1Mandaj Diosca, cashnami nin: “Ñuca llamacunata, na ali michishpa chingachij runacunaca, ¡aij imachari tucunga!” ninmi.
2Shinamandami Israelcunata Mandaj Diosca, Israel gentecunata michijcunataca, cashna nin: “Ñuca llamacunata ricuriashpa pushangapa randica, manllachishpami caita chaita cacharcanguichi. Canguna na alita rurashcamandaca llaquichishami. Mandaj Dios Ñucami, chashna nini.
3Shuj llactacunaman Ñucallata cachashca gentecunamanda puchushcacunataca, paicuna causanajushca pushtumanllatami cutin tigrachimusha. Chaipimi, ashtacacuna mirashpa ninandapacha jundanajunga.
4Paicunata pushanajuchunga, michijcunatami churasha. Shina cashpami, manllai illaj causashpa, na yangapi churai tucunajunga” ninmi Mandaj Diosca.
5Mandaj Diosca, cashnatapashmi nin:
“Shamui punllacunapica, Davidpaj miraimandami, alitalla ruraj shuj mandajta churasha.
Paica, ninan ushaihuanmi mandajunga.
Paica, ninanda alicachi tucushca cashpami, cai pachapica alitalla rurashpa mandajunga.
6Chai punllacunapica, Judá llactapi causajcunaca, ima llaquipash illajmi, cungashca causanajunga.
Israelcunapash, imatapash na manllashpami Diosta yariashpa causanajunga.
Paipaj shutitaca: ‘Ali cashcatalla ruraj Mandaj Dios’ nishpami rijsinajunga” ninmi.
7Mandaj Diosca, cashnatapashmi nin: “Cangunaca: ‘Israelcunata Egipto llactamanda vichai pushamuj Mandaj Diosca causajunmi’ nishpami causanguichi. Ashtahuangarin, chashna rimanaca napacha tiyana punllacunami chayamugrin.
8Ashtahuangarin cunanga: ‘Israelcunapaj miraicunataca, janaj llactaman llujchishpa cachai tucushca tucui llactacunamanda tigrachimuj Mandaj Diosca, causajunmi’ ninajungami. Shina tigrachimujpimi, paicunapaj llactapillata causanajunga” ninmi.
Llulla profetacunata rimashcamanda9Profetacuna, cangunamandaca, shungu faquirinshnami ninandapacha llaquirijuni.
Jucha illaj Mandaj Dios rimashca shimicunata uyashpami,
Paipaj ñaupajpica, vinota ufiashpa machashcashnami tucuni.
10Cai llactapica, cazarashca jahua shujcunahuan causajcunalla jundami.
Chashna cajpi, Dios na alicachijpimi, alpapash jichushca saquirishca.
Pambacunapi jihuacunapash chaquishpami tucurishca.
Tucui gentecunami, na alita rurangapalla calpanajurca.
Shujcunata llaquichingapallami, shinllicuna carca.
11Mandaj Diosca, cashnatapashmi nin:
“Ñucamanda villaj profetacunapash, sacerdotecunapash, Ñucataca na cazunajunllu.
Paicunatacarin, Ñucapajlla huasipimi, na alita rurajta ricurcani.
12Chaimandami paicunaca, urmanalla ñanda yana tutapishna purinajunga.
Shinamandami, paicunaca llaquipi urmanajunga.
Ñucallatami, paicunamanga ninan llaqui punllacunata cachamusha” ninmi Mandaj Diosca.
13“Samaria llactapi profetacunataca, llullashpa villanajujtami ricurcani.
Paicunaca, Baal shuti rurashcalla diospaj shutipi villashpami, Ñuca agllashca Israelcunataca pandachinajurca.
14Shinallata Jerusalenbi profetacunatapash, ashtahuan na alicunatalla ruranajujtami ricurcani.
Paicunaca, cazarashca jahuapash shujcunahuan causashpami, imatapash llullashpalla ruranajurca.
Chaimandami, gentecunaca, paicunata uyashpa ashtahuan na aliman tigranajurca.
Chai gentecunaca, Ñuca ñaupajpica, Sodoma, Gomorra pueblocunapi causajcunashnami carca” ninmi.
15Shinamandami tucuita Mandaj Diosca, chai profetacunata fiñashpa, cashna nijun:
“Paicunamanga, jayaj ajenjota micuchishpa, huañuchina yacutami ufiachigrini.
Jerusalenbi profetacunamandami, mishqui shimi jayaj shungu canaca, tucui llactacunapi mirashca” ninmi.
16Tucuita Mandaj Diosca, cashnatapashmi nin:
“Chai profetacuna villashca shimicunataca, na uyanachu canguichi.
Cangunata umachingapallami juyailla villanajun.
Paicunaca, shungu yarishcatallami, muscuipi ricushcatashna villanajun.
Mandaj Dios villashcataca, napacha villanajunllu.
17Paicunaca llullashpallami, Ñucata fiñajcunataca:
Mandaj Diosca, cashnami nin: ‘Cangunapajca, ali causaimi tiyanga ninmi’ ninajun.
Shinallata, paicuna munashcata rurashpa purij runacunamambashmi:
‘Cangunapajca, ima llaquipash na shamungachu’ ninmi ninajun.
18Shinallata, ¿pita Mandaj Dios imatalla rurangapa munajujtaca yacharca?
