JEREMÍAS 11 - Quichua Imbabura 2016

Dioshuan ari ninajushcata na cazushcamanda

1Mandaj Diosca, Jeremiasman cashna nishpami villarca:

2“Ñucahuan ari ninajushca shimicunata uyashpa, Judá llactapipash, Jerusalenbi tucui causajcunamambash villaichi.

3Israelcunata Mandaj Taita Diosca, cashnami nin: ‘Ñucahuan ari ninajushcata na cazuj runaca, ninandapacha llaquichi tucushcami canga.

4Cangunapaj ñaupa taitacunata Jirruta yacuyachina hornoshna llaquichijuj, Egipto llactamanda llujchimujui punllami, cai shimicunataca cashna nishpa mandarcani: Tucui Ñuca imatalla mandashca shimicunataca, pactachishpami causana canguichi. Chashna pactachishpa causashpami, ñuca agllashca gentecuna canguichi, ñucapash cangunapaj Taita Diosmi casha.

5Lechepash, balun mishquipash, tiyaj llactata carashami nishpami, cangunapaj ñaupa taitacunaman juramenturcani. Cunanga chaita pactachijpimi, chai llactapi causanajunguichi’ nishpa villai” nihuarcami. Shina nijpica: “Mandaj Dioslla, chashna cachun” nircanimi.

6Shina nijpimi Mandaj Diosca, cashna nihuarca: “Ñuca mandashca shimicunataca, Judá llactapi tiyaj pueblocunapipash, Jerusalén pueblopipash, cashna nishpa villagringui: ‘Dioshuan ari ninajushca shimicunataca pactachishpa causaichi.

7Cangunapaj ñaupa taitacunataca, Egipto llactamanda vichai pushamushca punllamanda cunangamanmi, shinlli tucushpa, Ñuca mandashcataca pactachinami canguichi nijurcani.

8Shina nijujpipash na cazushpami, cangunapaj na ali munaita rurashpa causarcanguichi. Chaimandami, Ñucahuan ari ninajushca shimicunapi tiyajuj tucui llaquicunataca, paicunaman cachamugrini. Chai shimicunataca pactachinajuchun mandajpipash, napacha pactachishpami causanajurca’ nishpa villai” nihuarcami.

9Mandaj Diosca, cashnatapashmi nihuarca: “Judá llactapipash, Jerusalén pueblopi causajcunapash Ñucata llaquichingapami, pacalla rimarinajujta yacharcani.

10Ashtahuangarin paicunapaj ñaupa taitacuna na alita rurashcashnami, Ñuca rimashcata na cazushpa, rurashcalla dioscunatara catinajurca. Shinamandami Israelcunapash, Judá llactapi causajcunapash, paicunapaj ñaupa taitacunahuan ari ninajushcata yangapi churanajurca” nihuarcami.

11Chaimandami Mandaj Diosca, cashnatapash nin: “Jatun ninan llaquitami, paicunaman cachamuni. Chai llaquita apanajushpa Ñucata caparishpa mañanajujpipash, napacha uyashachu.

12Shina cajpimi, Judá llacta pueblocunapi, Jerusalén pueblopi causajcunaca, rurashcalla dioscunaman, inciensota cushnichishpa mañangapa rinajunga. Chai dioscunaca, paicuna llaquita apajui punllapica, na quishpichi ushangachu.

13Judá llactapi mashna pueblocuna tiyashcapash, cangunapaj rurashcalla dioscunatami charinguichi. Jerusalenbi mashna ñanguna tiyashcapimi, Baal dioscunaman inciensota cushnichingapa, na ricunayai altarcunata churarcanguichi.

14Chashna cashcamanda Jeremías, canga chai pueblomandaca na mañanachu cangui. Paicunamandaca, napacha caparishpa mañanachu cahuangui. Ñucaca, paicuna llaquipi caparishpa mañanajui punllapica, napacha uyashachu.

15Ñuca juyashca gentecunaca, cai tucui na alicunata rurashca jahuapash,

¿Ñucapaj huasipica imatallapash rurai ushangachu?

Animalcunata, huañuchishpa, Ñucaman cushpalla, ¿Chai llaquicunamanda quishpirishun yashpachu causanguichi?

¿Chaita carashpaca, cushijushpami causasha yanguichu?

16Mandaj Dios Ñucaca, candaca: ‘Juyailla fucujuj olivo yuragumi cangui’ nishpami rigsircani.

Shina cajpipash, rayu urmashpa nina japirishpa, fangacunata rupachijpimi, malquicunapash tucurirca.

17Canda tarpuj, tucuita Mandaj Diosmi, candaca llaquichinapacha cani. Israelcunapash, Judá llactapi causajcunapash, Baal shuti rurashcalla diosman, inciensota carashpa cushnichishpa, na alita ruranajushpa Ñucata fiñachishcamandami, chashna llaquichigrini” ninmi.

Jeremiasta huañuchingapa munashcamanda

18Ñucata llaquichingapa munanajushcataca, Mandaj Diosmi villahuarca.

19Ñucaca, cungata muchungapa apai tucujuj llamagushnami carcani. Chaimandami, ñucata huañuchingapa cashna ninajujtaca na yacharcani. Paicunaca, cashnami ninajushca carca: “Ali fucuj yurataca, cai pachamandaca cuchushpa anchuchinami canchi. Chaimandami paitaca, ña na ashtahuan yarinajunga” ninajushcami carca.

20Shina cajpipash, tucuita Mandaj Dioslla. Canga, aligutapacha ricushpami pactachingui.

Tucuicunapaj yuyaita, shungupi imatalla yarinajujtapash, aligutapacha ricujmi cangui.

Paicunata, Can llaquichijujtaca ricuchun saquihuailla.

Cambaj maquipimi tucuita saquishcani.

21Anatot pueblopi causaj runacunaca ñucata huañuchingapami munanajurca. Paicunaca: “Canda ama huañuchinajuchunga, Mandaj Diospaj shutipica na villanachu cangui” ninajurcami.

22Paicunataca tucuita Mandaj Diosca, cashnami nirca: “Paicunataca ninandami llaquichigrini. Chairalla viñaicunaca, espadapimi huañunga. Paicunapaj churicunapash, ushicunapash, yarjaimandami huañunajunga.

23Anatot pueblopi causanajuj gentecunaca, shujllapash na saquiringachu. Paicunata llaquichina punllapillatami llaquichisha” nircami.