Psalms 71 - Quichua Imbabura 2016

Rucu runagu Diosta mañashcamanda

1Mandaj Dioslla,

Canbillami shuyajuni.

Ñuca pingai tucuchunga, amapacha saquihuaichu.

2Yanapashpa, llaquimanda cacharichihuayari.

Ñuca mañashcata uyashpa quishpichihuayari.

3Ñuca pacajuna, jatun rumishna cajpimi, ima punlla cashpapash Canman shamusha.

Canmi, ñucata quishpichingapa mandashcangui.

Canmi, jatun rumishna, ñucata shinllichij capangui.

4Ñuca Taita Dioslla,

Canda na manllaj runapaj maquimanda cacharichihuayari.

Jatun na alita ruraj runapaj maquimanda cacharichihuayari.

5Mandaj Jatun Dioslla, Candallami ñucaca shuyasha.

Canhuanmi, chairalla viñai cashcamandapacha, imatapash na manllashpa causani.

6Ñucataca, mamapaj vijsapi cajpillatami, ricushpa charihuashcangui.

Ñuca mamapaj vijsamandaca, Canmi llujchihuashcangui.

Chaimandami, Candalla tucui causaipi alicachijusha.

7Ñucataca taucacunami manllarishpa ricunajuhuan.

Canmi, ñucataca shinllichishpa pushahuashcangui.

8Ñuca shimica, Candallami alicachishpa candajunga.

Candallami punllandi alicachijunga.

9Ña rucuyajpipash, ama saquihuanguichu.

Ushai illaj tucujpipash, ama jichushpa saquihuanguichu.

10Ñucata fiñajcunaca, ninandami na alicachinajuhuan.

Ñucata huañuchingapa munajcunaca, pacalla tandanajushpami parlarinajun.

11Paicunaca: “Taita Diosca jichushpami saquishca.

Paitaca, pipash na yanapangachu, catishpa llaquichishunchilla” ninajunmi.

12Taita Dioslla,

ama jichushpa saquihuaichu.

Ñuca Taita Dioslla,

ñucata yanapangapa ucha shamupayari.

13Ñuca causaita tucuchingapa munajcunaca, tucuchi tucushca cachun.

Ñucata llaquichingapa munajcunaca, pingai tucushpa musparinajuchun.

14Ashtahuangarin ñucaca, tucui causaipimi Candalla shuyajusha.

Ashtahuan ashtahuanmi, candaca alicachijusha.

15Ñuca shimihuanmi, Can ali cashcataca villajusha.

Alicunata rurashpa Can quishpichishcataca,

na yupai ushanalla cajpipash, punllandimi parlajushalla.

16Mandaj Jatun Dioslla,

Can ninan ushaihuan rurashcacunataca villajushallami.

Alitalla Can rurashcataca villajushallami.

17Taita Dioslla,

ñuca chairalla viñai cajpillatami yachachihuarcangui.

Cunangamanmi, Can ninan ushaihuan rurashcacunataca villajuni.

18Taita Dioslla,

rucuyashpa yuraj ajchayu cajpipash, ama jichuhuanguichu.

Cambaj ninan ushaita, jipa punllacunapi villangacaman,

Cambaj tucui ushaita, tucui jipa miraicunaman villangacaman, ama jichuhuanguichu.

19Taita Dioslla,

Can alitalla rurashcacunaca, jahua pachamanmi cashca.

Canmi, jatun alicunata rurashcangui.

Taita Dioslla,

¿Canshnaca, pita tiyangayari?

20Canga, ninandapachami llaquichihuashcangui.

Shina cashpapash, cutinmi causaita carahuangui.

Cai alpapi yana yana ucupi cashcamandapash jatarichihuanguimi.

21Ñucataca ashtahuan jatunyachishpami, cutinllata cushichihuangui.

22Candaca, salteriocunahuan taquishpami alicachisha.

Ñuca Taita Dioslla,

Can na llullaj cajtaca, arpahuan taquishpami candasha.

Israelcunapaj jucha illaj Dioslla.

23Ñuca shimica, canman candashpami cushijunga.

Ñucata quishpichijpimi chashna cushijushpa candasha.

24Ñuca shimica, Can alitalla rurashcatami, punllandi villajunga.

Ñucata llaquichingapa munajcuna mishai tucushpa, pingai tucujpimi, chashna villajusha.