ZACARÍAS 11 - Quichua Imbabura 2016

1Líbano urculla,

cambaj cedro quirucunata ninahuan rupachishpa tucuchingapa,

cambaj pungucunata pascayari.

2Ciprés quirulla, ninandapacha caparishpa

Cedro quirucuna urmashcamanda huacayari.

Alipacha juyailla quirucunapashmi, urmachi tucushca.

Basanmanda encina jatun quirucunapash, caparishpa huacaichiyari.

Pambapi shayanajuj ashtaca quirucunami, urmachi tucushca.

3Juyaillapacha jihua pambacuna tucuilla tucushcamandami,

michijcunapash ninanda caparishpa huacanajuj uyarin.

Leongunapaj huahua leongunapash,

Jordán juyailla jatun yacu chaquishcamandami, ninanda huacashpa caparinajuj uyarin.

Na ali michijcunamandami villajun

4Ñucata Mandaj Taita Diosca cashnami nihuarca: “Huañuchi tucuna llamacunata michij.

5Chai llamacunata randijcunaca, imatapash na manllashpami huañuchinajun. Jatuj runapash cashnami nin: ‘Mandaj Diosca ninanda alicachi tucushca cachun. Ñami ashtacata charijyashcani’ nijunmi. Michijcunapash, llamacunamandaca imatallapash na llaquirinajunllu.

6Chaimandami, Mandaj Diosca: ‘Cai llactapi causajcunataca, Ñucapash na ashtahuan llaquishachu’ nijuni. Ñucallatami paicunataca, paicunapaj cumbacunapaj maquipi, jatun mandajpaj maquipi churasha. Paicunami cai llactataca, tucuilla tucuchinajunga. Paicunapaj maquimandaca, napacha cacharichishachu” nihuarcami.

7Chaimandami, huañuchi tucuna llamacunata michijurcani. Shinallata ashtahuan huajcha llamacunatapashmi ricujurcani. Chai llamacunata michingapaca, ishcai tauna caspitami charircani. Chai caspicunataca, shujtaca: “Ninanda juyana” shutitami shutichircani. Caishujtaca: “Huatanacuna” shutitami shutichircani.

8Shinallata shuj quillapillami, quimsa michijcunata calpachircani. Ñuca shungupica, paicunahuan na ashtahuan ali caita ushashpami, ninanda fiñarircani. Paicunapashmi, ñucataca na ashtahuan ricunayachihuarca.

9Chaimandami cashna nircani: “Na ashtahuan michishachu. Maijambash huañushpaca, huañungallami. Maijambash chingashpaca, chingangallami. Chaimanda, puchucunaca tucuicunallata paipura micurishpa tucuringallami” nircanimi.

10Shina nishca jipami, “Ninanda juyana” shuti ñuca tauna caspita japishpa faquircani. Tucui llactacunapi causajcunahuan ñuca ari ninajushcata faquishcata ricuchingapami, chashna rurarcani.

11Chai punllami, ari ninajushcata pactachinaca tucurirca. Chashnami, ñucata ricurianajuj huajcha llamacunaca, Mandaj Diospaj Shimita villajushcata yacharca.

12Chaipimi cashna nircani: “Cangunapi ali cajpica, ñuca imatalla rurashcamanda cuhuaichilla, na cashpaca saquipaichilla” nircanimi. Shina nijpimi, paicunaca quimsa chunga culquita pezashpa, ñuca imatalla rurashcamanda cuhuarca.

13Chaimandami Mandaj Diosca, cashna nihuarca: “Chai culquitaca, culquita alichinapi alichilla. ¡Chashna ashtaca culquipajmi, ñucataca jatunajurca!” nihuarcami. Shina nijpimi, chai quimsa chunga culquita japishpaca, Mandaj Diospaj huasipi culquita alichinapi alichircani.

14Chai jipami, “Huatanacuna” shuti caishuj tauna caspitapash faquircani. Israelcunahuan, Judá llactapi causajcunahuan, huauquipura aliguta causanajushcata faquinshna shicanyachingapami, chashna rurarcani.

15Mandaj Diosca cashnami nihuarca: “Cunanga, juizu illaj michijshnalla cambash purijunguilla.

16Cai llactapimi, na ali michijta churagrini. Chai michijca, chingashcacunatapash na ricugringachu, uchilla llamacunatapash na mascagringachu. Chaqui faquirishcatapash na jambingachu, shaijushcacunatapash na rigra jahuapi churashpa apangachu. Ashtahuangarin vira llama aichataca, pairami micunga, sillucunatapashmi faquinga.

17Llamacunata na michij ushashpa, shitashpa saquij runalla, ¡aij imachari tucunga! Paipaj rigratapash, ñavitapash, espada chugrichishpami ali canman. Paipaj rigrapash, tucuillami chaquinga. Ñavicunapash, ñausapachami saquiringa” nihuarcami.