JEREMÍAS 35 - Quichua Imbabura 2016

Recab runapaj miraicuna, ali cazujcuna cashcamanda

1Josías runapaj churi, jatun mandaj Joacim runa, Judá llactata mandajui punllacunapimi, Mandaj Diosca Jeremiasman cashna nishpa villarca:

2“Recab runapaj miraicunapajman rishpa, paicunahuan rimagri. Chai jipaca, Mandaj Dios Ñuca huasipi tiyaj maijan ucumambash pushamushpa, vinota ufiachun carai” nircami.

3Shina nijpimi ñucaca, chai ayllucunamanda Jeremiaspaj churi Jaazaniasta pushangapa rircani. Jeremías runaca, Habasinías runapaj churimi carca. Jaazanías runataca, paipaj huauquicunandi, paipaj churicunandi, Recab runapaj miraicunandimi pushamurcani.

4Paicunataca Mandaj Diospaj huasimanmi pushamurcani. Taita Diospajta ruraj Hanán runapaj churicunapaj ucumanmi pusharcani. Hanán shuti runaca, Igdalías runapaj churimi. Chai ucuca, mandajcunapaj huasi quimiriapimi carca. Chai ucuca, Diospaj huasi pungupi ricuj Maasías runapaj huasi jahuapimi carca. Maasías shuti runaca, Salum shuti runapaj churimi.

5Chaipimi, Recab shuti runapaj miraicunamanga: “Caita ufiaichi” nishpa vinota ñaupajpi churarcani.

6Shina nijpica, cashnami ninajurca: “Ñucanchica, vinotaca na ufiashunllu. Ñucanchi ñaupa taita, Recab runapaj mirai Jonadab runami: ‘Cangunapash, cangunapaj miraicunapash, vinotaca ima punllallapash na ufianachu canguichi nirca.

7Shinallata, huasicunatapash na rurashpa, alpacunapi uvacunatapash na tarpushpa, imatapash na charinachu canguichi. Ashtahuangarin tucui causaipimi, carpacunapilla causana canguichi. Shina causashpami cai llactapica, unaicaman causanguichi’ nishcami.

8Ñucanchica, Recab runapaj churi, Jonadab mandashcatami tucuita pactachishpa causanajunchi. Ñucanchitaca, huarmicunatapash, churicunatapash, ñucanchi ushicunatapash tucui ñucanchi causaipi, vinota ufiachunga na mandarcachu.

9Shinallata ñucanchi causana huasicunata rurachumbash, na mandarcachu. Uva yuracunata tarpuchumbash, alpacunata charichumbash na mandarcachu.

10Ñucanchi ñaupa taita Jonadab imatalla mandashcataca, tucuitami pactachishpa causanajunchi. Shinamandami carpacunapilla causanajunchi.

11Shina cajpipash, cashnami tucurca: Babilonia llactata jatun mandaj Nabucodonosor runa, cai llactaman vichai shamujujpimi ñucanchica: ‘Caldeo macanajuj runacunamanda, Siria llacta macanajuj runacunamanda, Jerusalenbi pacajungapa jacuchi’ nishpa shamurcanchi. Shina shamushpami, Jerusalenbi causanajunchi” ninajurcami.

12Mandaj Diosca, Jeremiasmanga cashna nishpami villarca:

13“Tucuita Mandaj, Israelcunapaj Taita Dios Ñucami, cashna nini: Judá llacta runacunapajman, Jerusalenbi causajcunapajman rishpa, cashna nigri: ‘Cangunaca, Ñuca mandashcacunata cazunataca, ¿nachu yachajuna canguichi?’ ninmi Mandaj Diosca nigri.

14Vinota ama ufiachun, Recab runapaj churi Jonadab mandashcataca, paipaj miraicunapash alipachami pactachinajun. Paicunapaj punda taita mandashcata cazushpami, vinotaca cunangaman napacha ufianajun. Ñucacarin ashtahuan pundamanda yachachijujpipash, cangunaca napacha uyashpami causarcanguichi.

15Cangunaman villachunga, ñucapajta ruraj profetacunahuanmi, pundamandapacha cashna nishpa villajurcani: ‘Cunanga, tucuicuna cangunapaj na ali causaita saquishpa, Ñucapajman tigrarichi. Na alita ruranataca saquishpa, alita ruraichi. Rurashcalla dioscunatapash na catinachu canguichi. Tucui chaicunata saquishpaca, cangunamambash, cangunapaj taitacunamambash, Ñuca carashca cai llactapillatami causanguichi ninmi’ nishpami villajurcani. Ashtahuangarin cangunaca, napacha cazushpami causarcanguichi.

16Recab runapaj churi Jonadab runapaj miraicunaca, paicunapaj ñaupa taita mandashcataca, alipachami pactachinajurca. Ashtahuangarin cangunaca, ñucataca na cazushpami causanguichi ninimi” nijurcami.

17Shinamandami, tucuita Mandaj, Israelcunapaj Diosca cashna nin: “Ñuca rimashcataca, Judá llactapi causajcunapash, Jerusalenbi causajcunapash, napacha uyarcachu. Ñuca rimajpipash na uyarcachu, cayajpipash na tigrachihuarcachu. Chaimandami paicunaman ima llaquicunata Ñuca apamusha nishcataca, tucuita apamugrini ninmi” nircami.

18Jeremiasca, Recab runapaj mirai ayllucunataca, cashnami nijurca: “Tucuita Mandaj, Israelcunapaj Taita Diosca, cashnami nin: ‘Cangunaca, cangunapaj taita Jonadab mandashcataca, tucuitami cazushcanguichi. Tucui imatalla mandashcacunata cazushpami, pai mandashcashnallata chashnatapacha rurashpa causashcanguichi’ ninmi.

19Shinamandami tucuita Mandaj, Israelcunapaj Taita Diosca, cashnatapash nin: ‘Recab runapaj churi Jonadab runapaj miraipuramandaca, punllandi Ñucapajta rurashpa causajca, na illangachu’ ninmi” nijurcami.