ISAÍAS 33 - Quichua Imbabura 2016

Mandaj Diosmi quishpichinga

1Shujcunata ninanda llaquichijushpapash, canga na llaquichi tucushpami causarcangui.

Cunanga ¡aij imachari tucungui!

Shujcunata umachijujpipash, candaca pipash na umachishcachu.

Can shuhuashpa llaquichishca jipaca, candapashmi llaquichinga.

Shujcunata can umachishca jipaca, candapashmi umachinga.

2Mandaj Dioslla, ñucanchita llaquihuayari, Candallami shuyarcanchi.

Tutamandaca, Cambaj ninan ushaihuan yanapahuayari.

Jatun llaquipi cajpipash, quishpichihuayari.

3Can rimashpa culun nijpica, gentecunaca pacajungapami calpanajurca.

Can jatarijpica, llactacunapi causajcunaca caita chaitami calpanajurca.

4Imatalla paicuna charishcataca, oruga jurucunatashnami tandachinajunga.

Langosta jurucuna shamushpa tucuchinshnami tucuchinajunga.

5Jahua pachapi causajuj Mandaj Diosca, jatunyachi tucushcami canga.

Paimi, Sion pueblopica aliguta ricushpa mandachumbash,

ali cashcatalla rurachumbash mandashpa saquirca.

6Can mandajui punllacunapica, ali yachajunapash, ali yuyaipash, quishpirinapash tiyangami.

Mandaj Diosta cazushpa causanami, tucuicunapaj alipacha canga.

7Ricuichi, jatun mandajpaj randi parlajcunaca, pungu canllapimi caparinajunga.

Ali causanata villajcunaca, ninandami huacanajunga.

8Ñangunapash jichushca saquirijpimi,

chai ñandaca pipash na purinajunga.

Imata pactachingapa ari ninajushcatapash, na pactachishpami,

pueblocunatapash millanayachishpa, runacunatapash yangapi churanajun.

9Alpapash, ninanda ungushcashnami tucushca.

Líbano urcupi quirucunapash pingai tucunshna, cumurishpami cuchui tucushca.

Sarón shuti pambapash, chaquishca pambashnami tucushca.

Basán shuti, Carmelo shuti urcucunapash, ninandami tucuchi tucushca.

10Mandaj Diosca, cashnami nin:

“Cunanmi jatarigrini,

cunanmi jatumbi churai tucusha,

cunanmi jatunyachi tucusha.

11Cangunaca imata rurangapa yarijushcapash, yangallatami saquirishca.

Cangunapaj samaillatami, ninashna rupachishpa tucuchinga.

12Pueblocunaca, rupashpami tucuringa.

Chaquishca cashacunashnami, ninapi rupachi tucunga.

13Caru llactapi causajcunaca, Ñuca imatalla rurashcata ricuichi.

Cai llactapi causajcunaca, Ñuca ninan ushaita rijsichi” ninmi.

14Juchasapacunaca, Sion pueblopimi manllarirca.

Mishqui shimi jayaj shungucunaca, ninanda manllachijpimi, cashna ninajun:

“Tucuchij ninapica, ¿maijanda causai usharingayari?

Causaita causaicaman rupajuj ninapica, ¿maijanda causai usharingayari?” ninajunmi.

15Ali cashcatalla rurashpa, na llullashpa parlajcunallami, chaipica causai ushanga.

Shinallata, shuhuashpa charijyanataca, na alita rurangapa imatapash pacalla cujpi na japij runallami, chaipica causai ushanga.

Shinallata, pitapash huañuchinajuchun, culquita cusha nijpi na uyanayachij,

ima na alitapash na rurangapa munajcunallami, chaipica causai ushanga.

16Paicunami, jahua pachapi causagringa.

Jatun rumicunahuan rurashca torrecunami, paicuna pacajuna pushtu canga.

Paica, micunatapash, yacutapashmi charinga.

17Cambaj ñavihuanmi, Jatun Mandajtaca, juyailla tiyajujta ricungui.

Paipaj juyailla, jatun llactatapashmi ricungui.

18Manllaihuan causajushcata yarishpami, cashna ningui:

“Quilcaj runaca, ¿imata tucushca?

Impuestota pezashpa japij runapash, ¿imata tucushca?

Ashtahuan ali huasicuna maipi tiyajta yupashpa quilcaj runaca, ¿imata tucushca?” ninguimi.

19Chai jariyashca gentecunataca, na ricunguichu.

Na yachai ushanalla, na rijsishca shimicunata rimaj gentecunataca, na ashtahuan ricunguichu.

20Jatun cushijuicunata ruraj, ñucanchi Sion shuti pueblota ricuichi.

Chai Jerusalenbica, imatapash na manllashpa aligutami causanajunga.

Shayachishca carpatapash, pipash na pascai ushangachu.

Carpata charijuj estacacunatapash, pipash na llujchishpa shitai ushangachu.

Chaipi huatashca huascacunatapash, shujllatapash na fiti ushangachu.

Chaicunataca, cambaj ñavihuanmi ricungui.

21Chaipimi Mandaj Diosca, ñucanchitaca, Paipaj ushaihuan shinlliyachinga.

Chaipica, yacu rijuj jatun huaicu yacucunapashmi tiyanga.

Chai yacucunataca, caspihuan purichina barcocunapash, jatun barcocunapash na purinajungachu.

22Mandaj Diosmi, ñucanchitaca ali ricushpa mandanga.

Mandaj Diosllatami, mandashcacunataca ñucanchiman cunga.

Mandaj Diosmi, ñucanchipaca Jatun Mandaj.

Paillatami, ñucanchitaca quishpichinga.

23Barcota purichij telata charij caspita huatashca huascacunapash chushajyashcami.

Chai telata vichaiman shinlli huataitaca, na ashtahuan usharcachu.

Chaimandami, paicunata fiñajcunata imatalla quichushcacunataca,

suchu runacuna quichushpa chaupirinajunga.

24Chaipi causajcunaca, pipash na: “Ñucaca huañujunimi” ninajungachu.

Sion shuti lomapi causanajuj gentecuna, na alita rurashcataca quishpichingami.