1David huañuna punllacuna ña chayamujpimi, paipaj churi Salomondaca cashna nishpa mandajurca:
2“Ñucaca, tucuicuna huañushpa cai pachamanda rijshnallatami ña rigrini. Shina cajpipash canga shinlli tucushpa, shinlli shayarishpa catingui.
3Canda Mandaj Taita Dios imatalla rurachun mandashcataca tucuitapacha pactachishpa causangui. Tucui mandashca shimicunata, Moisés quilcashpa, villashcacunata, imashna causanata pai yachachishcacunata ali ricushpa cazungui. Can chashna ali pactachijpica, imata can rurashpapash, imata rurai callarijushcapash tucuimi ali llujshinga.
4Ñucaman imatalla nishcata Mandaj Dios pactachijuchunmi, chashna rurana cangui. Paica, ñucata cashnami nihuarca: ‘Cambaj churicuna, Ñucata cazushpa, ñuca ñaupajmanda na anchurishpa, tucui shunguhuan, tucui almahuan ali causajpica, cambaj miraicunamanda Israelcunata mandajcunaca, napacha illangachu’ nihuarcami.
5Israel runacunata mandaj Abner shuti runapaj churi Ner shuti runata, Jeter shuti runapaj churi Amasa shuti runata, Sarvia shuti huarmipaj churi Joab runa, chai ishcai runacunata huañuchishcatapash, canllata ña yachanguimi. Paica, na macanajui tiyajpitami, paicunataca huañuchirca. Chashna rurashpami paica, chumbilishca carapipash, chaquipi churajushcapipash, yahuarhuan javirishca saquirirca.
6Canga, ali yuyaita japishpa imata rurana cashpapash pactachingui. Joab runa rucuyashpa, yuraj ajcha tucushpa, ali huañuita charichunga ama saquinguichu.
7Ashtahuangarin, galaaditapura Barzilai shuti runapaj churicunataca, llaquishpa, micunaguta carashpa, can ricushpa charingui. Cambaj huauqui Absalonda pacajushpa ñuca rijujpica, paicunapash chashnallatami charihuarca.
8Benjamín llactapi tiyaj, Bahurim shuti pueblopi causajuj Gera shuti runapaj churi Simei shuti runapash, cai llactapimi causajun. Paica, Mahanaim shuti puebloman ñuca rijujpimi, ima llaquipash japishpaca alichari canman nishpa, ninandapacha rimahuarca. Shina cashpapash paillatami ñucataca, Jordán yacu manñapi tuparingapa urai shamurca. Chaimandami paitaca: ‘Candaca, napacha espadahuan huañuchishachu’ nishpa, Mandaj Diospaj shutipi juramenturcani.
9Ashtahuangarin paica, cambaj maquipimi. Canga, alipacha yachajushca cashcamandami, imashna paita llaquichinatapash ali yachangui. Paitaca nara rucuyajpillatami huañuchina cangui” nijurcami.
David huañushcamanda(1 Crón. 29:26-30)10David huañushpa, paipaj ñaupa taitacunahuan tandanajujpica, paipaj pueblopillatami pambarca.
11Davidca, chuscu chunga huatacunami Israelcunata mandarca. Hebrón shuti pueblopica, canchis huatatami mandajurca. Jerusalenbica, quimsa chunga quimsa huatatami mandajurca.
12Salomonga, paipaj taita David mandashpa tiyajushcapi tiyarishpaca, alitapachami mandajurca.
Salomonga alipachami mandai callarishca13Haguit shuti huarmipaj churi Adonías runa, Salomonbaj mama Betsabepajman shamujpimi:
“¿Alimanllu shamungui?” nishpa tapujpi, Adonías runaca:
“Ari, alimanmi shamujuni” nirca.
14Shina nishpallami, Adonías runaca:
“Shuj shimigutami ningapa munapani” nijpi, Betsabé huarmica:
“Imata cashpapash nilla” nirca.
15Shina nijpimi Adonías runaca, cashna nijurca:
“Canllata yachanguimi, llactata mandanaca ñucapajmi carca. Shinallata tucui Israelcunami, paicunata mandachunga ñucata shuyanajurca. Shina cajpipash, llactata mandanataca, ñuca huauquiman Mandaj Diosllata cujpimi pai mandajun.
16Cunanga, shuj mañaigutami charipani. Chai mañashcagutaca ari nihuangui” nijurcami.
Shina nijpimi, Betsabé huarmica:
“Imata cashpapash nihuailla” nirca.
17Shina nijpimi Adonías runaca, cashna nirca:
“Sunamitapura Abisag shuti huarmihuan cazarangapa, jatun mandaj Salomonda mañashpa carahuai. (Can mañajpica, ari ningallami)” nircami.
