Psalms 26 - Quichua Imbabura 2016

Ima na alitapash na rurapashachu nishcamandaDavid rurashca Salmomi.

1Mandaj Dioslla, ricuhuayari.

Ñucaca, ima na alitapash na rurashpami causapashcani.

Mandaj Diostalla yariashpami shuyajushcani.

2Mandaj Dioslla,

ñuca imashna cajtaca, aligutapacha ricushpa yachahuayari.

Ñuca tucui yuyaicunapash, ñuca shungupash imashna cajta ricuhuayari.

3Cambaj ninan juyaica, ñucahuan cajpimi,

Cambaj na llullaj shimita catishpa purijuni.

4Mishqui shimi jayaj shungu runacunahuanga, na tandanajushcanichu.

Ricuipilla alishnalla gentecunahuambash, na tandanajurcanichu.

5Na alita rurajcuna tandanajushcataca napacha alicachircanichu.

Canda na cazujcunahuambash, napacha tandanajurcanichu.

6Mandaj Dioslla,

ñucaca na juchata rurapashcanichu.

Mandaj Dioslla,

chashna cashpami, Cambaj altar muyundipi purijusha.

7Chaipimi Candaca pashi nishpa ninanda candajusha.

Tucui imatalla, Can rurashcatami villajusha.

8Mandaj Dioslla,

Can causajuj huasigutaca juyapanimi.

Cambaj ninan ushai tiyajuj huasigutaca juyapanimi.

9Ñucataca, juchata rurajcunahuanga, ama tandachishpa apahuanguichu.

Huañuchij runacunahuambash, ama pacta apahuanguichu.

10Paicunaca, na alita ruranatallami yarinajun.

Paicunapaj maquipash, pacalla cushca culquihuan jundami.

11Ashtahuangarin ñucaca, ima na alitapash na rurashpami causasha.

Quishpichihuayari, ñucataca llaquihuayari.

12Ñucaca, tucuita alitallami rurashpa causashcani.

Jatun tandanajuicunapimi, Mandaj Diostaca aligumari cangui nijusha.