¿Pita Paipaj Shimitapash uyarca?
¿Pita Pai imata nijujtapash ali uyajurca? ninajunmi.
19Mandaj Dios cachamushca llaquicunaca, ninan huaira shamujshnami, ñapash chayamunga.
Dios alichishpa charijuj ninan llaquicunaca, na alita rurajcunatami llaquichinga.
20Mandaj Dios Ñuca ninandapacha fiñarishpa llaquichinaca,
Ñuca shungupi yarijushcata pactachingacaman, napacha anchuringachu.
Jipa punllacunami, chaicunataca alipacha yachai ushanguichi.
21Chai llulla profetacunaca, na Ñuca cachajpitami, paicunallata calpanajurca.
Na Ñuca imata nijpitami, llullashpa villanajurca.
22Ñuca imata ruranata, paicuna ali yachashca cashpaca,
Ñuca villashca shimicunatami, Ñuca agllashca gentecunamanga villanman carca.
Shina villashpaca na ali causajcunatapash, na alita rurajcunatapash, alichinmanmi carca.
23Ñucaca, ¿Nachu caru carupi cashpapash, tucuita ricuj Dios cani?” ninmi Mandaj Diosca.
24Mandaj Diosca cashnami nin: “¿Pipash Ñucamanda pacajui ushangachu?
¿Nachu Ñucaca, jahua pachapipash, cai pachapipash tucuita ricujuni?
Mandaj Dios Ñucami, chashna nini ninmi.
25Ñucaca, chai profetacunataca: ‘Diosca muscuipimi rimahuarca’ nishpa, llullashpa Ñuca shutipi villanajujtami uyarcani.
26Chai profetacunaca, ¿ima punllacamanshi llullashpalla villanajunga? Chai profetacunaca, paicunapaj shungu yarishcatallami umachishpa villanajun.
27Paicuna muscushcata, paicunapaj cumbacunaman parlashpaca, ¿Nachu, Ñuca agllashcacuna, Ñucata cungachun, chashna ruranajun? Paicunapaj ñaupa taitacuna Ñucata cungashpa, Baal shuti rurashcalla diostara catichun munashpa ¿Nachu chashna ruranajun?
28Profetapash pai muscushcatallami villachun. Ñuca shimicunata chasquishpa villaj runapash, Ñuca villashcatallami, na llullashpa villanata charin. Jupahuan, trigohuanga ¿Chashnallatachu canga?” ninmi Mandaj Diosca.
29Mandaj Diosca: “Ñuca villashca shimicunaca, ¿nachu ninashna? Shinallata ¿nachu rumita faquij martilloshna?
30Shina cashcamandaca, Ñuca ima nishcata villajshna llulla profetacunataca, Ñucami llaquichigrini” ninmi Mandaj Diosca.
31Mandaj Diosca, cashnatapashmi nin: “Diosmi villachun cachamun nishpa, juyailla shimicunahuan villajcunataca, Ñucami fiñashpa llaquichigrini” ninmi.
32Mandaj Diosca, cashnatapashmi nin: “Llulla muscuicunatalla villaj profetacunahuanmi fiñarishca cani. Paicunaca, uyanayai shimicunahuan llullashpami, Ñuca agllashcacunataca pandachinajurca. Ñuca na villachun cachamujpimi, cai gentecunaca, ima alitapash na ruranajurca” ninmi Mandaj Diosca.
33“Canda, maijan cashpapash, profeta cashpapash, sacerdote cashpapash: ‘¿Mandaj Diosca, imatata villan?’ nishpa tapujpica, cashna ningui: Mandaj Diosca, caitami villachun cachamuhuan: ‘Ñucaca, cangunataca jichushpa saquigrinimi’ ninmi ningui.
34Shinallata maijan profetapash, maijan sacerdotepash, caipi gentecunamanda maijan cashpapash: ‘Mandaj Diosmi, cashna villan’ nijpica, paimambash, paipaj huasimambashmi, ninan llaquita cachamusha.
35Cangunaca, cumbata cashpa, huauquita cashpapash: ‘¿Mandaj Diosca imatata tigrachirca, Mandaj Diosca imatata nirca?’ nishpa tapunguichi.
36Cunanga: ‘Mandaj Dios villashcami’ nishpaca, napacha ninachu canguichi. Tucuicuna villashca shimillatami, cangunataca llaquichinga. Causaj Taita Diospaj, tucuita Mandaj ñucanchi Taita Diospaj Shimita na aliman tigrachishcamandami, chashna llaquita apanguichi.
37Chai profetataca: ‘Mandaj Diosca, ¿Imatata tigrachirca? Mandaj Diosca, ¿Imatata nirca?’ nishpa tapunguichi.
38Shinallata, ‘Mandaj Dios villashcami’ nishpaca napacha ninachu canguichi. Mandaj Diosca cashna nirca: ‘Mandaj Dios villashcami’ nishpaca, na llullashpa villanachu canguichi nishpami mandarca.
39Shinamandami, cangunataca jichushpa saquisha. Shinallata, cangunatapash, cangunapaj ñaupa taitacunaman carashca pueblotapashmi, tucuillata tucuchisha.
40Shina rurashpami, cangunataca, causaita causaicaman, jatun llaquihuan, ninanda pingai tucushpa causachun saquisha nishpa villangui” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