18Shina nijpimi, Betsabé huarmica:
“Ari, chaitaca jatun mandajta nigrishallami” nirca.
19Chai jipami Betsabeca, jatun mandaj Salomonhuan, Adonías runamanda parlangapa rirca. Shina rijpimi, jatun mandajca chasquingapa jatarishpa, paipaj ñaupajpi urai cumurirca. Chai jipaca, pai mandashpa tiyajushcapi cutin tiyarishpami, paipaj mama tiyarichun shuj tiyarinata apamujpi, paipaj ali maquiman tiyachirca.
20Chaipi tiyajushpami Betsabeca, cashna nirca:
“Cunanga, shuj mañaigutami charipani. Chai mañashcagutaca ari nihuangui” nircami.
Shina nijpimi, jatun mandajca:
“Ñuca mamitalla, imata cashpapash mañailla, cushallami” nirca.
21Shina nijpimi, paipaj mamaca:
“Sunamitapura Abisag shuti huarmitaca, cambaj huauqui Adoniasman, paipaj huarmi cachun cupai” nirca.
22Shina nijpimi, jatun mandaj Salomonga, paipaj mamataca cashna nirca:
“Sunamitapura Abisag shuti huarmitaca, ¿imashpata Adoniasman cuchun mañahuangui? Paica, llactata mandanatapashmi mañajun. Paica, ñucapaj rucu huauqui cashpami, sacerdote Abiatartapash, Sarvia shuti huarmipaj churi Joab runatapash ña paihuan charijun” nircami.
23Shina nishpami jatun mandaj Salomonga, Mandaj Diospaj shutipi cashna nishpa juramenturca: “Adonías runaca, paillata huañuchi tucungapami, cai shimicunataca nishca. Paita na huañuchijpica, Taita Diosca ninandapacha llaquichihuachun.
24Cunanga, Mandaj Diosca ricujunmi. Paimi ñuca mandachun, shinllitapacha churashpa, ñuca taita David mandashpa tiyarinapi tiyachihuarca. Pai imashna nishcashnallatami, ñuca miraicunatapash mandashpa causachun churashapachami nirca. Adonías runaca, cunandami huañunga” nircami.
25Shina nishca jipami, jatun mandaj Salomón, Joiada shuti runapaj churi Benaía shuti runata, Adonías runata huañuchichun cachajpi, cungashcapi rishpa huañuchirca.
26Jatun mandajca, sacerdote Abiatartaca cashnami nirca: “Canga, caimanda llujshishpa, Anatot shuti pueblopi tiyaj canman cushca alpacunaman rilla. Cambash huañunapachami carcangui, shina cajpipash, Mandaj Taita Diospaj arcatapash, ñuca taita Davidpaj ñaupajpi apashpa purijushcamanda, shinallata ñuca taita ima llaquita apajujpipash, cambash llaquita apajushcamandami cunanga na huañugringui” nircami.
27Shinami Salomonga, sacerdote Abiatartaca, Mandaj Diospaj sacerdote cashcamanda llujchishpa cacharca. Sacerdote Elí runapaj miraicuna imalla tucunata Mandaj Dios, Silo shuti pueblopi rimashca pactachunmi chashna tucurca.
28Chashna tucushcatami, Joab runaman villanajurca. Paica, Absalonhuan na tandanajushca cashpapash, Adonías runahuanmi tandanajushca carca. Chaimandami Joab runaca, Mandaj Diospaj jatun carpaman pacajungapa rishpa, altar cachucunapi charirirca.
29Mandaj Diospaj jatun carpaman, Joab runa pacajungapa rishpa, altarpi quimirishca shayajujtami, Salomonman villanajurca. Chaimandami Salomonga, Joiada shuti runapaj churi Benaía shuti runataca:
“Joab runata huañuchigri” nirca.
30Shina nijpimi Benaía runaca, Mandaj Diospaj jatun carpaman yaicushpa, cashna nirca:
“Jatun mandajca, caimanda llujshi ninmi” nijpimi, Joab runaca:
“Na llujshishachu, caipimi huañusha” nirca.
Shina nijpimi Benaía runaca, Joab runa imatalla nishcata jatun mandajman villaj shamushpa, cashna nirca:
“Joab runaca, na llujshingapa munashpami, chaipillata huañusha nijun” nircami.
31Shina villajpimi jatun mandajca, cashna nirca:
“Pai nishcata pactachishpa, huañuchishpa pambanguilla. Shina rurashpaca, yangamanda Joab runa huañuchishpa yahuarta jichashcataca, ñucamandapash, ñuca taitapaj huasi ucupuramandapashmi anchuchingui.
