1Chuspi huañushpaca,
mishquilla ashnajujtapash ashtahuan yalishpami, millanayaita ashnan.
Alipacha yachajushca cashpapash,
imapi ashatalla pandashpapash, chashnallatami napacha ali ricurin.
2Alipacha yachajushca runapaj shunguca, alita ruranatallami yarijun.
Ashtahuangarin, juizu illaj runapaj shunguca, na alita ruranatallami yarijun.
3Juizu illaj runataca, maipi cajpipash,
pai juizu illaj cashcataca ricunallami.
4Mandajcuna, canda ninanda fiñashpa shayarijpica, ama manllaringuichu.
Ninanda fiñarishcataca, can ali cashcahuanga mishanguimi.
5Cai pachapica, mandajcuna cashna na alita rurajtami ricurcani.
6Juizu illajcunarami, ashtahuan alipi tiyanajun. Ashtahuangarin ali yuyaita charijcunarami, alpapi tiyanajun.
7Gañangunara, caballopi tiyarishpa purinajujpi, mandajcunara, gañangunashna chaquilla purinajujtami ricurcani.
8Utujuta ruraj runaca,
chaipillatami urmajta ricurcani.
Jarcashca pircata urmachijun runataca,
culebra llujshishpami caninga.
9Rumicunata faquij runaca, chaicunahuanllata chugrinllami.
Yamdata chijtajuj runapash, chaihuanllata llaqui tucunallami.
10Rucuyashca palahuan alpata allajushpaca, ninandami shaijuringa.
Ashtahuangarin, ali yachajushca canaca, ali pushana ushaitami cunga.
11Nara muspayachijpillata culebra canijpica,
muspayachij runapash yangallatami.
12Alipacha yachajushca runa rimashca shimicunaca, ali shimicunami.
Ashtahuangarin, juizu illaj runa rimashca shimicunaca, paitallatami llaquipi churan.
13Pai rimashpa callarishpallatami, juizu illaj cajtaca ricuchin.
Ña tucuchijushpacarin, maitapash rimashpami tucuchin.
14Juizu illaj runaca, imata rimajushpapash, yangata nijungallami.
Shina cajpica, jipa punlla ima tucunatacarin, ¿pita paiman villangayari?
15Juizu illajcunaca, yangallatami imatapash na samashpa ruranajunga.
Paica puebloman maita rinatapash na yachanllu.
16Chaira huambra llactata mandajujpica, ¡llactaca imashi tucunga!
Shinallata, cati mandajcunapash, ufiailla, micuilla purinajushpaca,
ashtahuan llaquimanmi apanga.
17¡Alicachi tucushcacunapaj churi, jatun mandaj tucushpa mandajujpica, ninandami cushijuna cangui!
Shinallata, cati mandajcunapash, machangapa randica,
paicunapallata ali cachun micujcunaca, alipachami.
18Imata rurangapapash na munajcunaca,
huasi tejacuna urmachumbash saquinllami.
Chashna imata rurangapapash na munajpica, huasipash urmangallami.
19Cushijungapami, jatun micuitapash ruranajun.
Runacunataca, vinomi cushichin.
Culquica tucuita charingapa alimi.
20Jatun mandajtaca yuyaipillapash, ama na alicachinguichu.
Charij runatapash, canlla tiyajushpapash, ama huasha rimanguichu.
Jahuata rij alasyu animalcunami, chai rimashca shimicunataca villagringa.
Who We AreWhat We EelieveWhat We Do
2025 by iamachristian.org,Inc All rights reserved.
