ÉXODO 39 - Quichua Imbabura 2016

Sacerdotecunapaj churajunata rurashcamanda(Éx. 28:1-43)

1Diospajlla huasipi ruranajushpa churajunataca, azul, morado, yana puca puchahuan ahuashcatami ruranajurca. Shinallata, Mandaj Dios imashna Moisesta mandashcashnami, Aaronmambash, Diospajlla shicanyachishca churajunata ruranajurca.

2Efod churajunataca, curihuan, azul, morado, yana puca puchacunahuan, caupushca lino puchacunahuanmi rurarca.

3Curita yacuyachishpami, chuya tablatashnalla rurashpa, jamzi puchata llujchinajurca. Shinallata, azul, morado, yana puca puchacunahuan, lino puchahuan juyaillaguta ahuangapami, puchacunataca rutunajurca.

4Chai churajunaca, ishcandi rigrapimi, ñaupajmanda, huashamanda, pundapi japirinata rurashca carca.

5Efod jahuapi huatarina chumbitapash, chashnallata rurashcami carca. Mandaj Dios imashna Moisesta mandashcashnami, curihuan, azul, morado, yana puca puchacunahuan caupushca, lino pucha caupushcahuan rurashca carca.

6Curita rurashca ganchocunahuan japichishca, ónice shuti rumicunapimi, taita Israelpaj churicunapaj shuticunata, jirruhuan aspishpa quilcanajurca.

7Chaicunataca, efod churajunata churajushca rigra jahuapimi churashca carca. Chai rumicunaca, Mandaj Dios imashna Moisesta mandashcashnami, taita Israelpaj miraicuna yarishpa causachun churashca carca.

8Shinallata, pectoraltapash, efodta rurashcashnallatami, juyaillagutapacha ruranajurca. Chaitaca, curihuan, azul, morado, yana puca puchacunahuan caupushca, lino puchahuanmi ruranajurca.

9Chai pectoralca, racuta ahuashca, chashnalla largo, chashnallata anchomi carca. Chaita patarijpica, largomambash, anchomambash ishcai chunga ishcai centímetromi carca.

10Chaipica, chuscu fila rumicunata churashcami carca. Punda filapica, sardio, topacio, carbunclo shuti rumicunami carca. Chaimi, punda fila carca.

11Shujpaj cati filapica, esmeralda, zafiro, diamante shuti rumicunatami churashca carca.

12Ishcaipaj cati filapica, jacinto, ágata, amatista shuti rumicunatami churashca carca.

13Quimsapaj cati filapica, berilo, ónice, jaspe shuti rumicunatami churashca carca. Chai tucuilla rumicunami, curimanda rurashca ganchocunapi churashca carca.

14Chai rumicunaca, taita Israelpaj chunga ishcai churicunapaj shuticuna imashna cajtami ricuchijurca. Shinallata, chai rumicunapica, sellota churashcashnami, chunga ishcai ayllucunapaj shuticunata churashca carca.

15Pectoralpipash, ashtahuan ali curi pucha caupushcatami, shambashpa churanajurca.

16Shinallata, ishcai curi ganchocunatapash, ishcai curi argollacunatapash rurashpa, pectoralpaj ishcandi manñapi churanajurca.

17Chai ishcai curi puchacunataca, pectoralpaj ishcandi manñapi churashca argollacunapimi yalichinajurca.

18Caupushca curi puchacunapaj ishcandi pundacunataca, efod churajunata churajushca rigra ñaupapimi huatanajurca.

19Shinallata, ishcai curi argollatapash rurashpami, pectoralpaj ishcandi manñacunapi, efod churajunapaj ura manñapi churanajurca.

20Shinallata, ishcai curi argollacunatapash rurashpami, efod churajunata churajushca, ishcandi rigra ñaupajpi, uraman churanajurca. Chaitaca, efodta churajushca huatarina chumbi jahuapimi churanajurca.

21Pectoralpi churashca argollacunahuan, efodpi churashca argollacunahuan tandachishpami, caupushca azul puchahuan huatanajurca. Efodta huatarina chumbi jahuapi cashpa, efodmanda pectoral ama anchurichunmi, Mandaj Dios imashna Moisesman mandashcashna huatanajurca.

22Efod nishcata churajushca ucuman churajungapami, azul finduhuan, ali ahuanata yachaj rurashca carca.

23Chai churajunataca, chaupipi pascariyajtami jahuaman saquirca. Chai pascariyaj muyundi manñapica, racuta ahuashpa, na liquirinallata rurashcami carca.

