AMÓS 2 - Quichua Imbabura 2016

1Mandaj Diosca, cashnatapashmi nijurca:

“Moab llactapi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, Edom llactata jatun mandajpaj tullucunataca, uchufa tucungacamanmi rupachinajurca.

2Shinamandami Moab llactapica, ninata japichisha.

Chai ninami, Queriot shuti pueblopi mandashpa tiyajuna huasicunatapash, tucuillata rupachinga.

Moab llactapi causajcunaca, trompetata huacachishpa ninanda caparinajujpimi, tucuicuna huañunajunga.

3Paicunapaj jueztaca, paicunapaj chaupimanda anchuchishpami,

pai churashca tucui mandajcunandi huañuchisha” nijurcami Mandaj Diosca.

4Mandaj Diosca, cashnatapashmi nijurca:

“Judá llactapi causajcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, Mandaj Dios mandashcatapash, yangapimi churanajurca.

Pai yachachishcacunatapash, na pactachircachu.

Paicunaca, paicunapaj rurashcalla dioscunata catishpami pandachirca.

Paicunapaj ñaupa taitacuna rurashcata catishpami causarca.

5Shinamandami Judá llactapica, ninata japichisha.

Chai ninallatami, Jerusalenbi mandashpa tiyajuna huasicunatapash, tucuillata rupachinga” nijurcami.

Israelcunata llaquichinamanda

6Mandaj Diosca, cashnatapashmi nijurca:

“Israelcunataca, quimsa juchacunata rurashcamandapash,

chuscu juchacunata rurashcamandapash, llaquichinataca na saquishachu.

Paicunaca, tucuipi alitalla rurashpa causaj runataca, culquipajmi jatunajurca.

Imagutapash na charij runataca, chaquipi churajunacunata japishpallami jatushpa cachanajurca.

7Imaguta ruraitapash na ushajcunataca, alpapi aisashpami llaquichinajurca.

Ali shungu runacunatapashmi pandachinajurca.

Taitapash, churipash, chai cuitsahuanllatami pacta puñunajurca.

Chashna rurashpami, jucha illaj Ñuca shutitaca yangapi churanajurca.

8Culquita mañachijpi, cushca churajunacunata mandashpami, maijan altarpi cashpapash na alicunata ruranajurca.

Paicunapaj dioscunapaj huasipica, imamandapash yangata culquita cuchun mañashpami vinota ufianajurca.

9Ñucami, amorreo gentecunataca, paicunapaj ñaupajpi tucuchircani.

Cedro quirushna jatun cajpipash, encina quirushna shinlli cajpipash, Ñucami tucuchircani.

Jahuapi fucushca paicunapaj muyucunatapash, ucuman viñashca paicunapaj sapicunatapashmi tucuchircani.

10Cangunatapash, Ñucami Egipto llactamanda vichai llujchimurcani.

Amorreo gentecuna causanajuj llactata japinajuchunga,

Ñucami jichushca pambata chuscu chunga huatacunata pushamurcani.

11Cangunapaj churicunamandami, Ñucapaj profetacuna cachun agllarcani.

Cangunapaj chairalla viñaicunamandami, nazareocuna cachun agllarcani.

Israelcunalla, ¿nachu caicunaca chashnapacha canga?” nijurcami Mandaj Diosca.

12“Ashtahuangarin cangunaca, vinota na ufiaj nazareocunatapashmi ufiachircanguichi.

Profetacunatapash, na villanachu canguichi nishpami jarcarcanguichi.

13Chashna cashcamandami cangunataca,

trigo gavillahuan junda carreta llapijshna, chai pushtupillata llapisha.

14Shina rurajujpica,ali calpajpash napacha calpai ushangachu.

Ninan shinlli runapash, na shinlli tucui ushangachu.

Macanajunata ali yachaj runapash, paipaj causaitaca napacha quishpichi ushangachu.

15Flechacunata arcohuan cacharijpash, na quishpiri ushangachu.

Ali calpaj runapash, na pacajushpa calpai ushangachu.

Caballopi tiyarishpa calpaj runapash, paipaj causaitaca, napacha quishpichi ushangachu.

16Chai llaqui punllapica, tucuicunata yali ninan shinlli macanajuj runapash, lluchullami calpanga” ninmi Mandaj Diosca.