NÚMEROS 6 - Quichua Imbabura 2016

Nazareocuna imatalla ruranamanda

1Mandaj Diosmi, Moisestaca cashna nijurca:

2“Israelcunataca cashna nishpa mandangui: ‘Maijan jari cashpa, huarmi cashpapash, Mandaj Diospajtalla rurashpa causasha nishpaca,

3vinotapash, sidratapash napacha ufiangachu. Vinomanda, sidramanda rurashca vinagretapash, uvata cutashpa llujchishca jayaj vinotapash napacha ufiangachu. Shinallata, chaira pallashca uvatapash, chaquichishca uvatapash napacha micungachu.

4Nazareo tucushca punllacunapica, uva yuracunamanda llujshishcacunataca, imatallapash na micungachu. Muyutapash, caratapash na micungachu.

5Nazareo tucushca tucui punllacunapica, paipaj uma ajchataca napacha rutuchingachu. Mandaj Diospajlla causangapa shicanyachishca punllacunapica, Diospajlla causajushpami, ajchatapash viñachun saquinga.

6Mandaj Diospajlla shicanyachishca punllacunapica, huañushcacunataca napacha tacari ushangachu.

7Taita cashpa, mama cashpa, huauqui cashpa, pani cashpa, maijan huañujpipash napacha tacari ushangachu. Taita Diospajta rurachun shicanyachishcataca, paipaj uma ajchami ricuchijunga.

8Nazareo tucushca punllacunapica, Mandaj Diospajlla shicanyachishcami canga.

9Maijan cashpapash, cungashcapi quimiria caj huañujpica, Diospajlla tucushcata ricuchijuj paipaj uma ajchapash mapayashcami canga. Chaitaca mapa illaj tucujuita pactachishpami, canchis punllapica uma ajchata ruturinga.

10Pusaj punllapica, ishcai urpita, na cashpaca ishcai palomata apamushpami, Dioshuan tuparina jatun carpa pungupi sacerdoteman cunga.

11Chai animalcunataca, sacerdotellatami, shujtaca juchamanda Diosman cushpa, caishujtaca tucuillata Diosman cushpa rupachijunga. Huañushcata tacarishca juchamandami, Diosman ofrendata cushpa, chai punllapica paipaj ajchataca, Diospajlla cachun cutin viñachun saquinga.

12Shinallata, shuj huatata charij jari llamaguta, Mandaj Diosman cushpami, cutin nazareo tucushpa Diospajta rurangapa callaringa. Chaipaj pundalla nazareo cashpa, imata rurajushcapash, pai mapayashcamandami yangapi saquiringa.

13Diospajtalla rurangapa shicanyarishca punllacunata pactachishpaca, cai mandashcacunatami ruranata charin: Dioshuan tuparina jatun carpa punguman shamushpaca,

14shuj huatata charij, ali llamata Mandaj Diosman ofrendata cujpimi, tucuillata rupachinga. Shinallata shuj huatata charij, imapash na tucushca maltun huarmi llamatami, juchamanda cunga. Shinallata Dioshuan ali cangapaca, imapash na tucushca ali jari llamatami cunga.

15Shinallata, ashtahuan ali jacuta aceitehuan chapushpa masashcatapashmi, levadura illaj tandata rurashpa, canastapi apamunga. Levadura illajta rurashca jamzi tortillacunatapash, aceitehuan javishpami apamunga. Chai tucuilla caranacunataca, talina vinohuanmi canastapi apamunga.

16Juchamanda cushca ofrendatapash, animalta Diosman cushpa tucuillata rupachinatapash, sacerdotemi Mandaj Diospaj ñaupajpi tucuita rurajunga.

17Mandaj Dioshuan ali cangapa carashca jari llamataca, canastapi churashca levadura illaj tandacunandimi Diosman cunga. Shinallata sacerdotellatami, ofrendatapash, talina vinotapash Diosman cunga.

18Chai jipami, Diospajtalla rurangapa shicanyarishca runaca, Diospajlla viñachishca ajchataca, Dioshuan tuparina jatun carpa pungupi rutuchinga. Chai ajchataca, Dioshuan ali cangapa cushcata rupachijuj nina jahuapimi churashpa rupachinga.

19Chai jipami, jari llamapaj rigra aicha yanushcatapash, canastamanda levadura illaj shuj tandatapash, levadura illaj shuj jamzi tortillatapash, sacerdotellata japishpa, Diospajtalla rurangapa shicanyarishca runapaj maquipi churanga. Diospajlla viñachishca ajchata rutuchishca jipami chashna ruranga.

20Chaicunataca sacerdotemi, Mandaj Diospaj ñaupajpi vichai ricuchishpa Diosman cunga. Chaicunaca Diospajlla shicanyachishca cashcamandami, sacerdotepajlla canga. Shinallata Diospaj ñaupajpi vichai ricuchishpa, Diosman cushca pecho aichapash, rigra aichapash sacerdotepajllami canga. Chai jipami Diospajtalla rurangapa shicanyarishca runaca, vinota ufiai ushanga.

21Nazareo tucushpa, Mandaj Diospaj ñaupajpi pactachina mandashcacunaca tucui caicunami. Shinallata imagutapash charishpaca, ashtahuan caranallami canga. Diospajta rurangapa shicanyarishpa, tucuita pactachishnami nishcataca, imashna mandashcashnami tucuita pactachinga’ nishpa villangui” nijurcami.

Sacerdotecuna imashna bendicianamanda

22Mandaj Diosca, Moisestaca cashnami nijurca:

23“Aarondapash, paipaj churicunatapash cashna ningui: ‘Israelcunataca cashna bendiciangui:

24Mandaj Diosca, canda bendiciashpa huacaichishca cachun.

25Mandaj Diosca, canda ninanda juyashpa charichun,

Paillata candaca llaquichun.

26Mandaj Diosca, canda juyashpa ricuchun.

Paillata, cushijushpa causaitapash cuchun’ nishpami bendiciana canguichi.

27Ñuca shutipi Israelcunata bendiciajpimi, Ñucapash paicunataca bendiciasha” nijurcami.