1¿Imashpata gentecunaca na alicachishpa caparinajun?
Shuj llactapi causajcunapash, ¿imashpata pandacunata yarinajun?
2Cai pachapi jatun mandajcunaca na cazungapami jataringa.
Cati mandajcunapash chashnallatami jatarinajunga.
Mandaj Diostapash, Pai agllashca Jatun Mandajtapash na cazushpami, cashna ninajunga:
3“Pai cadenahuan huatashcashna charijushcamandaca cacharirishunchi,
ñucanchita huatashpa charijuj cabiacunataca, fitishpa shitashunchi” ninajungami.
4Jahua pachapi causajuj Diosca asishpami ricunga.
Jatun Diosca, paicunataca asishpami ricunga.
5Chai jipaca, ninandapacha fiñarishpami rimanga.
Pai chashna fiñarishpa rimajpimi, ninanda manllarinajunga.
6“Ashtahuangarin ñucaca, ñuca Jatun Mandajtami churarcani
Jucha illaj Sion lomapimi Paitaca churarcani” nijurcami.
7Mandaj Dios mandashpa cushcataca villashami.
Mandaj Diosca, cashnami nihuarca:
“Canga, Ñuca churimi cangui.
Ñucami, Cambaj Taita cani.
8Mañahuailla, llactacunatapash Cambaj cachun cushallami.
Cai pacha callari manñacunapi tiyaj llactacunatapash, Cambajlla cachun cushallami.
9Paicunataca, jirru varahuanmi mandangui.
Mangata ruraj runapaj alpa mangatashnami ñutungui” nihuarcami.
10Jatun mandajcunalla, cunanga aligutapacha yarishpa causaichi.
Shinllita rimashcataca, cai pachapi tiyaj tucui juezcunami cazuna canguichi.
11Mandaj Diospajtaca, manllaihuanmi rurana canguichi.
Ninan manllaihuanmi, Paitaca alicachina canguichi.
12Paipaj Churitaca alicachinami canguichi.
Pai fiñarishpa ama llaquichijuchunmi chashna alicachina canguichi.
Paica, ñapash ninanda fiñaringallami.
Paita yarishpa causajcunaca, ninanda cushijunguichilla.
Who We AreWhat We EelieveWhat We Do
2025 by iamachristian.org,Inc All rights reserved.