24Chai churajuna manñapica, azul, morado, yana puca puchacunata, caupushca lino puchacunahuanmi, granadacunata ruranajurca.

25Shinallata, ashtahuan ali curi uchilla campanacunatapashmi ruranajurca. Chai campanacunataca, granadacunapaj chaupicunapimi, jahualla churajunapaj muyundi manñapi churanajurca. Granadacunapaj chaupipimi, chashna churanajurca.

26Shuj uchilla campanata churashca catipica, shuj granadata, caishuj uchilla campanata churashca catipipash, shuj granadata churashpami, jahualla churajuna tucuilla muyundipi chashnallata churanajurca. Mandaj Dios, Moisesta mandashcashnami, Diospajta rurangapa chashna churanajurca.

27Ucuman churajuna tunicatapash, ahuanata ali yachaj rurashcami carca. Chaitaca, ali lino puchahuan ahuashpami, Aaronmambash, paipaj churicunamambash, chashna ruranajurca.

28Shinallata, umapi churajuna mitratapash, tiara nishcatapashmi, ashtahuan ali lino puchahuan ruranajurca. Ucuman churajuna uchilla calzongunatapash, caupushca lino puchahuanmi ruranajurca.

29Shinallata, huatarina chumbitaca, caupushca lino puchahuan, azul, morado, yana puca puchacunahuanmi, juyaillaguta ahuashpa, Mandaj Dios imashna Moisesta mandashcashna ruranajurca.

30Shinallata, ali curita yacuyachishpami, Diospajlla shicanyachishca cachun, frentepi huataringapa chuya tablatashnalla ruranajurca. Chaipica: MANDAJ DIOSPAJLLA SHICANYACHISHCAMI nishpa, jirruhuan aspishpa quilcashcami carca.

31Chai chuya tablashnalla manñacunapica, azul puchatami churanajurca. Chaitaca, mitra jahuapimi, Mandaj Dios imashna Moisesta mandashcashna huatarinajurca.

Jatun carpata rurashpa tucuchishcamanda(Éx. 35:10-19)

32Chashnami, Diospaj jatun carpapaj tucuita ruranaca tucurirca. Dioshuan tuparina jatun carpataca, Mandaj Dios imashna Moisesta mandashcashnami, Israelcunaca chashnatapacha ruranajurca.

33Chai jatun carpataca, Moisespajmanmi apamunajurca. Chai jatun carpatapash, chaipi tucui imalla tiyashcacunatapash, chai carpapaj argollacunata, tablacunata, jatun caspicunata, pilarcunata, bazacunatapashmi apamunajurca.

34Jahualla quilpangapaca, pucata tinishca jari llamapaj caracunata, tejón animalpaj caracunata, carpa ñaupajman huarcuna fachatapashmi apamunajurca.

35Mandashca shimicunata alichishca arcata, chai arcata huanduna caspicunata, arca tapatapashmi apamunajurca.

36Mezata, mezapi tiyaj tucuilla vasocunata, Diosman cuna tandacunata,

37ashtahuan ali curi candelerota, maipi tiyanapi churashca uchilla lamparacunata, chai lamparacunapi tucui ima tiyashcacunatapash, michata japichina aceitetapashmi apamunajurca.

38Curi altarta, shicanyachina aceitetapash, mishquilla ashnajun inciensota, jatun carpaman yaicuna pungupi huarcuna telatapashmi apamunajurca.

39Bronce altarta, chai altarpaj bronce rejillata, altarta huanduna caspicunata, chaipi tucui imalla tiyashcacunatapash, jatun pilundapash, pilunda churana bazatapashmi apamunajurca.

40Patio muyundita jarcana cortinacunata, patiopi shayachina pilarcunata, pilarcunata shayachina bazacunatapash, patioman yaicuna pungupi huarcuna cortinatapashmi ruranajurca. Shinallata, chai telata huatana cabiacunata, chaipillata huatana estacacunatapash, Dioshuan tuparina jatun carpapi imatalla ruranacunata, tucui imalla tiyashcacunatapashmi apamunajurca.

41Diospaj huasipi Diospajta rurangapa churajunacunata, sacerdote Aarón churajuna Diospajlla shicanyachishca churajunata, Aaronbaj churicuna, Diospajta ruranajushpa churajunatapashmi apamunajurca.

42Tucui imacunatapash Mandaj Dios imashna Moisesta mandashcashnami, Israelcunaca, tucui ruranacunata chashnatapacha ruranajurca.

43Mandaj Dios imashna mandashcashna rurashcatami, Moisesca tucuita ricujurca. Chaita ricushpami, paicunataca bendiciarca.