2 CRÓNICAS 35 - Quichua Imbabura 2016

Josías runa pascua micuita rurashcamanda(2 Rey. 23:21-23)

1Josías runaca, Mandaj Diosta alicachingapami, pascua punllapi jatun micuita Jerusalenbi rurarca. Chaitaca, callari quillapaj chunga chuscu punllapimi, Diosman animalta cushpa huañuchinajurca.

2Sacerdotecunataca, Mandaj Diospaj huasipi imatalla ruranacunata rurashpa causachunmi, chaipi churarca.

3Mandaj Diospajta ruraj, Israelcunata yachachij levitacunataca, cashnami nirca: “Diospajlla arcata, ama ashtahuan huandushpa apangapaca, Davidpaj churi jatun mandaj Salomón, Israelcunata mandajushpa shayachishca huasi ucupi churaichi. Cunanga, cangunata Mandaj Taita Diospajtapash, Pai agllashca Israelcunapajtapash rurashpa causaichi.

4Israel llactata jatun mandaj Davidpash, paipaj churi Salomonbash mandashcashnallata, cangunapaj taitacunapaj ayllucuna imashna cashcashna, cati cati shamushpa, Diospajta rurashpa causanguichi.

5Israelcunapaj mirai, cangunapaj huauquicunapaj ayllupurata shicanyachishca levitacunallami, Diospaj huasipi saquirina canguichi.

6Chai jipaca, pascua punllapi huañuchina llamatami huañuchina canguichi. Canguna Diospajlla tucushca jipaca, Mandaj Dios, Moisesman villashcashnallata, cangunapaj huauquicunatapash, Diospajlla tucuchun mandanguichi” nijurcami.

7Jatun mandaj Josías runaca, tucui gentecunamanmi, llamacunata, maltun llamacunata, chivocunata, tucuimandaca, quimsa chunga huarangata cararca. Shinallata, quimsa huaranga huagratapashmi curca. Tucui chaicunataca, chaipi tandanajushca gentecuna, pascua punllapi micuchunmi, jatun mandajpaj alpamandallata cararca.

8Pai jatun mandaj churashca cati mandajcunapashmi, Israelcunaman, sacerdotecunaman, levitacunaman, paicunapaj munaillata cunajurca. Taita Diospaj huasipi, Diospajta ruraj Hilcías, Zacarías, Jehiel shuti sacerdotecunapash, chai pascua punllapi micungapami, ishcai huaranga sucta patsaj llamata, quimsa patsaj huagrata, sacerdotecunaman cunajurca.

9Shinallata, Conanías, paipaj huauqui Semaías, Natanael, Hasabías, Jeiel, Josabad shuti runacunapashmi cunajurca. Paicunaca, levitacunata mandajcunami carca. Pascua punllapi huañuchingapami, picha huaranga llamata, picha patsaj huagrata, levitacunaman cunajurca.

10Chaicunata rurangapa alichishca jipami, sacerdotecunaca, paicuna shayarina pushtupillata shayarinajurca. Levitacunapash, jatun mandaj mandashcashnami, Diospajta rurangapa alichirinajurca.

11Shinami, pascua punllapi huañuchina animalcunata huañuchinajurca. Sacerdotecunaca, chai animalcunapaj yahuarta levitacuna cujpimi tsirapachinajurca. Levitacunami animalcunataca lluchunajurca.

12Chai jipami, Moisés quilcashcapi nijushcashna, Mandaj Diosman cunajuchun, Israel ayllucunata imashna shicanyashcashna, chai tucuillata rupachina animalcunamanda, asha asha cunajurca. Huagracunata huañuchishpapash, shinallatami ruranajurca.

13Chai jipami, mandashcapi nijushcashna, pascua punllapi huañuchishca animalcunapaj aichataca rupachinajurca. Shinallata, Diospajlla cachun shicanyachishcataca, mangacunapi, jatun pailacunapi, sartengunapi yanushpami, tucui gentecunaman caranajurca.

14Chai jipami levitacunaca, paicunapash, sacerdotecunapash micungapa alichinajurca. Aaronbaj mirai sacerdotecunaca, tutayangacaman animalcunatapash, viracunatapash, Diosman cushpa tucuillata rupachinajushca carca. Levitacunaca, paicunapash, Aaronbaj mirai sacerdotecunapash micungapami alichinajurca.

