1Profeta Eliseoca, profeta cangapa yachajujpuramanda shuj runata cayashpami, cashna nirca:
“Ali chumbilirishpa, cai uchilla fundugupi aceiteta apashpa, Galaad llactapi tiyajuj Ramot shuti puebloman rilla.
2Chaiman chayashpaca, Josafat runapaj churi, Jehú shuti runahuanmi tuparingui. Paitaca, paipaj huauquicunapaj chaupimandaca, shuj ucuman pushangui. Josafat runapaj taitaca, Nimsi shutimi carca.
3Chaipica, aceitehuan uchilla funduta japishpa, paipaj umapi cashna nishpa talingui: Mandaj Diosca cashnami nin: ‘Ñucami candaca, Israel llactapi jatun mandaj cachun aceiteta talishpa javini’ ninmi ningui. Chai jipaca, na shuyashpa, punguta pascashpa ucha calpamungui” nircami.
4Shina nijpimi, yachajuj profetaca, Galaad llactapi tiyajuj Ramot shuti puebloman rirca.
5Pai chaiman chayajpica, macanajuj runacunata mandajpura tandanajushcami tiyanajushca carca. Chaipi tiyanajujpimi paica:
“Mandajlla, canmanmi shuj villanata charini” nirca.
Shina nijpimi, Jehú shuti runaca:
“Tucui ñucanchipuramandaca, ¿maijanmanda villasha ningui?” nirca.
Shina nijpimi paica:
“Mandajlla, canmanmi villana cani” nirca.
6Shina nijpimi, Jehú runaca jatarishpa rishpaca, huasi ucuman yaicurca. Chai ucupimi, profeta runaca, aceiteta talishpa javishpa, cashna nijurca:
“Israelcunata Mandaj Taita Diosca, cashnami nin: ‘Mandaj Dios Ñucami, Ñuca agllashca Israelcunapaj jatun mandaj cachun, candaca aceiteta talishpa javini.
7Canda mandaj Acab shuti runapaj huasi ucupurataca, canmi huañuchingui. Chashna rurashpami, Mandaj Dios Ñucapajta rurajcunatapash, Ñuca profetacunatapash huañuchishcamandaca, randi cambash huañuchingui. Paicunataca, Jezabel shuti paipaj huarmimi, huañuchinajuchun mandarca.
8Acab runapaj huasi ucupuracunaca, tucuillami huañunga. Chashnami Israelpurapica, gañan cajpi, na gañan cajpipash, Acab runapaj huasi ucupurataca, tucuilla jaricunata tucuchisha.
9Acab runapaj huasi ucupurataca, Nabat runapaj churi Jeroboam runapaj huasi ucupuratashna, Ahías runapaj churi Baasa shuti runapaj huasi ucupuratashnami tucuchigrini.
10Jezabel huarmitaca, Jezreel shuti pambapimi alcucuna micunga. Pai huañujpica, pipash na pambangachu’ ninmi” nijurcami.
Shina nishpallami, profeta runaca punguta ñapash pascashpa, ninanda calpai callarirca.
11Chai jipami Jehú shuti runa, paita mandajpajta ruraj runacunapajman llujshimujpi, cashna ninajurca:
“¿Imapash tiyanllu? Chai juizu illaj runaca, ¿imapata shamushca?” ninajurcami.
Shina nijpimi Jehú shuti runaca, cashna nirca:
“Chai runataca, cangunallata rijsinguichimi. Pai imata nishcatapash yachanguichimi” nircami.
12Shina nijpimi paicunaca:
“Llullajunguimi. Pai ima nishcatapash, cunanda villailla” ninajurca.
Shina nijpimi paica:
“Cashnami nihuarca: Mandaj Diosca, ‘Ñucami candaca, Israelcunata jatun mandaj cachun aceiteta talishpa javini ninmi’ nihuarcami” nircami.
13Shina nijpimi, paicunapaj jahualla churajunata ucha llujchishpaca, Jehú shuti runa tiyarichun, mandangapa tiyarinapi churanajurca. Chashna rurashca jipami, cornetata huacachishpa: “Jehú shuti runami jatun mandaj” ninajurca.
