SANTIAGO 4 - Quichua Imbabura 2016

Cai pachapi causaitaca na juyana cashcamanda

1Cangunapurallata ninanda macanajushpa, fiñanajushpa causanaca, ¿maimandata shamun? ¿Nachu na ali munaicuna cangunapillata tiyajpi chashna causanajunguichi?

2Ninandapacha imata munashpapash, na chari ushashpallatami causanguichi. Imata cashpapash, “ñucapaj cashcanman yashpa”, chaitalla ninanda yariashpami huañuchishpapash, napacha chari ushanguichi. Ninanda fiñashpa macanajushpapash, Diosta na mañashcamandami, imatapash na charinguichi.

3Na alita rurashpa cushijushpa tucuchingapalla, na ali yuyaihuan mañashcamandami, mañashpapash napacha japinguichi.

4¡Taita Diosta na juyashpa causaj gentecunalla! Cai pachapaj causaitalla juyashpa causajcunaca, Taita Diosta fiñashpa causanajujtaca ¿nachu yachanguichi? Cai pachapi causaitalla juyashpaca, Taita Diostami na ricunayachishpa causanajun.

5Dios quilcachishca Shimipica: “Ñucanchi shungupi causachun Dios caramushca Espirituca, Paipajlla causachunmi munan” nishpami villajun. Shina nijujtaca, ¿yangatallami nijun yashpachu causanguichi?

6Ashtahuangarin ñucanchitaca, Taita Diosca ninandami juyajun. Shinamandami Diospaj Shimipica: “Taita Diosca, jatun tucushcacunata na ricunayachishpami, juyaj shunguta charijcunataca ninanda alicachijun” nijunmi.

7Taita Dioshuan cashpami, shinlli shayarishpa diablotaca mishai ushanguichi. Shina cajpimi, cangunamandaca anchurishpa ringa.

8Taita Diospajman quimirichi, chaimi Paipash cangunapajman quimirimunga. Juchapilla causajcuna, maquita maillajshnami juchataca saquina canguichi. Ishcai shungu tucushpa causajcuna, cangunapaj shungutaca alichinami canguichi.

9¡Aij! nishpa, ninanda llaquirishpa huacaichi. Asinataca saquishpa huacaichi. Cushijunatapash saquishpa, llaqui llaqui tucuichi.

10Jatun Diospaj ñaupajpica, pingai tucushpa urai cumurichi. Shina rurajpimi, cangunataca jatunyachinga.

Crijcunaca na juchachirinachu canguichi

11Juyashca crijcuna, caishujmanda chaishujmanda na alicachirishpaca na parlanachu canguichi. Crijtallata na alicachishpa, juchachishpa rimajushpaca, Dios mandashcatami na alicachishpa yangapi churan. Mandashcata na alipi churajushpaca, chai mandashcataca na cazujushpami, canllata juez tucushcangui.

12Shujlla Diosmi mandashca shimicunataca curca. Paillatami quishpichingapapash, chingaiman cachangapapash ushaita charin. Shina cajpica, shujta can juchachingapaca ¿pita canguiyari?

Cayapami tucuita rurasha nishpaca, na jariyanachu canguichi

13Cunanga: “Cunan cashpa caya cashpapash, shuj huatacaman randishpa, jatushpa culquita mirachingapa chai puebloman jacuchi” nishpa purijcuna ¡uyaichi!

14Caya punlla ima tucunatapash, napacha yachashpami causanguichi. ¿Ñucanchipaj causaica imatayari? Huaira fuyu ashatalla ricurimushpa, ñapash chinganshnami.

15Chaipaj randica: “Jatun Dios munajpillami, caita chaita rurashpa causai usharinga” ninami canguichi.

16Ashtahuangarin, cunanga jariyashpa jatun tucushpami parlanajunguichi. Chashna jariyashpa causanaca napacha alichu.

17Alita rurana tiyajta yachashpapash, chaita na rurashpaca, juchatami rurajungui.