1Mandaj Dioslla,
ñucata fiñajcunahuan, Can shayaripailla.
Ñucata llaquichingapa munajcunahuan macanajupailla.
2Jarcarina jatun escudotapash, uchilla escudotapash japipailla.
Ñucata yanapangapa jataripailla.
3Ñucata catiriyashpa llaquichijcunataca,
huañuchina jirruta japishpa shayaripailla.
Ñucataca: “Ñucami, canda quishpichij cani” nihuailla.
4Ñucata huañuchingapa munajcunaca,
pingai tucushpa pandachi tucushca cachun.
Ñucata na alita rurachingapa munajcunaca,
pingai tucushpa huashaman tigrachi tucushca cachun.
5Paicunaca, huaira apanalla jupashna cachun.
Mandaj Diospaj angelpash llaquichingapa catiriyajuchun.
6Paicunapaj ñambash, llushpishpa urmanalla, yana yana cachun.
Mandaj Diospaj angelpash, catiriyashpa llaquichijuchun.
7Yangamandami, ñuca huashajuchun utujupi, linllita pacalla churanajurca.
Yangamandami, ñuca huashajuchun utujuta ruranajurca.
8Paicunataca, cungashcapi llaqui japishpami ali canman.
Paicuna pacalla churashca linllipillata japi tucushpami ali canman.
Chaipi urmashpa, ninanda llaquichi tucushpami ali canman.
9Chashna rurajpica, Mandaj Dioshuanmi ninanda cushijunga.
Ñucaca, Pai quishpichijpimi cushijusha.
10Tucui ñuca tullucunapashmi, cashna ninajunga:
“Mandaj Dioslla,
¿pita Canshnaca tiyangayari?
Llaquipi causajta, ninan shinlli runa llaquichijujmanda
¿pita Canshnaca cacharichinga?
Imagutapash na charijcunata quichushpa llaquichijcunamandaca,
¿pita quishpichinga?” ninajungami.
11Llullashpa juchachij, na alita ruraj runacunami jatarinajun.
Ñuca na yachashcatami tapuchinajuhuan.
12Paicunaca alita rurajpipash, na alitami tigrachinajun.
Chashna rurashpami llaquichinajuhuan.
13Shina cajpipash, paicuna ungushca cajpica, cañamutami churajurcani.
Ninandapacha llaquirishpami, micuitapash na micushpa ñuca shungupi mañajurcanilla.
14Ñuca cumbamandashna, ñuca huauquimandashnami llaquirishpa purijurcani.
Mama huañujpi llaquihuan cashpa churajunata churajushcashnami llaquirijurcani.
15Ashtahuangarin paicunaca, llaquita ñuca apajujpica, cushijushpami tandanajurca.
Ñucata fiñaj, na ali gentecuna tandanajujpimi,
ñucaca imatapash na yachai usharcani.
Ñucataca fitishpa tucuchinshnami llaquichihuarca.
16Uyanayaita llullashpa parlajcunashna,
na cazushpa asishpa umachijcunashnami, quirutapash canirishpa ñucataca fiñahuarca.
17Jatun Dioslla,
¿ima punllacamanda cashna cachun saquigringui?
Ñuca causaita tucuchigrinajun leongunapaj shimimanda, quishpichihuayari.
18Canmandaca, jatun tandanajuipimi villajusha.
Candaca, tauca gentecunapaj chaupipimi alicachijusha.
19Yangamanda ñucata fiñajcunaca, ama cushijunajuchun.
Yangamanda na ricunayachij runacunaca, ama ñavita sipuchishpa asinajuchun.
20Paicunaca, ali causaimandaca na villanllu.
Na jariyashpa causajcunata, fiñashpa umachishpa villanatami yarinajun.
21Shimi cacharishcata rimashpami:
“¡Ja jai, ñucanchi ñavihuanmi ricushcanchi!” ninajun.
22Mandaj Dioslla,
chaita ricushpaca ama upalla saquiripaichu.
Jatun Dioslla,
ñucamanda ama anchuripaichu.
23Ñucamanda shayarishpa, alita rurapayari.
Ñuca Taita Dioslla,
ñucata Mandajlla, ñucamanda shayaripayari.
24Ñucata Mandaj Taita Dioslla,
imata cuna cashcatapash, aligutapacha ricushpa cuhuayari.
Ñuca llaquita ricushpa cushijuchunga, ama saquihuaichu.
25Paicunapaj shungupica: ¡Ja jai, ñucanchilla!
¡Paitaca chashna tucuchunmi munarcanchi! nishpa ama cushijunajuchun.
26Ñucata llaqui japijpi cushijujcunaca, pingai tucushpa, muspachij tucushca cachun.
Ñucata fiñashpa jariyajcunaca, pingai tucushpa, muspachij tucushca cachun.
27Ashtahuangarin, alita ñuca rurajujta yachajcunaca cushijushpa candanajuchun.
Paicunaca: “Mandaj Diosca, causaita causaicaman jatunyachi tucushca cachun.
Paica, Paipajta rurajtaca aliguta causachunmi munan” ninajuchun.
28Ñuca shimihuanga, Can alitalla rurashcatami villajusha.
Tucui punllacunami, candaca alicachijusha.
Who We AreWhat We EelieveWhat We Do
2025 by iamachristian.org,Inc All rights reserved.