15Shinallata, Asaf shuti levitapaj miraipura chunga ishcai candajcunapash, jatun mandaj Davidpash, Asaf shuti, Hemán shuti mandajcunapash, jatun mandajpaj profeta Jedutún shuti runa mandashcashnami, chai pushtupillata carca. Pungupi ricujcunapashmi, tucuilla pungucunapi ricunajurca. Paicunaca, paicunapaj huauqui levitacuna paicunaman micunata yanunajujpimi, maimambash na anchurishpa chaipillata saquirirca.

16Shinami chai punllapica, Mandaj Diospajta rurangapa tucuita alichinajurca. Pascua punllapi cushijushpa micuita rurangapapash, chai punllapi micungapa huañuchishca animalcunata, Mandaj Diospaj altarpi tucuillata rupachingapapash, jatun mandaj Josías mandashcashnami alichinajurca.

17Chaipi tandanajushca Israelcunaca, chai pascua punllacunapimi cushijushpa micunajurca. Shinallata levadura illaj tandata micuna jatun cushijuitapashmi, canchis punllacaman ruranajurca.

18Israel llactapica, pascua punllapi micuitaca, profeta Samuel huañushca punllamandapacha, na chashna rurashcachu carca. Israel llactata maijan jatun mandajpash, chai pascua punllataca, jatun mandaj Josías shuti runa rurashcashnaca na rurarcachu carca. Paica sacerdotecunata, levitacunata, Judá llactapi, Israel llactapi, Jerusalenbi causajcunata tandachishpami, chashna rurarca.

19Chai pascua punllapi micuitaca, ña chunga pusaj huatata Josías runa chashna ruranajurca.

Josías runa huañushcamanda(2 Rey. 23:28-30)

20Mandaj Diospaj huasita, Josías runa alichishpa tucuchishca tauca huatacuna jipami, Egipto llactata jatun mandaj Necao shuti Faraonga, Éufrates shuti jatun yacu manñapi, Carquemis shuti pushtupi macanajungapa vichai shamurca. Chaimanmi jatun mandaj Josiasca, macanajungapa llujshirca.

21Necao shuti runaca, villajcunatami cashna nishpa cacharca: “Judá llactata mandajlla, ¿ñucaca, canhuanga imata ricunatata charini? Canhuan macanajungapaca, na shamurcanichu. Ashtahuangarin, ñucata fiñaj llacta gentecunahuan macanajungapami shamurcani. Taita Dios mandajpimi shamurcani. Chaitaca na jarcashpa saquinallami cangui. Pactarallapash candara llaquichinman” nichunmi cacharca.

22Ashtahuangarin Josías runaca, na saquishpami, na rijsinalla churajunata churajushpa, paihuan macanajugrirca. Taita Dios rimashcata, Necao shuti runa villajpipash, na cazushpami, Josías runaca Meguido shuti pambapi macanajungapa shamurca.

23Flechacunata shitajcunami, Josías runataca flechacunahuan chayachirca. Chaimandami jatun mandajca, paipaj macanajuj runacunataca: “Ninandapacha chugrishcami cani, caimanda anchuchihuaichi” nirca.

24Shina nijpimi paipajta rurajcunaca, chai carretamanda llujchishpa, chaishuj carretapi churanajurca. Shina churashpa Jerusalenman apajpimi, paica chaipi huañurca. Paitaca, paipaj ñaupa taitacunata pambashca pushtupillatami pambarca. Josías runa huañushcamandaca, Judá llactapi tucui causajcunapash, Jerusalenbi causajcunapashmi ninanda llaquirinajurca.

25Jeremiasca, Josías runa huañushcamandami, ninanda llaquirishpa huacajurca. Candanata yachaj jaricunapash, huarmicunapash cunan punllacamanmi, Josías huañushcamanda ninanda llaquirishpa huacana shimicunata candanajun. Israelcunaca, maijan huañushca cajpipash, chai shimicunatallatami yarishpa yarishpa huacanajun. Chai shimicunaca, “Huacana Shimicunata” quilcashcapimi tiyajun.

26Ashtahuan imatalla Josías runa rurashcapash, Mandaj Dios mandashcapi quilcashcashnallata, shujcunata llaquishpa paicunaman alita rurashcapash,

27punda punllacuna, jipa punllacuna pai imatalla rurashcacunapash, Israel llactata, Judá llactata jatun mandajcuna imatalla rurashcacunata quilcashcapimi tiyajun.