Jehú shuti runa, Joram shuti runata huañuchishcamanda14Nimsi shuti runapaj churica Josafat shuti runami carca. Josafat runapaj churica Jehú shuti runami carca. Jehú shuti runami Joram shuti runata huañuchingapa, Israelcunahuan tandanajushpa pacalla parlanajurca. (Joram shuti runaca, Siria llactata jatun mandaj Hazael runa ama yaicumuchunmi, Galaad llactapi tiyajuj Ramot shuti pueblotaca, tucuilla Israelcunandi ali ricunajurca.
15Chugrishcata jambiringapami, jatun mandaj Joram shuti runaca, Jezreel puebloman cutin tigrashca carca. Paitaca, Siria llactata jatun mandaj Hazael runahuan macanajujujpimi, Siria llacta gentecuna chugrichishca carca). Chaimandami Jehú shuti runaca, cashna nirca: “Cangunata jatun mandaj cachun munashpaca, cai pueblomanda pacalla llujshishpa, Jezreel pueblopi pipash villagrichunga, na saquinachu canguichi” nircami.
16Joram shuti runaca, chai pueblopi chugrihuan huañunalla cajpimi Jehú shuti runaca, caballopi tiyarishpa, Jezreel puebloman rirca. Joram shuti runata ricungapa rishcami, Judá llactata jatun mandaj Ocozías runapash, chai pueblopi carca.
17Jezreel pueblo torre jahuamanda chapashpa shayajuj runaca, ashtaca macanajuj runacunahuan Jehú shuti runa shamujujta ricushpami:
“Ashtaca runacunami macanajungapa shamunajuj ricurin” nirca.
Shina villajpimi Joram shuti runaca, cashna nirca:
“Paicunata rijsichun, shuj macanajuj runata caballopi cachai. Shinallata: ‘¿Alipajchu shamujungui?’ nishpa tapuchun cachai” nircami.
18Chashna cachajpimi, caballopi tiyarishca macanajuj runaca:
“Jatun mandajca, cashnami nin: ‘¿Alipajchu shamujungui?’ nishpa tapuchunmi cachamun” nirca.
Shina nijpimi Jehú shuti runaca:
“Canga, ¿imapata chaitaca tapujungui? Ñucahuan tandanajuj shamui” nirca.
Torre jahuamanda chapashpa shayajuj runa chaita ricushpami:
“Tuparingapa rij runaca, paicunapajman chayashpalla na tigramunllu” nishpa caparijurca.
19Chaimandami, caballopi richun shuj runata cutin cacharca. Chai runa paicunapajman chayashpami:
“Jatun mandajca, cashnami nin: ‘¿Alipajchu shamujungui?’ ninmi” nirca.
Shina nijpimi Jehú shuti runaca:
“Canga, ¿imapata chaitaca tapujungui? Ñucahuan tandanajuj shamui” nirca.
20Torre jahuamanda chapashpa shayajuj runa chaita ricushpami, cutinllata cashna nirca:
“Paipash paicunapajman chayashpalla, cutinga na tigramunllu. Ninanda shamujuj chai runaca, Nimsi shuti runapaj churi Jehú shuti runashnallami, ninandapacha shamujun ricurin” nirca.
21Shina villajpimi, Joram shuti runaca:
“Ñuca carretata, caballocunapi huataichi” nirca.
Paipaj carretata caballocunapi ña huatajpimi, Israel llactata jatun mandaj Joram shuti runapash, Judá llactata jatun mandaj Ocozías runapash, paicunapaj carretapi llujshishpa, Jehú shuti runata tuparingapa rirca. Paitaca, Jezreel pueblomanda Nabot runapaj pambapimi tuparigrirca.
22Joram shuti runaca, Jehú shuti runata ricushpaca:
“¿Alipajchu shamungui, Jehú?” nijpimi. Jehú shuti runaca cashna nirca:
“Cambaj mama Jezabel ninanda huainayashpa, brujucunata tapugrishpa causajpica, ¿maitata ali causaica tiyangayari?” nircami.
23Shina nijpimi Joram shuti runaca, caballota tigrachishpa pacajushpa calpashpaca, Ocozías runataca:
“¡Ocozías runaca, ñucanchitaca umachishcamari!” nirca.
24Chashna nishpa calpajpimi, Jehú shuti runaca paipaj arcota chutashpa flechata cacharirca. Chai flechami, Joram shuti runapaj huashapi chayashpa, paipaj shunguman yalirca. Chaimandami, paipaj carretapillata huañurca.
