1Benjaminbaj miraicunalla, Jerusalén pueblomanda llujshishpa calpaichiyari.
Tecoa shuti pueblopica, cachutami huacachina canguichi.
Bet-haquerem shuti pueblopimi, cushnichina canguichi.
Janaj llactamandaca, cangunata tucuchij jatun llaquica ñami shamujun.
2Ñucami, Sion lomapi tiyajuj juyailla pueblotaca tucuchigrini.
3Paita llaquichingapami, michijcuna ashtaca llamacunahuan shamujunshna chayamunga.
Paicunaca, pueblo muyundipi carpacunata shayachishpami tiyanajunga.
Paicunaca, maipi tiyarishcapimi tucuicuna samanajunga.
4Paicunaca cashnami ninajunga:
“Chai pueblopi causajcunahuan macanajungapa jacuchiyari.
Chai pueblomanga, chaupi punllami yaicuna canchi.
¡Imashi tucuringa! Ñamari chishashpa tutayamujun.
5Mandashpa tiyajuna huasicunataca,
tuta yaicushpa tucuchishunchilla” ninajungami.
6Tucuita Mandaj Diosca, cashnami nirca:
“Quirucunata cuchushpa, Jerusalén muyundi pircacunapi, chacanacunata churashpa macanajuichi.
Cai pueblo ucupica, na alitalla rurana jundami causanajun.
Chaimandami paicunaca, ninandapacha llaquichi tucunata charin.
7Imashnami pugyu yacuca na tucurin,
chashnallatami chai pueblopi causajcunapash, jatun na alita ruranataca, napacha saquin.
Chaipica, shujcunata llaquichishpa, shuhuashpa causanajunmi uyarin.
Punllandimi, Ñuca ñaupajpica ungushcacunapash, chugrishcacunapash ricurin.
8Jerusalenbi causaj gentecuna, ali tucunami canguichi.
Cangunata ama saquichunmi, ali tucuna canguichi.
Canguna causanajuj cai llactapash, ama jichushca pambashna,
pipash na causajuj llacta tucuchunmi, ali tucuna canguichi” nircami.
9Tucuita Mandaj Diosca, cashnatapashmi nirca:
“Huaquinlla puchushca Israelcunataca, uvata tandachishca jipa, pallajujshnami mascanajunga.
Malquicunapi uvata pallajshna, cambaj maquihuan pallayari” nijpimi, Ñucaca cashna nircani:
10“Caita uyachunga, ¿pitata shinlli tacurishpa rimashayari?
Cai gentecunaca, rinri illajshna, napacha uyangapa munajcunami.
Mandaj Diospaj Shimica, paicunapaca yangallatami ricurin.
Chai shimicunataca, paicunaca napacha juyanchu” nircanimi.
11Shina nijpimi: Mandaj Dios fiñarishcashnallata, ñucapash fiñarircani.
Chaita ricushpami, cashna nihuarca:
Cunanga, ñangunapi purinajuj huahuacunatapash, chairalla viñaicunatapash, ninandami llaquichisha.
Cusatapash, huarmitapash, rucutapash, ashtahuan rucutapash, prezu apachunmi saquisha.
12Paicunapaj huasicunatapash, ñuca carashca alpacunatapash, huarmicunatapash, shujcunami quichushpa japinajunga.
Ñucami, cai llactapi causajcunataca, ñuca maquihuan llaquichisha.
Mandaj Dios Ñucallatami, chashna nini.
13Paicunaca, uchillamanda callarishpa, jatungaman, charijyanatallami munashpa purinajun.
Profetamanda callarishpa, sacerdotecunacaman, tucuillami umachishpa causanajun.
14Ñuca agllashca pueblota llaquichishpaca cashnami ninajun:
“Ima llaquipash na tiyanllu, tucuimi ali causanajunchi” ninajunmi.
“Ashtahuangarin, ali causaica napacha tiyanllu.
15Chashna na alita rurashcamandaca ¿Imatallapash pingai tucunajungachu?
Paicunaca, napacha pingai tucunllu. Pingai tucunataca yachaitapash, na yachanllu.
