ZACARÍAS 4 - Quichua Imbabura 2016

Curi candeleromandapash, olivo yuracunamandapash

1Ñucahuan parlajuj ángel cutin tigramushpami, shuj runa puñujujpi rijchachinshna rijchachihuarca.

2Chai angelca: “¿Imatata ricujungui?” nishpami tapuhuarca. Shina tapujpimi, cashna nircani: “Curitalla rurashca candelerotami ricujuni. Chai candelero jahuapica, aceiteta churanatapashmi ricujuni. Chai jahuapica, canchis lamparacuna tiyanajujtapashmi ricujuni. Chai jahuapi tiyajuj lamparacunapaj canchis angucunatashna rurashcatami ricujuni.

3Candelerohuanga, ishcai olivo yuracunahuan pacta cajtami ricujuni. Shujca, aceiteta churana aliman, caishujca lluquimanmi shayajun” nircanimi.

4Chai jipaca, ñucahuan parlajuj angeltaca: “Ñucata mandajlla, ¿caica imata capan?” nishpami tapurcani.

5Shina tapujpimi, ñucahuan parlajuj angelca: “¿Nachu ima cajta yachangui?” nihuarca. Shina nijpimi: “Ñucata mandajlla, na yachapanichu” nircani.

6Shina nijpimi, cashna nihuarca: “Mandaj Diosca, Zorobabel runamanmi cai shimicunata cashna nin:

‘Macanajuj runacunahuan,

ninan ushaihuambash na mishanguichu.

Ashtahuangarin Ñuca Espirituhuanllami mishangui’ ninmi tucuita Mandaj Diosca.

7Shinallata: ‘Jatun urculla, Zorobabel runapaj ñaupajpica, ¿pita canguiyari?

Canga, pugru pamba tucungacamanmi llaquichi tucungui.

Paica, ucuman tiyajuj callari rumitami churai callaringa.

Shina churajujpica: ¡Juyaillagumari, juyaillagumari! nishpami caparinajunga’ ninmi” nircami.

8Chai jipami, Mandaj Diosca cai shimicunata cashna nishpa villahuarca:

9“Diospaj cai huasita rurai callaringapaca,

Zorobabelmi, paipaj maquihuambacha ucuman callari rumita churanga.

Cai huasitaca, paipaj maquihuanllatami rurashpa tucuchinga” nishpami villahuarca.

Shina rurashcacunata ricushpami,

tucuita Mandaj Diosllata cangunapajman ñucata cachamushcata yachanguichi.

10Shinallata: “Cai huasita rurai callarijui punllata yangapi churajcunami,

tucuchishcata ricushpaca cushijunajunga.

Plomadatapash, Zorobabel charijujtami ricunajunga.

Chai canchis lamparacunaca, Mandaj Diospaj ñavihuan tucui cai pachata ricujujtami ricuchijun” nihuarcami.

11Cashnatapashmi ashtahuan tapurcani: “Candeleropaj alimambash, lluquimambash shayanajuj chai ishcai olivo yuracunaca, ¿imatata ricuchijupan?” nircanimi.

12Ashtahuambash, cashnatapashmi nircani: “Ishcai olivo yuracunapaj, ishcai malquicunamanda curishnalla aceite talirijunga, ¿imatata ricuchijupan?” nishpami tapurcani.

13Shina nijpimi chai angelca: “¿Nachu ima cajta yachangui?” nihuarca. Shina nijpimi: “Ñucata mandajlla, na yachapanichu” nircani.

14Shina nijpimi chai angelca cashna nihuarca: “Caicunaca, Diospajlla agllai tucushca ishcai runacuna, tucui cai pachata mandaj Jatun Diospaj ñaupajpi shayanajujtami ricuchijun” nihuarcami.