1Mandaj Diostaca, tucui shunguhuanmi alicachisha.
Alitalla rurashpa causajcunapaj tandanajuipimi alicachisha.
2Mandaj Dios rurashcacunaca jatumbachami.
Chaicunata ricungapa munajcunaca, ninandami mascan.
3Pai rurashcacunaca, punchapamba juyaillapachami.
Alitalla Pai rurashcapash, causaita causaicamanmi canga.
4Paica, na cungai ushanalla, jatun alicunatami rurashca.
Mandaj Diosca ninanda llaquij, ninanda juyajmi.
5Paita cazushpa causajcunamanmi, micunata caramun.
Paicunahuan ari nishcataca, causaita causaicamanmi pactachinga.
6Ninan ushaihuan rurashcacunataca, Pai agllashcacunamanmi ricuchirca.
Llactacunata paicunaman cushpami, chashna ricuchirca.
7Paipaj ushaihuan rurashcacunaca, juyailla, alipacha rurashcacunami.
Tucui mandashcacunaca, pactanapachami.
8Chai mandashcacunataca, causaita causaicaman cazuchunmi churashca.
Tucuita pactachishpa, alitapacha rurashcami.
9Pai agllashcacunata quishpichingapami cachamushca.
Paihuan ari nishcatapash, causaita causaicaman pactachunmi churashca.
Paipaj shutica, jucha illaj, tucuicuna manllana shutimi.
10Alipacha yachajushca cangapaca, Mandaj Diostami manllashpa causana.
Pai mandashcacunata cazushpa causajcunaca, ali yuyaitami charin.
Paitaca, causaita causaicamanmi alicachinga.
Who We AreWhat We EelieveWhat We Do
2025 by iamachristian.org,Inc All rights reserved.
