1 CORINTIOS 3 - Quichua Imbabura 2016

Diospajta rurajcunami canchi

1Juyashca crijcuna, cangunaca, huahuacunashna Cristomandaca nara ali yachajui ushashpa, aicha munaitara ruranajujpimi, Diosmanda shinllita yachachitaca na usharcani.

2Shinlli micunata nara micui ushajshna cajpimi, chuchujuj huahuacunamajshna yachachijurcani. Nara shinlli micunata micui ushajcuna cashpami, cunangamanbash nara yachajui ushanguichi.

3Cunangamanmi aichapaj munaitara ruranajunguichi. Shina cashpami, “canga shujpajmi cangui” nirinajushpa, ñapash fiñanajushpa, shicanyarinajunguichi. Shina cashpaca ¿nachu na crijcunashnallata, cangunapaj munaitara rurashpa causanajunguichi?

4Chashna cashpami shujcunaca: “Ñucami, Pablota catij cani”. “Ñucami, Apolosta catij cani” ninajunguichi. Chashna ninajushpaca, ¿nachu cangunapaj aicha munashcata ruranajunguichi?

5Apolospash, Pablopash, ¿imata canchiyari? Apunchi Jesuspajta rurajcunallamari canchi. Imatalla rurai ushanata ricushpa carajpi, chai ushaihuan villajpimi crij tucurcanguichi.

6Ñucami, tarpujshna villajurcani. Apolosca, yacuta churanshnami yachachijurca. Ashtahuangarin, Taita Diosmi, viñachijshna mirachijun.

7Shina cashpami, tarpujpash, yacuta churajpash, imapash na canchi. Ashtahuangarin, viñachij Taita Diosllami tucuita rurajun.

8Tarpujpash, yacuta churajpash, chashnallata cajpimi, imata rurashcata ricushpa carajpi tucuicuna japinajushun.

9Ñucanchica, Taita Dios mandashcata rurajcunallami canchi. Cangunaca, Taita Dios tarpujun pambashnami canguichi. Shinallata Taita Dios huasichijuj huasishnami canguichi.

10Taita Dios ninanda juyajpimi, huasichinata ali yachaj runa huasichijshna villai callarircani. Ñuca callarichishca jahuapica, shujmi huasichijshna catijun. Shina cashpaca, imashna rurajushcata ricushpa tucuicuna catichun ninimi.

11Huasita shayachingapa callarina shuj rumita churaitaca pipash na ushanachu, chai rumica Jesucristollami.

12Callaringapa churashca cai Rumi jahuapica, maijan cashpapash, curihuan, culquihuan, juyailla rumicunahuan, caspihuan, jupahuan, fangacunahuanmi huasichinajunga.

13Chaicunata, tucuicuna imashna rurashcatapash ricunallami canga. Huasichij runa imashna rurashcataca, shamui punllapimi ninahuan rupachishpa ricuchijunga. Tucuicuna imashna rurashcatapash, ninami ricuchijunga.

14Maijan cashpapash, pai imata rurashca na rupajpica, pai japina cashcatami japinga.

15Ashtahuangarin, maijan imata rurashcapash rupajpica, paipaj rurashca yanga cajpimi imatapash na japinga. Paillami, rupajuj ninamanda llujshijshna quishpiringa.

16Cangunaca, Taita Diospaj huasi cashcataca, ¿nachu yachanguichi? Taita Diospaj Espíritu cangunapi causajujtaca ¿nachu yachanguichi?

17Taita Dios causajuj huasita maijambash tucuchijpica, Taita Diosmi paitapash tucuchinga. Taita Dios causajuj huasica, Diospajllami. Chai huasica, cangunallatami canguichi.

18Cangunallataca, na pandarinachu canguichi. Maijan cashpapash, cai pachapi “ñucami ali yachani” yajushpapash, na yachanshnallami cana canguichi. Ali yachajushcacuna cangapami chashna cana canguichi.

19Cai pachapi imata ali yachajushcapash, Taita Diospaj ñaupajpica yangallatami. Quilcashcapica cashnami nijun: “Paicunapaj yachajushcapillatami Taita Diosca pandachishpa urmachijun” nijunmi.

20Cutinmi cashnatapash nijun: “Runacunapaj yuyaicunataca,

yangalla cajtami Mandaj Diosca ricujun” nijunmi.

21Tucui imapash cangunapajlla cajpimi, gentecunalla rurashcahuanga na jariyana canguichi.

22Shina cajpimi, Pablopash, Apolospash, Cefaspash, cai pachapash, causaipash, huañuipash, cunan punllacunapash, shamui punllacunapash, tucuillami cangunapaj.

23Cangunaca, Cristopajmi canguichi. Cristoca, Taita Diospajmi.