1Cunanga, sacerdotecunata mandaj Sacerdoteta charishcatami, ashtahuambachaca villashpa catimushcanchi. Paica, jahua pachapi mandashpa tiyajuj Diospaj ali maquimanmi tiyarirca.
2Paica, Diospajlla huasipimi, Diospajta rurajun. Chai jahua pachapi jatun carpa huasitaca, runacunaca na shayachishcachu, ashtahuangarin Jatun Diosmi shayachishca.
3Sacerdotecunata mandaj tucui sacerdotecunaca, ofrendata Diosman carangapa, animalcunata Diosman cushpa huañuchingapallami churai tucushca. Shinamandami Jesuspash, Diosman imagutallapash caranata charin.
4Paica, cai pachapilla causajushpaca, na sacerdote tucunmanllu carca. Mandashcapi nijujshna, Diosman ofrendacunata cungapaca, caipipash sacerdotecunaca tiyanmi.
5Paicunaca, jahua pachapi imashna canata yarishpallami ruranajun. Chai carpa huasita Moisés ruragrijujpica: “Ricui, canman urcu jahuapi ñuca ricuchishcashnapacha tucuita aliguta rurangui” nishpami mandarca.
6Ashtahuangarin, cunanga Jesusca, chai sacerdotecunatapash yali ashtahuan alitami, Diospajta rurashpa pactachijun. Dios ashtahuan alipacha ari nishcataca, Jesusmi gentecunamanda Diosta mañashpa pactachijun.
7Punda “ari nishca” tucui ali cajpica, shuj mushuj “ari nishcataca” napacha shuyashpa chasquinchimanllu carca.
8Mandaj Diosca, shinllita tacurishpami cashna nirca:
“Jatun Diosca ñami punllacuna chayamushca nijunmi.
Ricuichi, Israel llactapi, Judá llactapi causajcunahuan,
shuj mushuj ari nishcata churanami cani.
9Paicunapaj ñaupa taitacunahuan ari nishcashnaca, na rurashachu.
Paicunahuanga, maquimanda japishpa,
Egipto llactamanda llujchimujui punllapimi ari nircani.
Paicunaca, chaipi ari ninajushcataca napacha pactachinajurcachu.
Chaimandami ñucapash, paicunataca jichushpa saquircani” nijunmi Jatun Diosca.
10Shinamandami: “Israel llacta gentecunahuanga caita ari nigrini.
Chai punllacuna jipami, Jatun Diosca cashna nijurca:
Ñuca mandashcacunataca, paicunapaj yuyaipimi churasha.
Paicunapaj shungupipashmi quilcashpa saquisha.
Shina rurashpami, paicunapaj Taita Dios casha,
paicunapash Ñuca agllashca gentecunami canga.
11Chaipica, pipash na shujcunata cashpa, paipaj huauquita cashpapash:
Jatun Diosta rijsinami cangui nishpaca, na yachachijungachu.
Paicunaca, tucuicunami rijsihuanga.
Uchillamanda callarishpa, jatungamanmi rijsihuanga.
12Paicunataca, alitalla na rurashca cajpipash llaquishami.
Paicunapaj juchacunatapash, jatun na alita rurashcacunatapash,
napacha ashtahuan yarishachu nijunmi” nijurcami.
13Shuj mushujta rurangapa ari nishpaca, punda ari nishca ña maucayashca cajpimi, chashnaca nishca. Chai punda ari nishcapash, ña maucayashca cashpami ña tucurigrijun.
Who We AreWhat We EelieveWhat We Do
2025 by iamachristian.org,Inc All rights reserved.
