PROVERBIOS 16 - Quichua Imbabura 2016

Ali causanata charichun yarichij shimicunamanda

1Runacunaca imatalla ruranatami shungupi yarinajun,

shina cajpipash, Mandaj Diosllami imata ruranatapash ninga.

2Runaca, imata rurashpapash, paipaj yuyaipica alimi yajunmi.

Ashtahuangarin, Mandaj Diosllami imashna cajtapash ali ricujun.

3Can imatalla ruranatapash, Mandaj Diospaj maquipi churangui,

chashna rurajpimi, tucui imata rurashcapash ali llujshinga.

4Mandaj Diosca tucui imatapash, Pai munashca pactachunmi rurashca.

Na ali runatapash, llaquichina punllapajmi charijun.

5Mandaj Diosca, jariyashca shunguta charijcunataca, na ricunayachinllu.

Paicunataca llaquichingapachami.

6Juchata ruraj runataca, juyaihuanmi ali tucuchun rimana.

Runacunaca, Mandaj Diosta manllashpami, na alita ruranamandaca anchuringa.

7Mandaj Diospaj ñaupajpi ali causajushpaca,

fiñajcunahuambash, alimi causangui.

8Ashagutalla charishpapash, alitalla rurashpa causanami ashtahuan ali.

Ashtacata charishpapash, na alita ruranaca napacha alichu.

9Imatalla ruranatami, runaca shungupi yarijun,

shina cajpipash, Mandaj Diosllami imata ruranatapash ninga.

10Jatun mandajca, Dios yarichishcatami rimajun.

Fiñanajuita alichijushpapash, na yangata rimangachu.

11Na umashpa pezana balanzaca, Mandaj Diospajmi.

Pezangapa muchilapi apana rumicunatapash, Paillatami rurashca.

12Jatun mandajcunaca, na alita rurajcunataca na ricunayachinllu.

Alitalla rurashpami paicunaca, mandanapi tiyanajunga.

13Alitalla rimashca shimicunaca, jatun mandajcunapajca cushijuimi.

Paicunaca, aligutapacha rimajtaca juyanmi.

14Jatun mandaj ninanda fiñarishpa rimashpaca, huañuchinatami ricuchijun.

Ashtahuangarin, aliguta yachajushca runaca, huañuchinata jarcangami.

15Jatun mandaj cushilla cashpaca, causai tiyajtami ricuchijun.

Pai ali cashcapash, tamia fuyu shamujujshnami.

16Ali yachanata chasquinaca, ashtahuan ali curitapash yalimi.

Ali yuyaita japinaca, culquitapash yali ashtahuan alimi.

17Alitalla rurajcunaca, na alita ruranamandaca anchurinmi.

Shinami, paicunapaj causaitaca huacaichin.

18Nara llaquicuna japijpica, jariyashpami causan.

Nara urmashpallami, ninanda jariyashpa purin.

19Ashagutalla charij huajchacunahuan causanami ashtahuan ali.

Jatun tucushca charijcunahuan causanapaj randica.

20Ali yuyaihuan rimashcata chasquijcunami, alita japinga.

Mandaj Diosta yariashpa causaj runaca, ninandami cushijunga.

21Ali yachajushcata shungupi charijcunaca, alitallami ruranga.

Juyaihuan rimajcunaca, ashtahuan alitami yachachin.

22Ali yuyaita chasquij runapaca, alita yachanaca, causaita cuj yacushnami.

Ashtahuangarin, juizu illaj runataca, paipaj na ali yuyaillatami llaquichin.

23Aliguta yachajushca runaca, aligutapacha yarichishpami riman.

Shinallata, ashtahuan ali shimicunata rimashpami yachachin.

24Juyailla rimashca shimicunaca, uyanayai juyaillagupachami.

Chai shimicunaca, almapajpash, tullucunapajpash alimi.

25Runapaj yuyaipica, imapash alishnallami ricurin.

Ashtahuangarin, chaicunaca huañuimanmi apajun.

26Imata rurashpapash, paipaj ali cachunmi ruran.

Pai micungapa munashpami, imatallapash ruran.

27Jatun na alita ruraj runaca, na alita ruranataca ninandami mascan.

Pai imata rimashcapash, ninashnami llujshijun.

28Jatun na alita ruraj runaca, fiñanajuitami callarichin.

Imatapash parlajlla runaca, ali cumbacunatapash shicanyachinllami.

29Na alita ruraj runaca, paipaj cumbamanllatami uyanayaita llullashpa parlajun.

Shina llullashpami, na ali causaiman pushan.

30Ñavita vichashpami, jatun na alita ruranataca yarinajun.

Shimihuan rimashpaca, na alita ruranllami.

31Rucucaman causashpaca, juyailla coronata churajushcashna alipachami.

Alitalla ruraj cashcamandami chashna unaita causan.

32Ninan shinlli runapaj randica, na ñapash fiñarij runami ashtahuan ali.

Paillata jarcari ushaj runaca,

shuj pueblota mishashpa japij runatapash, ashtahuan yali alimi.

33Runacunaca, pipaj urmajta ricungapami ruranajun.

Ashtahuangarin, Mandaj Diosmi pipaj urmandapash ricuchin.