ROMANOS 7 - Quichua Imbabura 2016

Cazarashcahuan chimbapurashpami yachachijun

1Tucui crijcuna, mandashca shimicunata yachajcunaman caita nijujtaca ¿nachu yachanguichi? Mandashca shimicunaca, causajujpillami pitapash mandashpa chari ushan.

2Cazarashca huarmitaca, cusa causajushpallami, mandashcapi nijushcashnallata mandashpa chari ushan. Ashtahuangarin, cusa huañujpica, cusa mandajushcamandaca cacharishcami saquirin.

3Shinamandami, cusa causajpillata shujhuan causashpaca, huainayashpa causajun. Ashtahuangarin, cusa huañujpica, pai mandajujmandaca cacharishcami saquirin. Shina cashpami shujhuan cazarashpapash, na huainayashpa causajun.

4Ñuca juyashca crijcuna, cangunapash shinallatami, Cristo huañushcamandaca, mandashca shimimanda ña cacharichi tucushca canguichi. Shinamandami, huañushcacunapaj chaupimanda causarishca Cristopaj canguichi. Chaimandami, ali granota fucuchijshna, Taita Diospajtalla rurashpa causana canchi.

5Ñucanchipaj munaitalla rurashpa causajpimi, mandashca shimicunaca, juchata rurana munaicunatalla ñucanchiman yarichijurca. Shina cashpami, huañushpa chingagringapalla imatapash rurashpa causarcanchi.

6Ashtahuangarin cunanga, chai mandashca shimicuna mandashpa charinamandaca, ñami cachari tucushca canchi. Cunanga, chai quilcashca shimicunaca na ashtahuan mandai ushajpimi, Diospaj Espíritu mandashpa charijujpi mushujta ruranajunchi.

Juchami ñucapi causajun nishcami

7Shina cajpica: ¿“Mandashca shimicunaca na alichu” ninachu canchi? Napacha shinachu. Juchapi causajushcata, mandashca shimipi nijujpimi yacharcani. Mandashca shimipica: “Shujcuna imata charijtapash, na munanachu cangui” nishpa na yachachijpica, chaitaca na yachaimanllu carcani.

8Ashtahuangarin, mandashca shimipi chashna nijujpimi juchaca, ashtahuan na alita rurana munaicunata ñuca shungupi churahuarca. Mandashca shimicuna illajpica juchaca ushaita na charinllu.

9Mandashcapi imata nijujtapash na yachashpami, pundaca causajurcani. Ashtahuangarin, mandashca shimicunata yachashpami, juchata ruranaca causarijshna ninanda yarichijujta yacharcani.

10Shinallata, causaita carachun Dios cushca mandashca shimicunallatami ñucataca, huañuiman apajushcata yacharcani.

11Mandashcapica: “Juchataca na ruranachu” nijujpimi, juchaca umachishpa huañuiman apahuarca.

12Mandashca shimicunaca jucha illajpachami. Chai mandashca shimicunaca, jucha illaj, alitalla ruraj, alipachami.

13Shina cashpaca, ¿chai ali mandashcachu ñucataca huañuiman apajuhuashca? Napacha shinachu. Ashtahuangarin, “juchata ruranaca napacha alichu” nishpa mandashca shimimi huañuiman apahuarca. Chaimandami juchata ruranaca, napacha ali cajta chai mandashca shimicunaca ricuchihuarca.

14Mandashca shimitaca, Dios carashcatami yachanchi. Ashtahuangarin, tucurinalla aichayuj cashpami, juchatalla rurangapa apai tucushcani.

15Ñuca imata rurashpa causajuitaca, na yachai ushanichu. Ima alita rurangapa munashcataca, na rurai ushanichu. Ashtahuangarin, ñuca na ricunayachishcatarami rurani.

16Ñuca na munashcatara rurashpami, mandashca shimicunaca ali cashcata yachani.

17Shina cashpami chai na alitaca, na ñucamandalla rurajuni. Ashtahuangarin ñucapi causajuj juchami chaitaca rurachijuhuan.

18Shinamandami, ñuca aichapica, aliguta ruranaca na tiyajta yachani. Imagutapash aliguta rurana munaica, ñucapica tiyajpipash, chai alita ruraitami na ushani.

19Alita rurangapa munashcataca na ruranichu. Ashtahuangarin imatami na munani, chai na alitarami ruranilla.

20Na munashcata rurashpaca, na ñuca rurajunichu. Ashtahuangarin, ñucapi tiyajuj juchami chashna na alitara rurachijuhuan.

21Shinamandami imatapash alita rurangapa munajushpaca, cai mandashcatara ricuni: Na alita rurana munaica ñucapillata tiyajujtami yachani.

22Ñuca shungu ucupica, Taita Dios mandashca shimicunahuanmi ninanda cushijuni.

23Shina cajpipash, ñuca aichapi tiyajuj na ali munaicunami, alita rurana yuyaitaca, na alicachishpa jarcajun. Aichapi juchata rurachina munaimi ñucataca huatashcashna charijun.

24¡Aij ñucalla, jatun llaquinayaimari cani! Huañuchun charijuj cai aichamandaca, ¿pita cacharichihuangayari?

25Ashtahuangarin, ñuca Taita Diostami, ñucanchi Apunchi Jesucristomanda pashi nijuni. Shina cashpami ñuca yuyaihuanga, Taita Dios mandashcata pactachijuni. Shina cajpipash ñuca aichataca, jucha mandangapa munanrami.