ROMANOS 10 - Quichua Imbabura 2016

1Juyashca huauquicuna, Israelcunatapash quishpichijuchun munashpami, tucui shunguhuambacha Diosta mañariyajuni.

2Taita Diospajta rurangapa ninandapacha munanajushpapash, paicunaca imashna aliguta pactachinataca na yachajpimi, paicunamanda cashna villajuni.

3Ashtahuangarin alitalla rurashcatashna Taita Dios chasquijujta na yachashpami, paicunapaj munailla imatapash ruranajun. Shina cashpami, Taita Dios munashcashna rurangapaca na munashpa causanajun.

4Mandashca shimicunataca Cristomi pactachirca. Paita crijcunataca, alitalla rurashcatashna chasquingapami chashna rurarca.

5Mandashca shimita pactachijpi, alitalla rurachun Dios chasquinamandaca Moisesca cashnami quilcashca: “Cai mandashca shimita pactachishpallami, chaipi nishcashna causajunga” nishcami.

6Ashtahuangarin crijpilla, alitalla rurashcatashna Dios chasquinamandaca cashnami nijun: “Ama cambaj shungupica: ‘¿Pita jahua pachamanga ringayari?’ ninguichu” nijunmi. (Shina nishpaca, Cristota jahuamanda urai apamunshnami nijungui).

7Na cashpaca: “Canga ¿pita manllanayai ucu ucu utujuman uriajungayari? nitapash ama ninguichu” nijunmi. (Shina nishpaca, huañushcacunapaj chaupimanda Cristota jahuaman llujchimujshnami nijungui).

8Ashtahuangarin ¿ima nijunda? Cashnami nijun: “Diospaj Shimica, canhuan pacta cashpami, cambaj shimipipash cambaj shungupipash tiyajun” nijunmi. Cai shimicunata crinamandami villanajunchi.

9Cambaj shimihuanga: “Jesusca ñucata jatun Mandajmi” ninami cangui. Shinallata, Jesustaca, huañushcacunapaj chaupimanda Taita Dios causachishcatami tucui shunguhuan crina cangui. Shina rurashpaca quishpiringuimi.

10Alitalla rurashcatashna Dios chasquichunga, shunguhuanmi crina canchi. Shinallata, quishpiringapami shimihuanga nina canchi.

11Dios quilcachishca Shimipica: “Pipash Paita crishpaca, na pingai tucungachu” nijunmi.

12Judiocunapash, griegocunapash chashnallatami. Jatun Diosca, tucuicunata mandaj cashpa, ninan charij cashpami, Paita tucui mañajcunaman caramujun.

13“Maijan cashpapash Jatun Diosta crishpa mañashpaca quishpiringami” nijunmi.

14Ashtahuangarin Paita na crij cashpaca, ¿imashnata mañangayari? Shinallata, paimanda villajta na uyaj cashpaca, ¿imashnata cringayari? Pipash Paimanda na villajpica ¿imashnata uyangayari?

15Pitapash villachun na cachajpica, ¿imashnata villangayari? quilcashcapica cashnami nijun: “¡Shungupi llaqui illaj causaimanda villashpa purijcunapash, quishpirina ali shimicunata villashpa purijcunapash juyaillamari villanajun!” nijunmi.

16Ashtahuangarin, quishpirinamanda villajujpica na tucuicuna cazurcachu. Shinamandami, Isaiasca: “Jatun Dioslla, ñucanchi villajujtaca, ¿pita crircayari?” nijun.

17Shina cashcamandami crinaca, uyashcamandalla shamun, shinallata uyanaca, Diospaj Shimimandami shamun.

18Ashtahuangarin cashnami nini: Villajujtaca, ¿nachu uyashcanga? Villashcapica cashnami nijun:

“Paicuna villajuj shimica, tucui cai pachapimi uyarijun.

Paicuna villajuj shimicunaca, tucui cai pacha manñacamanmi uyarijun” nijunmi.

19Caitapashmi nini: Israelcunaca, ¿chaitaca nachu yachashcanga? Moisesmi, pundata cashna nishca:

“Napash ñucapaj gentecunata agllashpami, cangunataca fiñachisha.

Imatapash na yachajcunatara agllashpami, cangunataca fiñachisha” nishcami.

20Isaiaspash, na manllashpami cashna nishca:

“Ñucata na mascashpa purijcunahuanrami tuparircani.

Ñucata na tapujcunamanrami ricurircani” nishcami.

21Ashtahuangarin, Israelcunamandaca cashnami nin: “Ñucata na cazushpa fiñachij gentecunataca, punllandimi juyaihuan shuyajurcani” nijunmi.