LEVÍTICO 19 - Quichua Imbabura 2016

Diospajlla causashpa, alitalla ruranajuchun mandashcamanda

1Mandaj Diosca, Moisestaca cashnami nijurca:

2“Tandanajushca tucui Israelcunaman, cashna nishpa villangui:

‘Ñucami jucha illaj, Mandaj Taita Dios cani. Shinallata cangunapash Ñucashnallata, jucha illajmi causana canguichi.

3Cangunapaj taitata, mamataca, alicachishpami cazuna canguichi. Ñuca samana punllatapash, pactachishpami causana canguichi. Ñucami cangunata Mandaj Taita Dios cani.

4Rurashcalla dioscunata napacha catinachu canguichi. Shinallata, imatapash yacuyachishpa shuj dioscunata na ruranachu canguichi. Ñucami, cangunata Mandaj Taita Dios cani.

5Mandaj Dioshuan ali cangapa animalta cushpa huañuchishpaca, pai chasquichunmi, pai munashcashna pactachishpa cuna canguichi.

6Chaitaca, chai huañuchishca punllapash, cayandi punllapash micunallami canga. Quimsa punllacaman puchushcataca ninapimi rupachina canga.

7Ña quimsa punlla tucujpi micujpica, millanayai cajpimi Diosca napacha chasquinga.

8Maijambash chaita micushpaca, Mandaj Diospajlla shicanyachishcata yangapi churashpa na alita rurashcamandami, paipaj llactamandaca calpachi tucunga.

9Cambaj alpapi granocunata tandachijushpaca, ama alpa manñacaman tandachinguichu. Shinallata, ama tigrashpa pallajunguichu.

10Shinallata cambaj uva chagrapi urmashcataca, na tigrashpa japinachu cangui. Chaicunataca, imagupash illajcuna, caru llactamanda shamushcacuna pallachunmi saquina cangui. Ñucami cangunata Mandaj Taita Dios cani.

11Ama shuhuanguichu, ama umachinguichu. Caishujmanda, chaishujmanda na llullarinachu canguichi.

12Ama yangata Ñuca shutipi juramentunguichu. Chashna rurashpaca, cambaj Taita Diospaj shutitami, yangapi churajungui. Ñucami Mandaj Dios cani.

13Ama pitapash llaquichinguichu. Ama shuhuanguichu. Cambaj huasipi imatapash rurashpa causaj runagumanga, ama cayandipaj saquishpa, chai punllallata culquita cuna cashcataca cungui.

14Rinri na uyaj runagutaca, “imapash llaqui japishpami ali canman” nishpaca ama llaquichinguichu. Ñausa runagupaj ñaupajpica, ama imatapash nitijanata churanguichu. Ashtahuangarin cambaj Taita Diosta manllangui. Ñucami Mandaj Dios cani.

15Chimbapurachishpa imapacha cajta ricujushpaca, ishcanditallata imashna cajta ali ricushpa rimangui. Imagutapash na charijtapash, charijtapash na agllashpalla alipi churanachu cangui. Ashtahuangarin piman cashpapash, imata rurana cashcatami rurana cangui.

16Cambaj llactapica pitapash na huasha parlanachu cangui. Pita cashpapash, na huañuchina yuyaihuanga ricunachu cangui. Ñucami Mandaj Dios cani.

17Cambaj huauquitaca ama cambaj shungupilla, fiñashpa causanguichu. Juchata rurajtaca, ama cambash chaipillata urmangapami aliguta yarichishpa rimana cangui.

18Canda llaquichijcunataca na chashnallata llaquichinachu cangui. Cambaj llactapuratapash, na fiñashpami, imashna can juyarinshnallata juyana cangui. Ñucami Mandaj Dios cani.

19Ñuca mandashcacunataca cazunami canguichi.

Cambaj huagrataca, ama shuj animalcunahuan puñuchinguichu.

