1Mandaj Diosca, Pai agllashca Ciro shuti mandajtaca, cashnami nijun:
“Paitaca, maquimanda aisashpami, shuj llactacunapi causajcunata cazuchijuchun churarcani.
Jatun mandajcunatapash, Pai tucuchishca cachunmi agllarcani.
Ciro runapaj ñaupajpimi, pueblo pungucunapash, napacha vicharishpa, pascariyaj catinga.
2Ñucami, cambaj ñaupajpi rishpa, ñangunatapash alichisha.
Bronce pungucunatapash faquishpami, jirruhuan jarcashcacunataca ñutushpa saquisha.
3Chaipi imalla alicunata pacashcatapash, pipash na tarinallapi alichishcacunatapash, canmanmi cusha.
Israelcunata Mandaj Taita Dios cajta yachachunmi, candaca agllashpa churasha.
4Ñucapajta ruraj Jacobpaj mirai Israelcunatapash juyaimandami, candaca, cambaj shutipi cayarcani.
Ñucata can na rijsijpipash, candaca tucuicuna rijsishca cachunmi churarcani.
5Ñucallami, Mandaj Dios cani, ashtahuan shujca na tiyanllu.
Ñucamanda ashtahuan shuj Diosca, napacha tiyanllu.
Ñucata can na rijsishca cajpipash, Ñucami canmanga mandana ushaita cushcani.
6Chashna rurajpimi, indi llujshimujmanda, indi huashajuncaman, shuj Diosca na tiyashcata yachanga.
Ñucallami, Mandaj Dios cani. Pipash ashtahuanga na tiyanllu.
7Ñucami, punllatapash, tutatapash churarcani.
Ñucallatami, ali causaitapash, llaquihuan causanatapash churarcani.
Mandaj Diosllatami, tucui chaicunataca rurarcani.
Mandaj Diosca tucuita ruraj cashcamanda8Jahua pachamanda tamiachinshna, cai pachapi alitalla rurashpa causanata cachamupai.
Chashna rurajpimi, alitalla rurashpa causanapash, quishpirinapash tiyanga.
Mandaj Dios Ñucallatami, chaicunatapash rurarcani.
9Paicunaman causaita caraj Dioshuan fiñarishpa rimarijcunaca, ¡aij imachari tucunga!
Alpa callanacunapash, shuj callanacunapash tucuicuna alpamandallata rurashcami.
Callanata rurana alpaca, ¿paita ruraj runataca: ‘¿Imatata rurajungui?’ ningachu?
Na cashpaca, ¿imata can rurashcapash: ‘Canga, imata ruraitapash na ushanguichu’ ningachu?
10Paipaj taitata: ‘¿Imapata charihuarcangui?’ nijpash,
paipaj mamatapash: ‘¿Imapata unguhuarcangui?’ nijpash: ¡aij imachari tucunga!” ninmi.
11Israelcunaman causaita caraj, jucha illaj Mandaj Diosca, cashnami nin:
“Jipa punlla ima tucunatapash tapuhuaichilla.
Ñuca maquihuan rurashca, ñuca huahuacunata imatalla ruranatapash tapuhuaichilla.
12Cai pachataca Ñucami churarcani.
Chai alpapica, runatapashmi churarcani.
Ñuca ninan ushaihuanmi, jahua pachatapash churarcani.
Chaipi tucui imalla tiyachumbash, Ñucami churarcani.
13Ñucami, Ciro shuti mandajmanga mishachun ushaita curcani.
Paimi, Ñuca pueblotaca cutin shayachinga.
Ñuca agllashcacuna prezu causanajunmandapash, paimi cacharichinga.
Paica, ima culquitapash, ima caranacunatapash, na mañashpallatami cacharichinga” ninmi tucuita Mandaj Diosca.
14Mandaj Diosca, cashnatapashmi nin:
“Egiptopi imatalla rurashpa charishcacunapash,
Etiopía llactapi imatalla randinacunapash,
Sabá llactapi causanajuj jatun runacunapash, cambajmi saquiringa.
Cadenacunahuan huatashcami, catinajunga.
Cangunapaj ñaupajpimi manllaihuan alicachishpa cashna ninajunga:
‘Taita Diosca, cangunahuanmi.
Cangunapaj Taita Diosmanda shuj diosca, napacha tiyanllu’ ninajungami” ninmi.
15Can Taita Diosca, na ricurij Dios cashpapash,
Israelcunata quishpichij Taita Diospachami capangui.
16Imamambash rijchaj dioscunata rurajcunaca, ninandami pingaichi tucunga.
Paicunaca, tucuicuna na alicachijpimi purinajunga.
17Ashtahuangarin Israelcunataca, Mandaj Diosca causaita causaicamanmi quishpichinga.
Israelcunaca, causaita causaicaman pipash na rimashpa pingaichijpimi causanajunga.
18Jahua pachataca Mandaj Diosmi rurarca.
Cai pachatapash, chaipi ima tiyajcunatapash Paimi rurarca.
Cai pachataca na yanga tiyachun rurashpami, ashtahuangarin chaipi causanajuchun rurarca.
Paica cashnami nin: “Ñucallami Mandaj Dios cani, ashtahuan shuj Diosca na tiyanllu.
19Ñucaca cai pachapica, na imatapash pacalla rimarcanichu.
Jacobpaj miraicunataca: ‘Ñucataca, yangami mascanguichitapash’ na nircanichu.
Ñucaca, imatapash alitapacha rimaj Mandaj Diosmi cani.
Na llullashpami, aliguta villani” nircami.
Mandaj Diosmandapash, Babilonia llactapi rurashcalla dioscunamandapash20Llactacunapi causaj puchushca gentecuna, caiman tandanajumuichi.
Caspita rurashca yanga dioscunata,
napash quishpichi ushaj, rurashcalla diosta mañajcunaca, imatapash na yachanllu.
21Cayachishpa, tucuicunata tandachimuichi.
Chai jipaca, imata rurana cashpapash shujmanda, shujmanda rimarichilla.
¿Nachu Mandaj Dios Ñucallata, callarimandapacha ima tucunataca villarcani?
Ñucamanda ashtahuan shuj Taita Diosca na tiyanllu.
Imata cashpapash alitapacha ruraj, Quishpichij Taita Diosca Ñucallami cani.
Ñucamanda ashtahuan shujca, pipash na tiyanllu.
22Cai pachapi causajcunaca, Ñucata catishpallami quishpiri ushanguichi.
Ñucami Taita Dios cani, ashtahuan shujca na tiyanllu.
23Caitaca, Ñucamandallatami juramenturcani.
Ñuca shimimandami, imata pactachinatapash rimarcani.
Chaitaca, na shujman tigrachishachu.
Ñuca ñaupajpi cungurishpami, tucuicuna Ñucataca alicachinajunga.
24Ñucataca, cashnami ninajunga:
“Alitalla ruranatapash, ushaita charinatapash, Mandaj Diosllami caramunga” ninajungami.
Diospajmanmi shamunajunga. Diosta fiñajcunaca, tucuicunami pingaichi tucunajunga.
25Mandaj Diosta cazushpa causajcunaca, alitalla rurashcami ricuringa.
Shinamandami, Israelmanda miraicunaca ninanda cushijunajunga.
Who We AreWhat We EelieveWhat We Do
2025 by iamachristian.org,Inc All rights reserved.
