EZEQUIEL 13 - Quichua Imbabura 2016

Llulla profetacunata llaquichinamanda

1Mandaj Diosca cashnami nihuarca:

2“Huañuna aichayuj runa, Israel llactapi paicuna munashcatalla villaj profetacuna llaquita apanamanda, Mandaj Diospaj Shimita uyaichi, ningui.

3Mandaj Jatun Diosca, cashnami nin: ‘Imatapash na ricushpata, paicunapaj yuyaimandalla villaj juizu illaj profetacunaca, ¡aij imachari tucunga!

4Israel gentecuna, cangunapaj profetacunaca, jichushca pambapi purij añascunashnami carca.

5Mandaj Dios llaquichijui punllapi cai pueblota shinllichingapaca, imatallapash na rurashcachu. Israel gentecunata llaquicunamanda quishpichingapaca, imatallapash na rurashcachu.

6Paicunaca, llullashpallami, Mandaj Diosmi chashna nin ninajurca. Mandaj Diosca, paicunataca na cachamurcachu. Paicuna llullashpa villashcataca, Diosllata pactachijuchunmi shuyanajun.

7¿Nachu paicunaca llullashpalla, muscuipishnami ricurcanchi ninajun? ¿Nachu llullashpa, cashnami tucunga ninajun? Paicunaca: Mandaj Diosmi cashna nin, nishpami llullashpa villanajun.

8Chaimandami Mandaj Jatun Dios Ñucaca, cashna nini: Ima tucunatapash llullashpalla canguna villanajujtaca, na alicachishpami ricuni. Chaimandami cangunataca ninanda fiñarishpa llaquichigrini. Mandaj jatun Dios Ñucallatami, cashna nini.

9Llullashpalla villaj profetacunataca, Ñucallatami llaquichigrini. Paicunaca, Ñuca agllashca Israelcunahuanga, na tandanajungachu. Israelcunapaj shuticunata quilcashcapipash, paicunapaj shuticunaca illangami. Israel llactamambash, na tigrangachu. Shina rurajpimi Ñucataca, Mandaj Jatun Dios cajta yachanguichi.

10Ñuca agllashca gentecunataca: Napash ali causai tiyana cajpitami, ali causaimi tiyanga nishpa llullanajun. Paicunaca, urmanalla pircata shayachishpa, jahualla juyailla ricurichun quilpashcashnami.

11Jahualla, juyaillaguta quilpajcunataca: Chai pircapash urmangami nishpa villai. Chai pircata urmachijuchunga, shinlli tamiata, rumishna rundutami cachamugrini. Shinallata, shinlli huaira shamushpami tucuilla urmachinga.

12Chai pirca urmajpica, nachu cangunataca, jahualla juyaillaguta rurashpa quilpashcacunaca, ¿imata tucurca? ninman.

13Chaimandami Mandaj Dios Ñucaca, cashna nini: Ñuca ninanda fiñarishpami, chai pircata urmachijuchunga, shinlli tamiata cachamusha. Rumishna rundutami, tucuillata tucuchijuchun cachamusha.

14Jahualla juyaillaguta quilpashca pircataca, chashnami tucuchisha. Alpaman tucuillata shitajpimi, chai pirca callaripi churashca rumicunapash ricuringa. Chai pirca urmajpimi, cangunapash chaipi huañushpa tucuringuichi. Shina rurajpimi Ñucataca, Mandaj Dios cajta yachanguichi.

15Ninandapacha Ñuca fiñarishcataca, chai pircatapash, jahualla juyaillaguta quilpajcunatapash, tucuchishpami pactachisha. Chai jipaca, cashnami nisha: Pircapash, chai pircata jahualla quilpajcunapash, na ashtahuan tiyanllu.

16Israel llactamanda profetacunaca, Jerusalenbica, napash ali causai tiyana cajpitami, paicunallata muscuipishna ricushpa: Caipica, ali causaimi tiyanga’ nishpa llullanajun” ninmi Mandaj Jatun Diosca.

17“Huañuna aichayuj runa, cambaj llactamanda na ali huarmicuna, ima llaquita apanatapash villangui. Chai huarmicunaca, paicunapaj shungu yarishcatallami villanajun.

18Paicunataca cashna ningui: Mandaj Jatun Diosca, cashnami nin: ‘Yumbucuna maquipi huatarina cintacunata sirajcunapash, umapi quilparina uchilla telata, jatun telata ruraj huarmicunapash ¡aij, imachari tucunguichi! Cangunaca, ¿nachu, causaipi imatapash charingapalla, chaicunata jatushpa Ñuca agllashcacunata, umachishpa pandachinajunguichi?

19Cangunaca, maqui junda cebadamandalla, asha faqui tandamandallami, Ñuca agllashca gentecunataca, napash huañuna cajpita huañuiman apanajunguichi. Shinallata, napash ali gentecunatara causachun saquishpami, ñuca agllashca gentecunataca llullarcanguichi. Chashna rurashpaca, ¿nachu Ñucataca fiñachinguichi?

20Chaimandami Mandaj Jatun Dios Ñucaca, cashna nini: Yumbucuna maquipi huatarichun canguna rurashca cintacunataca tucuchishami. Chaicunahuanmi, Ñuca agllashca gentecunataca pandachircanguichi. Paicunataca, Ñuca cacharichishpami, alasyu animalcunashna calpachun saquisha.

21Shinallata yumbucunapaj umapi quilparichun canguna rurashca telacunatapashmi liquisha. Ñuca agllashcacunataca, cangunapaj maquimanda cacharichishami. Paicunaca, na ashtahuan cangunahuan umai tucungachu. Chaita ricushpami Ñucataca, Mandaj Dios cajta yachanguichi.

22Cangunaca, alitalla rurajcunataca, chashna llullashpami llaquichircanguichi. Paicunataca, Ñucapash na llaquichircanichu. Shinallata, na ali runacunatami, paicuna na alita ruranajushcata ama saquishpa catichun, shinllichircanguichi.

23Shinamandami, ima tucunatapash muscuipishna na ashtahuan ricunguichi. Llullashpa villanacunapash tucuringami. Ñuca agllashcacunataca, cangunapaj maquimanda cacharichishami. Shina rurajpimi Ñucataca, Mandaj Dios cajta yachanguichi’ nishpa villai” nihuarcami.