LEVÍTICO 5 - Quichua Imbabura 2016

1Maijambash imatapash ricushca cajpi, na cashpaca uyashca cajpi, villachun cayajpi na rishpaca, paimi chai juchamandaca llaquichi tucunga.

2Shinallata imata cashpapash, mapa cashcata na yachaimanda tacarishpaca mapayashcami saquiringa. Shinallata sachapi causaj animalcunata, huasipi charishca animalcunata, alpapi llucaj animalcuna huañushcata tacarishpaca, mapayashpa, juchayujmi saquiringa.

3Imata cashpapash, gentecunapaj na ali cashcata, mapayashcata na yachaimanda tacarishpaca mapayashcami saquiringa. Chaitaca jipamanra yachashpapash, juchayujllatami saquiringa.

4Ali cajta, na ali cajta na yachaimanda, ari nishpa gentecuna juramentushca jipamanra, na ali cashcata yachashpaca juchajuyujmi saquiringa. Chai juramentushcamandaca, paimi chai juchataca apanga.

5Maijan cashpapash chashna juchacunapi urmashca cashpaca, paillatami Diosman villana canga.

6Shinallata paipaj animalcunamandami, huarmi llamata cashpa, huarmi chivota cashpapash, juchata perdonachun, Mandaj Diosmanga apamunga. Sacerdote chaita rupachijpimi juchacunataca perdonanga.

7Juchamanda Taita Diosman cungapa, maltun llamata na charishpaca, ishcai urpita cashpapash, ishcai palomata cashpapash apamunallami canga. Chaicunatami shujtaca, juchamanda Diosman cungapa, caishujtaca Diosman cushpa tucuillata rupachingapa apamunga.

8Chaicunataca, sacerdotepajman apamujpimi, juchamanda perdonachun cushca animaltara Taita Diosman cunga. Chai animalcunataca cungatami cuchunga, shina cashpapash na tucuillata fitingachu.

9Chai animalpaj yahuartaca altar patapimi javinga. Chai puchushca yahuartaca, chai altar chaquipimi capinga. Chashna rurajpimi juchataca perdonanga.

10Caishuj animaltaca, imashna rurachun mandashcashnami, Diosman cushpa tucuillata rupachinga. Juchata rurashcamanda perdonachunmi, sacerdoteca Diosman cunga. Chashna rurajpimi, juchataca perdonanga.

11Ashtahuangarin, ishcai urpita, ishcai palomata randingapa na charishpaca, ishcai kilo yali ashtahuan ali jacutami paipaj juchata perdonachunga apamunga. Juchata perdonachun Diosman cushca jacu cashcamandami, chaipica aceitetapash, inciensotapash na churanga.

12Chai jacutaca sacerdotemanmi apamunga. Paimi maqui junda jacuta japishpa, chai apamuj runata yarichun, Mandaj Diosman cushpa rupachina altar jahuapi rupachinga. Chaitaca, juchacunata perdonachun cushcami canga.

13Juchata rurashcamanda apamujpimi, sacerdoteca, imashna rurana cashcata rurashpa pactachijpi juchataca perdonanga. Puchushca jacuca Diosman ofrendata cushca granocunashnalla, sacerdotepajmi canga’ ningui” nijurcami.

Juchamanda Diosman cuna cashcamanda

14Mandaj Diosca, Moisestaca cashnatapashmi nijurca:

15“Maijan cashpapash, Mandaj Diosman cuna cashcata na yachaimanda na cushpaca, juchatami ruranga. Chai juchamandaca, Mandaj Diosman cungapami, tucui llamacunamanda agllashpa shuj ali jari llamata apamunga. Chai jari llamataca, juchamanda Diosman cungapami, Diospajlla huasipi culquita pezashcashnallata, mashnata cuna cashcata ricushpa chai llamata apamunga.

16Diosman shicanyachishpa cunata na cushca cashpaca, pichapi chaupishcamanda shujta mirachishpami, sacerdoteman cunga. Sacerdotemi, chai runamandaca, juchamanda cushpa huañuchishca jari llamata Diosman cushpa rupachijunga. Shina rurajpimi chai juchataca perdonanga.

17Shinallata caitaca na ruranachu nishpa, Mandaj Dios mandashcamanda, maijanda cashpapash na yachaimanda na alita rurashpaca, juchayujmi canga. Chai juchamandaca, paillatami llaquichi tucunga.

18Juchata perdonachun apamushca ofrendataca, jari ali llamata cashpapash, mashnata cuna cashcatapash, sacerdotemi ricushpa japinga. Na yachaimanda pandashpa rurashca juchamandaca, chai sacerdotellatami Diosman cunga. Shina rurajpimi chai juchataca perdonanga.

19Mandaj Diospaj ñaupajpi juchata rurashca cajpimi, chashna rurashpa pactachina canga” nijurcami.