EZEQUIEL 14 - Quichua Imbabura 2016

Rurashcalla dioscunata mañashpa causajcunata llaquichishcamanda

1Israelcunata pushaj huaquin rucucunami, ñucapajman shamushpa tiyarinajurca.

2Chaipimi Mandaj Diosca, cashna nihuarca:

3“Huañuna aichayuj runa, cai runacunaca rurashcalla dioscunatami yarishpa causanajun. Chashna na ali cashcataca, paicunapaj ñavipillata ricunallami. ¿Chashna causanajushca jahuachu, Ñucata tapungapa shamunajun?” nircami.

4Chaimandami, paicunataca cashna nina cangui: “Mandaj Jatun Diosca, cashnami nin: ‘Israel gentecunamanda maijan cashpapash, rurashcalla dioscunata catishpa pandarishca jahua, profetata tapungapa shamujpica, Mandaj Dios Ñucami, paicuna na alita rurashcamandaca llaquichisha.

5Chashna rurajpica, Israel gentecunaca, rurashcalla dioscunata saquishpa, Ñucapajman tigraringapashchari’ ningui” nihuarcami.

6Israel gentecunataca, cashnatapash ningui: “Mandaj Jatun Diosca, cashnami nin: ‘Cangunapaj rurashcalla dioscunata saquishpa, Ñucapajman tigrarimuichi. Chashna na alicunataca, na ashtahuan rurashpa catinachu canguichi.

7Israel gentecunamanda, maijan cashpapash, shuj llactamanda shamushpa Israel llactapi causajushpapash, Ñucamanda anchurishpa, rurashcalla dioscunata yarinajushpaca, llaquita apangami. Shinallata, jatun na alita rurashca jahua, profetata tapungapa shamujpica, Mandaj Dios Ñucami llaquichisha.

8Chai runataca, ninanda fiñarishpami, Ñuca agllashca gentepuramanda llujchishpa calpachisha. Chaita rurashpaca, shujcunapash manllaihuan causachunmi, chashna rurasha. Shina rurajpimi Ñucataca, Mandaj Dios cajta yachanguichi.

9Shinallata, profetatapash llullashpa umachishpa villachun mañajpica, Mandaj Dios Ñucallatami profeta llullashpa villachun saquisha. Chai llulla profetataca, ninanda fiñarishpami, Ñuca agllashca Israelcunapaj chaupimandaca llujchishpa calpachisha.

10Profetatapash, paita tapungapa shamuj runatapashmi, paicuna na alita rurashcamandaca llaquichisha. Paicunaca, ishcandimi na alita rurarca.

11Israel gentecuna, ama Ñucamanda ashtahuan anchurishpa, ama ashtahuan mapayachunmi, chashna llaquichisha. Paicunaca, Ñuca agllashcacunami canga, Ñucapash paicunapaca Taita Diosmi casha’ ninmi ningui” nihuarcami Mandaj Jatun Diosca.

Jerusalenbi causajcunata, llaquichinapacha cashcamanda

12Mandaj Diosca, cashnami nihuarca:

13“Huañuna aichayuj runa, cai llactapi causajcuna, Ñucata na cazushpa juchata rurashpa catinajujpica, Ñucallatami ninanda fiñarishpa llaquichisha. Micuna ama tiyachun tucuchishpami, gentecunatapash, animalcunatapash, cai llactamandaca tucuchisha.

14Cai punllacunapi, Noé, Daniel, Job shuti quimsandi runacunallami, alitalla rurajcuna cashcamanda quishpirinman. Mandaj Jatun Diosmi, chashna nini.

15Shinallata, millai animalcunata cai llactaman cachamushpa, huañuchishpa tucuchijpica, chai animalcunata manllashpa chaita pipash na yalijpimi, cai llactaca jichushca sirinman.

16Shinallata chai quimsa runacuna, cai llactapi causashpapash, paicunapaj churicunatapash, ushicunatapash na quishpichi ushanmanllu. Ashtahuangarin paicunallami quishpirinman. Chashna cajpimi, cai llactaca, jichushca sirinman. Causajujlla Mandaj Jatun Dios Ñucami, cashna nini.

17Na cashpaca, espadata cai llactaman cachamushpami, cashna niman: ‘Cai llactapi causanajuj gentecunatapash, animalcunatapash huañuchingapa rilla’ nishpami cachaiman.

18Shina cachamujpica, chai quimsa runacuna cai llacta chaupipi causashpapash, paicunapaj churicunatapash, ushicunatapash na quishpichi ushanmanllu. Ashtahuangarin paicunallami quishpirinman. Causajujlla Mandaj Jatun Dios Ñucami, chashna nini.

19Na cashpaca, chai llactapi causajcunaman millai ungüita cachamushpami, gentecunatapash, animalcunatapash huañuchishpa tucuchingapa, Ñuca ninanda fiñarishpa paicunapajman cachamuiman.

20Shina cachamujpica, Noé, Daniel, Job shuti runacuna chaipi cashpapash, paicunapaj churicunatapash, ushicunatapash na quishpichi ushanmanllu. Shina cashcamanda, paicuna alitalla rurajcuna cashcamandami, paicunalla quishpiri ushanman” ninmi causajujlla Mandaj Jatun Diosca.

21Chaimandami Mandaj Jatun Diosca, cashna nin: “Jerusalenbi causajcunata llaquichingapaca, chaitapash yali chuscu jatun llaquicunatami cachamusha. Chai pueblopi causanajuj gentecunata, animalcunata tucuchingapaca, espadatapash, yarjaitapash, millai animalcunatapash, millai ungüicunatapashmi cachamusha.

22Shina llaquichijpipash, chai pueblopica, huaquin gentecuna puchushca cashpami, paicunapaj churicunandi, ushicunandi caru llactaman apai tucunga. Paicuna cangunapajman shamujpi ricushpami, paicuna na alita rurashpa causashcamanda, Jerusalenbi causajcunata Ñuca imashpa llaquichishcataca ali yachanguichi.

23Paicuna imashna causashcata, imata rurashcata yachashpami, chai pueblopi causajcunataca na yangamanda llaquichishcata ali yachanguichi” ninmi Mandaj Jatun Diosca.