1Ñuca agllashca gentecuna, Ñuca mandashca shimicunata uyaichi.
Ñuca rimashca shimicunataca, alimi uyana canguichi.
2Ali yachajushca shimicunatami rimagrini.
Ñaupa huatacunamanda, pipash na yachashca shimicunatami rimagrini.
3Chaicunata uyashpami, ali yachajushcanchi.
Ñucanchi taitacunami, chaicunataca villashca.
4Chaicunataca ñucanchi huahuacunaman na pacashpami villagrinchi.
Jipa miraicunamanmi, Mandaj Diosta alicachinataca villagrinchi.
Shinallata, ninan ushaihuan juyailla rurashcatapashmi villagrinchi.
5Paimi, Jacobpaj mirai Israelcunaman mandashca shimicunata cushca.
Ñucanchi ñaupa taitacunamambash,
paicunapaj huahuacunaman villachunmi mandarca.
6Jipa miraicunamanbash, ashtahuan cati miraicunamanbash villachunmi mandarca.
Paicunapash, paicunapaj huahuacunaman villachunmi mandarca.
7Taita Diosta yariashpa causachunmi chaitaca curca.
Taita Dios imata rurashcatapash, ama cungachunmi curca.
Pai mandashcacunataca cazushpa causachunmi curca.
8Cangunaca, na cangunapaj ñaupa taitacunashna causanachu canguichi.
Paicunaca shinlli shungu gentecunamanda miraicuna cashpami, na cazushpa causarca.
Chai gentecunaca, ali causangapaca na munaj gentecunapaj miraicuna cashpami, na cazushpa causarca.
Paicunaca, Taita Diosta cazungapaca napacha munarcachu.
9Efrainbaj miraicunaca arcocunata, flechacunata charishpapash,
macanajui punllapica, pacajushpami calparca.
10Taita Dioshuan ari nishcataca, na pactachircachu.
Pai mandashca shimicunata cazushpa causangapaca na munarcachu.
11Ashtahuangarin, Pai imatalla rurashcatapash,
ninan ushaihuan imata juyailla rurashcatapash cungarcallami.
12Paicunapaj ñaupa taitacunapaj ñaupajpimi, tucuita juyailla rurarca.
Chaicunataca, Egipto llactapi tiyajuj Zoán shuti pambapimi rurarca.
13Mama cucha chaupitami, paicunataca chimbachirca.
Yacuca chaupirishpami, jarcarishpa caiman chaiman saquirirca.
14Punllacunaca, fuyumi pushajurca.
Tutacunaca ninahuan punchayachishpami pushajurca.
15Jichushca pambapica, jaca rumicunata chaupishpami,
ashtaca yacuta llujchishpa ufiachirca.
16Jaca rumimanda, ashtaca yacuta llujchijpimi,
huaicu yacushna urai rijurca.
17Ashtahuangarin, cutin juchata rurashpami, Diosta fiñachinajurca.
Jichushca pambapica, Jahua pachapi Taita Diostami na cazunajurca.
18Chashna cashpami, Diosta fiñachingapa yarinajurca.
Paicuna munashca micunata mañashpami fiñachinajurca.
19Diosta fiñashpami, paicunaca:
“¿Cai jichushca pambapica, Diosca imashnashi micunata caranga? ninajurca.
20Jatun rumita faquijpimi, yacucunaca llujshirca.
Chai yacucunaca, pambacunapimi jundarca.
¿Tandatapash carai ushangachu imashi?
Pai agllashcacunaman carangapaca, ¿aichatapash charingachu imashi?” ninajurcami.
21Chashna ninajujta Mandaj Dios uyashpami, ninanda fiñarirca.
Jacobpaj miraicunahuanga ninandami fiñarirca.
Israelcunahuanga, ninandami fiñarirca.
22Taita Diostapash na crinajurcachu.
Pai quishpichij cashcatapash na crircachu.
23Shina cajpipash jahuamandami, fuyuta cachamurca.
Jahua pacha pungucunatapash pascarcami.
