APOCALIPSIS 17 - Quichua Imbabura 2016

Huainayaj huarmita ninanda llaquichishcamanda

1Chai jipami, canchis copacunata charinajuj canchis angelcunamanda, shuj ángel shamushpa, cashna nihuarca: “Ashtaca yacu jahuacunapi tiyajuj, huainayashpalla causaj huarmita, imashna llaquichina cashcata ricuchisha, caiman shamui,

2cai pachapi jatun mandajcunaca, chai huarmihuanmi huainayashpa causanajurca. Shinallata, tucui llactacunapi causajcunapash, vinohuan machajshnami, chai huarmihuan huainayashpa causanajurca” nihuarcami.

3Chaita ricushca jipallami, Diospaj Espirituca, jichushca pambaman pushahuarca. Chai pambapimi, yana puca manllanayai animalpaj jahuapi, shuj huarmi tiyajujta ricurcani. Chai animalca, Diosta na ali shimicunata rimajuj shuticuna jundami carca. Shinallata, canchis umacunata, chunga cachucunatami charirca.

4Chai huarmica, morado, yana puca churajunata churajushcami carca. Shinallata, curihuan, juyailla rumicunahuan, perlacunahuambash alichirishcami tiyajurca. Huainayashpa causajushpami, na ricunayai tucui mapacunata, curi copapi jundata charijurca.

5Chai huarmipaj frentepica, pipash na yachai ushanalla shutitami cashna quilcashca tiyajurca: “BABILONIA JATUN PUEBLOCA, HUAINAYASHPA CAUSAJCUNAPAJ, CAI PACHAPI TUCUI NA RICUNAYAI MAPACUNATA RURAJCUNAPAJ MAMAMI” nishcami tiyajurca.

6Chai huarmica, Diospajlla causajcunata, Jesusta catijcunata huañuchishca yahuarhuan machashca tiyajujtami ricurcani. Chaita ricushpaca, ninandapacha manllarishpami ricujurcani.

7Shina manllarijpimi angelca, cashna nihuarca: “¿Imashpata manllaringui? Canchis umata, chunga cachuta charij, manllanayai animal ima cajtapash, chai animalpaj jahuapi tiyajuj huarmi ima cajtapash ñucami canman villagrini.

8Can ricujushca manllanayai animalca causarcami, cunanga illanmi. Paica, chingaita chingagringapami, manllanayai ucu ucumanda llujshimugrijun. Cai pachata churashca punllamandapacha, caipi causajcunapaj shuticunata, causaita causana libropi na quilcachishcacunaca, chai manllanayai animalta rucushpami ninanda manllarinajunga. Chai animalca causajurcami, cunanga illanmi, cutinmi tigramunga.

9Caitaca, ali yachajushcacunallami yachai ushan: Chai canchis umacunaca, canchis urcucunami. Chai jahuacunapimi, chai huarmica tiyajun.

10Shinallata, canchis jatun mandajcunapashmi, paicunapuramanda pichaca ña urmashca. Shujca cunambi mandajunmi, shujca nara shamunllu. Pai shamushpaca, ashacamanllami mandai ushanga.

11Chai manllanayai animalca, pundaca causajurcami, cunambica illanmi. Paica canchispaj cati mandaj cashpapash, chingaita chingaimanmi rijun.

12Shinallata, can ricujushca chunga cachucunaca, chunga jatun mandajcunami. Paicunaca, mandana ushaitaca nara japinllu. Paicunami, chai manllanayai animalhuanga, ashacamanlla mandana ushaita japinajunga.

13Chai chunga mandajcunaca, shujlla yuyai tucushpami ushaitapash, mandanatapash, chai manllanayai animalman cunga.

14Llamaguhuanmi paicunaca macanajunga, shina cashpapash, Llamagumi mishanga. Paica, mandaj taitacunapaj Mandajmi, jatun mandajcunata Jatun Mandajmi. Paihuan causajcunaca, Dios cayashpa agllashcacuna cashpami, Paita aliguta cazunajun” nihuarcami.

15Shinallata chai angelca, cashnatapashmi nihuarca: “Chai huainayaj huarmitaca, yacupi tiyajujtami ricurcangui. Chai yacucunaca, ashtaca ashtaca gentecuna, llactacuna, shuj shuj shimita rimaj gentecunami.

16Can ricushca manllanayai animalpaj chunga cachucunaca, chai huainayaj huarmita millanayachishpami, jichushpa lluchullata saquinga. Paitaca micushpami, puchutaca ninapi rupachinga.

17Taita Diosca, Pai munashcata pactachingapami, chai yuyaita paicunaman curca. Pai rimashca shimicuna pactangacamanmi, shujlla yuyai tucushpa, paicuna mandajushcataca, chai manllanayai animalman cuchun saquirca.

18Can ricujushca huarmica, jatun pueblotami ricuchijun. Chai pueblomi, cai pachapi tiyaj jatun mandajcunataca mandajun” nihuarcami.