25Chai jipami Jehú shuti runaca, paipaj macanajuj runacunata mandaj Bidcar shuti runataca, cashna nirca:
“Cai Jezreel shuti pueblomanda Nabot shuti runapaj pamba manñaman apashpa shitai. Paipaj taita Acab shuti runapaj macanajuj runacunandi, cambash, ñucapash rinajujpi, cashna tucunata, Mandaj Dios villashcataca yarinami cangui. Paica:
26‘Mandaj Dios Ñucami, Nabot runapaj yahuartapash, paipaj churicunapaj yahuartapash caina ricurcani. Can japina cashcataca, chai pushtupillatami cusha’ nircami Mandaj Diosca. Shina cashcamanda cunanga, Mandaj Dios nishcashnallata Joram shuti runataca, Nabot runapaj pambapi shitagri” nircami.
Jehú shuti runa, Ocozías shuti runata huañuchishcamanda(2 Crón. 22:7-9)27Chashna huañuchishcata ricushpami, Judá llactata jatun mandaj Ocozías shuti runaca, huerta chaupipi tiyaj huasiman rina ñanda pacajushpa calpajurca. Chashna calpajujpimi, Jehú shuti runaca:
“¡Paitapash carretapillata huañuchishpa saquichi!” nishpa catijurca.
Chaimandami, Ibleam shuti puebloman chayanallapi tiyaj, Gur shuti lomata vichai rijujpi chugrichirca. Ocozías runaca, Meguido shuti pueblomanmi pacajushpa calparca. Ashtahuangarin chaipimi huañurca.
28Chaipi huañujpimi paipajta rurajcunaca, Jerusalenman shuj carretapi apashpa paitaca, paipaj ñaupa taitacunata pambashcapillata, Davidpaj pueblopi pambarca.
29Acab runapaj churi Joram shuti runaca, Israel llactataca chunga shuj huatata ña mandajujpimi Ocozías runaca, Judá llactata mandai callarirca.
Jezabel huarmi huañushcamanda30Chai jipami Jehú shuti runaca, Jezreel puebloman shamurca. Chaita yachashpami, Jezabel shuti huarmica, paipaj ñavita tinirishpa, paipaj umatapash aliguta alichirishpa, ventanamanda chapajurca.
31Jehú shuti runa punguta ña yaicujpica:
“Cambaj jatun mandajta huañuchij runa, ¿alillachu cangui?, canga Zimri shuti runashnami cangui” nirca.
32Shina nijta Jehú shuti runa uyashpami, ventanata vichai ricushpaca:
“¿Pita ñucahuan tandanajungapa munanguichi?” nijpica, eunuco runacunaca ishcaichu, quimsachu imachari, paitaca runata urai chaparca.
33Paicunatami Jehú shuti runaca:
“Chai huarmita alpaman shitamuichi” nijpi paicunaca, alpaman shitamurca.
Chashna shitajpimi, chai huarmipaj yahuarca, ashaca pataman, ashaca caballocunapajman zimbrarca. Chaipillatami paitaca caballohuan saruchirca.
34Chai jipami Jehú shuti runaca, ucuman yaicurca. Ña micushca, ufiashca jipami cashna nirca:
“Ninanda na alicachi tucushca, chai huarmita apashpa pambagrichi. Imashna cashca cashpapash, jatun mandajpaj ushillatami” nirca.
35Paicuna pambashun yashpa apangapa rijpica, chai huarmipaj uma tulluhuan, chaqui tullucunahuan, maqui tabla tullucunahuanllami tarirca.
36Tigrashpa paicuna chaita villajpimi Jehú shuti runaca, cashna nirca:
“Taita Diosca, Tisbe shuti pueblomanda, Paipajta ruraj Eliasmanmi, cashna villashca carca: ‘Jezreel pueblo pambapimi, Jezabeltaca alcucuna micunga.
37Jezabel huarmipaj cuerpoca, cai pacha alpapica, yanga huanushnami Jezreel pueblo pambapica siringa. Chaimandami paitaca: Caica, Jezabel huarmimi nitaca, pipash na ushanajunga’ nishpami villashca carca” nircami.
Who We AreWhat We EelieveWhat We Do
2025 by iamachristian.org,Inc All rights reserved.