24Paicuna micunajuchunga, maná shuti tandata tamiachirca.
Jahua pachamanda trigotami, caramurca.
25Runacunaca, angelcunapaj tandatami micunajurca.
Na ushangacamanmi micunajurca.
26Indi llujshimujmanda huairata cachamurca.
Paipaj ninan ushaihuanmi, uramanda huairatapash cachamurca.
27Ñutu alpatashnami aichataca paicunaman tamiachimurca.
Alasyu animalcunatami, mama cucha manñapi illul alpatashnami cachamurca.
28Chai animalcunataca, paicuna causanajuj pushtumanmi cachamurca.
Carpa muyundicunapimi urmachimurca.
29Chaicunataca, na munajtami micunajurca.
Paicuna munashcatami, Diosca pactachirca.
30Chashna cashpapash, paicunaca ashtahuanmi munanajurca.
Paicunapaj shimipi micunata charinajujpillatami,
31Taita Diosca ninandapacha fiñarirca.
Chashna cashpami, ashtahuan shinlli runacunata huañuchirca.
Pai agllashca Israelcunatami huañuchirca.
32Chashna llaquichijpipash, ashtahuanmi juchata ruranajurca.
Dios tucuita juyailla rurashcatapash, na alicachircachu.
33Shinamandami, llaquita apanajushpa huañuchun saquirca.
Ninan llaquita apashpa huañuchunmi saquirca.
34Chai llaquicuna shamujpimi, Diostaca mascai callarirca.
Paicunaca ninandami Diostaca mascanajurca.
35Taita Diosca, paicunata huacaichij cashcatami yarinajurca.
Jahua pachapi causajuj ninan ushaita charij Taita Dios cashcatami yarinajurca.
36Ashtahuangarin paicunaca, jahua shungulla cashpami,
shimihuanga ninanda llullanajurca.
37Paicunapaj shunguca, Dioshuanga napacha alichu carca.
Paihuan ari nishcatapash, napacha pactachircachu.
38Ashtahuangarin Diosca, ninanda juyashpa,
paicuna na alita rurashcata perdonashpami, na huañuchishpa tucuchirca.
Diosca ninanda fiñarishpapash, na tucuillata tucuchircachu.
Shina cashpami, paicunataca na tucuchirca.
39Paicunataca, huañuna aichayuj gentecuna cajtami yarirca.
Causana samai llujshishpa, cutinga na tigramuna cajtashnami yarirca.
40¡Chaquishca pambapica, Diostaca cutin cutin na cazunajurca!
Jichushca pambapimi, Diostaca fiñachinajurca.
41Taita Diostaca, paicuna munashcata rurachunmi mañanajurca.
Israelcunaca, jucha illaj Diostami, ninanda fiñachinajurca.
42Paipaj ninan ushaitaca na yarinajurcachu.
Llaquipi causanajushcamanda llujchishcatapash, na yarinajurcachu.
43Egipto llactapi, ninan ushaihuan imatalla rurashpa ricuchishcatapash na yarinajurcachu.
Zoán shuti pambapi, imatalla juyailla rurashcatapash na yarinajurcachu.
44Jatun yacucunataca yahuarmanmi tigrachirca.
Ninanda rijuj yacucunata pipash ama ufiachunmi chashna rurarca.
45Ninan millai chuspicuna llaquichinajuchunmi cachamurca.
Sapocunatapashmi llaquichinajuchun cachamurca.
46Granocunata micushpa tucuchinajuchunmi, polilla jurucunata cachamurca.
Tarpushca pambacunapipash, langosta jurucunami micunajurca.
47Paicunapaj uva chagracunataca, runduhuanmi tucuchirca.
Higo yuracunatapash, cazahuanmi tucuchirca.
48Paicunapaj animalcunataca, runduhuanmi llaquichirca.
Paicunapaj huagracunataca, rayuhuanmi tucuchirca.
49Egiptopi causajcunata, ninanda fiñashpami llaquichirca.
Ninandapacha fiñarishpami, paicunataca llaquichirca.
