2 CRÓNICAS 7 - Quichua Imbabura 2016

1Diosta mañashpa, Salomón tucuchinhuanmi, jahua pachamanda nina urmamushpa, Diosman cushpa rupachina animalcunatapash, huañuchishca animalcunatapash, tucuillata rupachirca. Shinallata, Diospaj huasipica, Mandaj Diospaj punchapamba ninan ushaimi jundarca.

2Shina cajpimi, sacerdotecunaca, Mandaj Diospaj huasiman yaicuitaca na ushanajurca.

3Ninapash, Mandaj Diospaj punchapamba ushaipash, chai huasiman shamujta tucui Israelcuna ricushpami, cungurishpa, alpaman chayajta cumurinajurca. Shina cumurishpami, Mandaj Diosta alicachishpa cashna ninajurca: “Mandaj Diosca jatunmi. Paica causaita causaicamanmi juyajungalla” ninajurcami.

4Chai jipami, jatun mandajpash, chaipi tucui tandanajushca gentecunapash, Mandaj Diospaj ñaupajpi animalcunata cushpa huañuchinajurca.

5Jatun mandaj Salomonga, 22.000 huagracunata, 120.000 llamacunatami, Diosman cushpa huañuchijurca. Chashnami jatun mandajpash, tucui Israelcunapash Taita Diospaj huasitaca, Diosmanllata minganajurca.

6Sacerdotecunapash, paicuna Diospajta imatalla ruranatami ruranajurca. Levitacunapash, jatun mandaj David rurachishpa, Mandaj Diosta taquishpa causashca taquinacunahuanmi, “Diospaj juyaica causaita causaicamanmi” nishpa, taquinajurca. Sacerdotecuna, trompetacunata huacachinajujpimi, Israelcunaca chaipi shayanajurca.

7Salomonga, Mandaj Diospaj huasi ñaupajpi tiyajuj chaupi patiopi Diosman cushpa tucuillata rupachina animalcunatapash, Dioshuan ali cangapa carashca animalcunapaj viratapash, chaipi rupachishca cashpami, chai pushtutapash Diosman mingarca. Salomón rurachishca bronce altarpica, tucuillata rupachina animalcunata, ofrendacunata, viracunata rupachingapaca na pactajpimi, chaipi rupachijushca carca.

8Salomonga, canchis punllacamanmi ninan cushijuita rurarca. Paihuanga, Hamat shuti puebloman yaicunamandaca, Egipto llacta jatun larca yacucaman causanajuj Israelcunami, ashtacapacha tandanajumushca carca.

9Pusaj punllapica, jatun tandanajuitami rurarca. Diospaj huasipi tiyaj altarta Diosman mingashpa, canchis punllata tandanajushcamanda, shinallata canchis punllatallata jatun cushijuita charishcamandami chashna tandanajurca.

10Jatun mandajca, huatapaj canchis quilla, ishcai chunga quimsa punllapimi, gentecunataca paicunapaj huasicunaman cacharca. Mandaj Diosca Davidmambash, Salomonmambash, Diosllata agllashca Israelcunamambash, alicunata rurashcamandami tucui shungu cushijushpa tigranajurca.

Taita Diosca, tucuita pactachingapa Salomonhuan ari nijushcamanda(1 Rey. 9:1-9)

11Salomonga, Mandaj Diospaj huasitapash, pai mandashpa tiyajuna huasitapash, Mandaj Diospaj huasipi tucui imatalla rurangapa yarijushcatapashmi tucuita rurashpa tucuchirca.

12Chai jipami Mandaj Diosca, Salomonman tuta ricurishpa cashna nirca:

“Can mañashcataca uyashpami, cai pushtutaca animalcunata Ñucaman cushpa huañuchina huasi cachun agllarcani.

13Ama tamiachun, jahua pachata Ñuca vichajpi, chagracunata tucuchinajuchun langosta jurucunata cachamujpi, jatun ungüicunata cachamujpi,

14Ñuca agllashca gentecuna ninanda llaquirishpa, na alita ruranajushcata saquishpa, Ñucata mascashpa, Ñuca shutipi mañajpica, Ñucapash jahua pachamanda uyashami. Paicunapaj juchacunatapash cungashpami, paicunapaj alpatapash alichisha.

15Cunanmandaca, cai huasita ricuriashpami, caipi mañashcataca uyasha.

16Cunanga cai huasitaca, causaita causaicaman Ñuca shuti chaipi cachunmi, Ñucapajlla cachun agllarcani. Cai huasitaca, causaita causaicamanmi ricuriajusha.

17Shinallata, cambaj taita Davidshnallatami, Ñuca ñaupajpi tucuita aliguta rurashpa, Ñuca mandashca shimicunata cazushpa pactachina cangui.

18Shina cajpimi, cambaj taita Davidhuan ari nishcashna, can mandangapa tiyarinataca, causaita causaicaman churasha. Paimanga cashnami nircani: ‘Cambaj miraipuramandaca, Israel llactata mandaj runaca na illangachu’ nircanimi.

19Ashtahuangarin, Ñuca mandashca shimicunata na pactachishpa, na cazushpa, shuj dioscunatara catishpa, chaicunatara ninanda alicachishpa causanajujpica,

20Cangunaman carashca llactamandaca llujchishpami cachasha. Shinallata, Ñuca shutipi mañana, Ñucapajlla shicanyachishca cai huasitapashmi, Ñuca ñaupajmandaca anchuchisha. Shina rurashpami, tucuilla llactacunapi causajcuna ninanda asishpa na alicachishpa ricunajuchun saquisha.

21Cai ninan juyailla huasitaca, caita yalijcuna ninanda manllarishpa, na alicachishpami cashna ninajunga: ‘¿Mandaj Diosca imashpata cai llactatapash, cai huasitapash chashnapacha llaquichishca?’ ninajungami.

22Shina nijpica: ‘Paicunallatami, paicunapaj ñaupa taitacunata Mandaj Taita Diosmanda anchurirca. Egipto llactamanda llujchimuj Diosmanda anchurishpa, shuj dioscunatara juyashpa, ninanda alicachishpa, paicunapajta rurashpa causashcamandami, cai tucui llaquicunata cachamushca’ ninajungami” nijurcami.