Shinamandami, Ñuca llaquichijpi tucuicuna llaquita apanajunga” ninmi Mandaj Diosca.
16Mandaj Diosca, cashnatapashmi nirca:
“Ñangunapi shayarishpa, cangunallata ali ricuichiyari.
Pundacuna imashna causashcata tapushpami, imashna ali causanata catina canguichi.
Chai ñanda catishpaca, ali causaitami charinguichi” nircami.
Ashtahuangarin cangunaca: “Chai punda ñandaca, napacha catishunllu” nircanguichimi.
17Shinallata: Ricushpa chapajcunatapash churarcanimi.
Paicunaca: “Trompetata huacachintapash uyanami canguichi nijpipash,
cangunaca na uyangapa munashpami causarcanguichi” nircami.
18Shina cashcamanda cai llactapi causajcuna, uyaichi:
“Tandanajushca gentecunapash ima tucunata uyashpa, yuyaita japinami canguichi.
19Cai pachapi causajcunapash, uyaichi:
Ñucaca ninan llaquitami cai gentecunaman apamugrini.
Paicunallata, na alita yarinajushcamandami, chashna llaquichigrini.
Ñuca rimashcata na uyashpa, Ñuca mandashca shimitapash na cazushcamandami, chashna llaquichigrini.
20¿Imapata Sabá shuti llactamanda inciensota Ñucaman apamunguichi?
Caru llactamanda apamushca mishquilla ashnajun, juyailla virutapash, ¿imapata apamunguichi?
Animalcunata Ñucaman cushpa tucuillata rupachishcatapash na chasquinichu.
Animalcunata carashpa huañuchishcatapash na munanichu” ninmi.
21Mandaj Diosca, cashnatapash nin:
“Cai gentecunataca, paicunallata pandarishpa urmachunmi saquigrini.
Shinamandami, taitacunapash, churicunapash, quimiriaj causajpash, paipaj cumbapash huañunga” ninmi.
22Mandaj Diosca, cashnatapashmi nirca:
“Janaj llactamanda gentecunami shamugrin.
Tucui llactamanda, ashtaca gentecunami shamugrin.
23Chai gentecunaca arcotapash, tucsishpa huañuchina jirrutapash aisashcami shamunajunga.
Paicunaca, llaquitapash na llaquishpa huañuchijcunami.
Paicuna shamushpaca, mama cucha yacu manllanayaita jatarinshnami uyarimunga.
Sion pueblopi causajcunalla, paicunaca cangunahuan macanajungapami, caballocunapi tiyarishpa, alichirishca shamunajunga” nircami.
24Chashna shamunajujta uyashpami, huañushcashna saquirircanchi.
Ninandapacha llaquirishpami, huahuata ungugrijuj huarmishna, ninanda caparinajurcanchi.
25Pambamambash, na llujshinachu canguichi.
Ñandapash, na purinachu canguichi.
Fiñajcunaca, espadahuan maipi cashpapash huañuchingapallami chapanajun.
26Ñuca agllashca pueblopi causajcunalla, cañamuta huatarishpa, uchufapi siririchiyari.
Shujlla churi huañushcapishna, ninandapacha llaquirishpa huacaichiyari.
Ñucanchitaca, ñallami llaquichishpa tucuchij shamunga.
27“Candaca, Ñuca agllashca gentecunata ali ricuchunmi churarcani. Shinallata, paicuna imashna causanajujta ali ricuchunmi churarcani.
28Tucuicunallata, pitapash na cazushpa, huasha parlashpami purinajun.
Tucuicunallatami, bronceshnalla, jirrushnalla tucushca.
Paicunaca, tucuillami na alita rurajcuna tucushca.
29Fucunahuan fucushpa, ninanda rupayachijpica, plomo jirrupash, yacuyanllami.
Chashna rupachishpa yacuyachijpipash, mapa na anchurijpica, yangallatami rurashca canga.
30Chaimandami paicunataca, na ali culquita shitashcatashna, Mandaj Diosca saquinga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