Huañuchij angelcunata cachamushpami llaquichirca.
50Paicunahuanga ninandapachami fiñarirca.
Paicunataca, huañunamandaca na quishpichircachu.
Ashtahuangarin, huañuchun saquircallami.
51Egipto llactapica, punda huacharishca huahuacunataca, tucuillatami huañuchirca.
Cam shuti runapaj miraicunapaj punda churicunataca,
paicunapaj huasipillatami, tucuillata huañuchirca.
52Pai agllashcacunataca, llamacunata corralmanda llujchijshnami, pusharca.
Paicunataca, chaquishca pambacunatami, ashtaca llamacunatashna pusharca.
53Imatapash ama manllanajuchunmi, Paipaj ushaihuan aliguta pushajurca.
Paicunata fiñajcunataca, mama cuchami quilparca.
54Pai agllashca gentecunataca, paicunaman carasha nishca llacta manñacamanmi pushamurca.
Paipaj ninan ushaihuan mishashpami, cai urcuman pushamurca.
55Chaipi causajcunataca Israelcuna ricujtami, llujchishpa cacharca.
Chai jipaca, huascahuan tupushpami, alpacunataca chaupishpa curca.
Chai runacuna causanajushca alpacunataca, Israel ayllucuna causanajuchunmi curca.
56Paicunaca, jahua pacha Taita Diostami na cazushpa fiñachinajurca.
Pai mandashca shimicunatapash, na cazunajurcachu.
57Paicunapaj ñaupa taitacunashnami, na cazushpa pandarinajurca.
Flechata shitana arco huaglishcashnami paicunaca tucunajurca.
58Rurashcalla dioscunaman, altarcunata rurashpami fiñachirca.
Imamambash rijchaj dioscunata churashpami, ninanda fiñachirca.
59Chaita ricushpami Diosca fiñarirca.
Israelcunataca, ninandapachami na ricunayachirca.
60Chaimandami, Silo shuti pueblopi tiyajuj Paipaj carpamandaca anchurirca.
Gentecunapaj chaupipi tiyajuj carpamandami anchurirca.
61Paipaj ushaita ricuchijuj carpataca, prezu apachunmi saquirca.
Paipaj ninan ushaita ricuchijuj carpataca, fiñajcunapaj maquipimi saquirca.
62Pai agllashca gentecunataca, espadahuan huañuchinajuchunmi saquirca.
Paipajlla cachun agllashca gentecunatami, ninanda fiñarca.
63Jipa viñaicunataca, ninahuanmi tucuchirca.
Cuitsacuna cazarai punllapi, alicachishpa taquinapash tucurircami.
64Paicunapaj sacerdotecunataca, espadahuanmi huañuchirca.
Sapalla saquirishca huarmicunapash, na huacanajurcachu.
65Chai jipami Jatun Diosca, paicunamanda shayarirca.
Shuj shinlli runa vinota ufiashpa machashcashnami caparirca.
66Paicunata fiñajcunata mishashpami calpachirca.
Tucui causaipi pingai tucushpa causachunmi saquirca.
67Diosca, Josepaj miraicunataca na chasquishpami,
Efrainbaj mirai ayllutaca na agllarca.
68Ashtahuangarin, Judapaj mirai ayllutami agllarca.
Pai juyashca Sion pueblotami agllarca.
69Chaipimi paipaj huasitaca, ninan juyaillata shayachirca.
Causaita causaicamanmi shinllita shayachirca.
70Paipajta rurachunmi Davidtaca agllarca.
Llamacunata michishpa purijujtami agllarca.
71Davidca, chairalla huacharishca llamacunatami michijurca.
Jacobpaj miraicunata michijuchunmi agllarca.
Pai agllashca Israelcunata michijuchunmi pusharca.
72Davidca, Israelcunataca juyai shunguhuanmi michijurca.
Ali yuyaihuan juyashpami michijurca.
Who We AreWhat We EelieveWhat We Do
2025 by iamachristian.org,Inc All rights reserved.
