicunapimi ashtahuan ricuchijuni” nihuarcami. Chaimandami, Cristopaj ninan ushai ñucapi causachunga, ñuca imata na rurai ushajushpapash, cushijushpa catijusha.

10Cristota juyashpami, imata na rurai ushajushpapash, rimashpa pingaichi tucujushpapash, imata na charishpapash, catiriyashpa llaquichinajujpipash, ninan llaquicuna japijpipash, ninandapacha cushijuni. Ñuca imata na rurai ushajushpapash, ashtahuanmi shinlli tucushpa catijuni.

11Ñucallata jariyashpa rimanaca na ali cajpipash, cangunallatami juizu illajshna rimachun saquihuarcanguichi. Cangunami, ñuca alita rurajushcataca villana carcanguichi. Chai “alipacha apostolcunaca”, ñucataca ashallatapash na yalihuanllu. Shina cajpipash, ñucaca na imapash canichu.

12Ñuca cangunahuan cashpaca, apóstol rurashpa ricuchinatami ricuchijurcani. Pipash na rurai ushanallacunatapash, juyailla ricuchinacunatapash, ali shunguhuan rurashpami ricuchijurcani.

13Caishuj tandanajushca crijcunahuan ricujpica, ¿imashpata na paicunashnallata carcanguichi? ¿Imatapash carahuaichi nishpa, cangunata fiñachircanichu? ¡Chashna fiñachishca cajpica, quishpichihuaichilla!

Pabloca cutinmi shamusha nijushca

14Ricuichi, cunan shamushpaca, ña quimsacamanmi cangunapajman shamunapacha cani. Canguna imata charishcata mañashpa fiñachingapaca na shamushachu. Huahuacunaca, taitaman, mamaman carangapaca na tandachinllu, ashtahuangarin, taitahuan mamahuanmi, huahuacunaman carangapa tandachinata charin.

15Cangunapaj ali cachun, cangunapaj alma quishpirichunmi ñuca imaguta charishcatapash, ñucallatapash, ninanda cushijushpa Taita Dios munashcashna cushpa pactachisha. Ñuca ninanda cangunata juyajpi, ashallata canguna juyana cajpipash, shina rurashallami.

16Cangunataca na imatapash mañashcanichu, chaitaca yachanguichimi. Shina cajpipash huaquingunaca: “Paica, umachinata ali yachashpamari ñucanchitaca umachirca” nishpami ñucataca juchachinajunguichi.

17¿Cangunapajman, pitapash cachamushpa umachircanichu?

18Titotami, caishuj huauquindi richun mingashpa cacharcani. ¿Titochu cangunataca umachirca? ¿Nachu ishcandi chashnallata yarishpa, chaitallata rurashpa purinchi?

19Pandashcamanda, “quishpichihuai” ninajun yanguichiman. Taita Diospaj ñaupajpimi, Cristopaj cashpa chashna ninajunchi. Juyashca crijcuna, cangunapash ashtahuan shinlli tucushpa catichunmi tucui imatapash chashna ninajunchi.

20Ñuca cangunapajman chayashpaca, na ñuca munashcashna causanajujta japigrishachu yashpa, shinallata, ñucapash na canguna munashcashna caringachu yashpami manllani. Cangunapurapica, fiñanajushca, shujcuna charishcata munashpa ricushca, ninanda fiñarishca, shicanyarishca, na ali shimicunata rimarishca, huasha parlanajushca, randimanda na cazurinajushca, paicunapaj munaitalla rurashpa causanajujta japigrinatami ninanda manllani.

21Ñuca tigramushpaca, juchata na saquishpa, pundashnallata ima munashcata rurashpa causanajujpi, Taita Diosca ñucatara llaquichijpi huacanatami manllani. Cangunapurapica, na alita ruranajushcata na saquishpa, huainayashpa, aicha munaicunatalla ashtahuan rurashpa causanajujta japij shamunatami manllani.