32Mandaj Diosca, chai yahuartaca paimanllatami tigrachinga. Paica, paitapash yali, alitalla ruraj ishcai runacunatami huañuchishca. Paicunataca, ñuca taita Davidpash na yachajtami, espadahuan huañuchishca. Ner shuti runapaj churi Abner shuti runaca, macanajuj Israel runacunata mandajmi carca. Jeter shuti runapaj churi Amasa shuti runaca, Judá llacta macanajuj runacunata mandajmi carca.
33Paicunapaj yahuarca, Joab runapaj jahuallata, paipaj miraicunapaj jahuallatami, causaita causaicaman canga. Ashtahuangarin Davidpaj, paipaj miraicunapaj, paipaj huasi ucupuracunapaj, pai mandangapa tiyarina jahuapipash, Mandaj Dios cachamushca ali causaimi, causaita causaicaman tiyanga” nircami.
34Shina nijpimi, Joiada shuti runapaj churi Benaía shuti runaca, vichai rishpa Joab runataca huañuchirca. Paitaca, jichushca pambapi tiyajuj paipaj huasi ñaupajpimi pambarca.
35Chai jipami jatun mandajca, Joab runapaj randi macanajuj runacunata mandachunga, Joiada runapaj churi Benaía runata churarca. Shinallata, Sacerdote Abiatarpaj randica, Sacerdote Sadoc runatami churarca.
36Chai jipami, jatun mandaj Salomonga, Simei shuti runata cayachun cachashpa, cashna nirca:
“Jerusalenbi shuj huasita rurashpa, chaipi causai. Chaimandaca, maimambash amapacha llujshinguichu.
37Na llullashpami nini, canllata yachanguimi. Maijan punlla cashpapash, caimanda llujshishpa, Cedrón shuti yacuta chimbashpa rishpaca, chai punllallatami huañungui. Cambaj yahuarca, cambaj jahuallatami canga” nircami.
38Shina nijpimi Simei shuti runaca, jatun mandajtaca cashna nirca:
“Alitami nihuangui, ñucata jatun mandaj nishcashnami, canbajta ruraj ñucaca rurapasha” nircami.
Shina nishpami Simei shuti runaca, tauca punllacunata Jerusalenbi causajurca.
39Ashtahuangarin quimsa huata yalishca jipaca: Simei shuti runapajta ruraj ishcai runacuna, pacalla llujshishpa rirca. Paicunaca, Gat shuti pueblota jatun mandaj Maaca shuti runapaj churi Aquis shuti runapaj llactapimi causangapa rirca. Chaitami, Simei shuti runaman cashna nishpa villanajurca: “Cambajta rurajcunaca, Gat pueblopimi causanajun” ninajurcami.
40Chaimandami Simei shuti runaca, paipaj burrupi tiyarishpa, paipajta rurajcunata mascangapa Gat shuti pueblopi causajuj Aquis shuti runapajman rirca. Chashna rishpami Simei shuti runaca, paipajta rurajcunataca Gat pueblomanda pushamurca.
41Chai jipami Simei shuti runaca Jerusalenmanda, Gat puebloman rishpa, cutin tigramushcataca Salomonman villanajurca.
42Chaimandami jatun mandajca, Simei shuti runata cayachun cachashpa, cashna nirca:
“¿Nachu candaca: ‘Caimanda llujshishpa maimambash rishpaca, chai punllallatami huañuna cangui’ nishpa shinllita rimashpa, Mandaj Diospaj shutipi juramentuchircani? Shina nijpimi cambash: ‘Alitami nihuangui, chaitaca pactachipashami’ nircangui.
43Shina cashpaca, ¿imashpata Mandaj Diospaj ñaupajpi juramentushcatapash, can pactachijuchun nishpa ñuca mandashcatapash na pactachircangui?” nircami.
44Shinallata jatun mandajca, Simei shuti runataca cashnatapashmi nirca:
“Ñuca taita Davidta fiñashpa, tucui na alita rurashpa can llaquichishcataca, cambaj shungupica alimi yachangui. Mandaj Diosca, chashnallatami candapash ruranga.
45Ashtahuangarin jatun mandaj ñucaca, bendiciai tucushcami casha. Chaimandami David mandashpa tiyajushcapash, Mandaj Diospaj ñaupajpica, causaita causaicaman shinllipacha canga” nircami.
46Joiada shuti runapaj churi Benaía shuti runata, Jatun mandaj cachajpi rishpami, Simei shuti runataca huañuchirca. Chashnami llactata mandanaca, Salomonbaj maquipi shinllipacha tucurca.
Who We AreWhat We EelieveWhat We Do
2025 by iamachristian.org,Inc All rights reserved.