Cambaj alpapipash, ama shuj shuj muyucunata chapushpa tarpunguichu. Shinallata, shuj shuj puchacunahuan ahuashca churajunatapash, ama churajunguichu.

20Shuj gañan cuitsa, gañan cashcamanda nara cacharirishca cashpa, shuj jarihuan cazarangapa ari nirishcalla cajpi, paipaj mandaj runa chai cuitsahuan pacta puñushpaca, cuitsapash chai runapashmi asti tucunga. Cuitsata nara cacharishca cajpimi, paicunataca na huañuchinga.

21Chai runaca, pai na alita rurashcamandami, Mandaj Diosman cungapa shuj jari llamata, Dioshuan tuparina jatun carpa punguman apamunga.

22Juchamanda cushca chai jari llamataca sacerdotemi, Mandaj Diospaj ñaupajpi Dioshuan ali tucuchun cunga. Shina cujpimi, juchata rurashcataca Diosca perdonanga.

23Canaán llactaman ña yaicushpa, micuna mishqui muyucunata fucuj yuracunatami tarpunguichi. Chai yuracunapi punda fucushcacunataca, circuncisionda na rurashcashna cajpimi, quimsa huatacaman na micuna canguichi.

24Ña chuscu huata tucujpica, chai yuracunapi fucushcacunataca, Mandaj Diosmanmi tucuillata cushijushpa cuna canguichi.

25Ashtahuangarin, picha huata tucujpi fucushcatami cangunaca micuna canguichi. Chashna rurajpimi, chai yuracunaca ashtahuan fucunga. Ñucami, cangunata Mandaj Taita Dios cani.

26Yahuarhuan chapurishcataca imatapash na micunachu canguichi. Shinallata cangunaca, brujucunapash, yachajcunapash na tucunachu canguichi.

27Chaupi umapi ajchatapash na muyundita rutuchinachu canguichi. Barbas pundatapash, na rutushpa huaglichinachu canguichi.

28Pipash huañujpica, ama cambaj aichapi chugriringuichu. Shinallata ima ricuchinatapash, cangunapaj aichapica na rurachinachu canguichi. Ñucami Mandaj Dios cani.

29Cambaj ushitaca, culquimanda huainayachunga napacha cachanachu cangui. Chai llactapi ama mapa jundachunmi, na chashna rurachun saquina cangui.

30Samana punllataca pactachinami canguichi. Ñucapajlla huasitapash, manllaihuanmi aliguta charina canguichi. Ñucami Mandaj Dios cani.

31Yumbucunatapash, yachajcunatapash, na mascanachu canguichi. Paicunata imatapash tapushpa na mapayanachu canguichi. Ñucami, cangunata Mandaj Taita Dios cani.

32Yuraj uma rucugutaca, paita cazushpami jatarishpa alicachina canguichi. Cambaj Taita Diostaca, manllaihuanmi cazuna cangui. Ñucami, Mandaj Dios cani.

33Shuj llactamanda shamushpa cangunapaj llactapi causajuj runagutaca, na llaquichinachu canguichi.

34Shuj llactamanda shamushca runagutaca, cai llactapi huacharishca runatashnami juyana canguichi. Paitaca, imashna can juyarinshnallatami juyana cangui. Cangunapash, shuj llactamanda rishpami, Egipto llactapi causarcanguichi. Ñucami, cangunata Mandaj Taita Dios cani.

35Chimbapurashpa aliguta ricujushpapash, alpata tupujushpapash, imata pezajushpapash, imapi cashpapash, na shujtalla alipi churashpami, alitalla rurana cangui.

36Ali pezaj balanzata, ali pezaj rumita, ali tupuj varatami charina canguichi. Ñucami Egipto llactamanda llujchimuj, cangunata Mandaj Taita Dios cani.

37Canguna, pactachinajuchun Ñuca cushca mandashca shimicunataca pactachinami canguichi. Ñucami, Mandaj Dios cani’ nishpa villai” nijurcami.