EZEQUIEL 24 - Quichua Imbabura 2016

Timbujun mangahuan chimbapurashpa rimashcamanda

1Iscun huata, chunga quillapaj, chunga punllapimi, Mandaj Diosca cashna nihuarca:

2“Huañuna aichayuj runa, Babilonia llactata jatun mandaj, Jerusalén pueblota llaquichishpa tucuchingapa, cunan punlla chaupipi churashcata quilcangui.

3Chai na cazuj runacunataca, cai chimbapurana shimicunahuan rimangui:

Mandaj Jatun Diosca, cashnami nin:

‘Yacuta mangapi jundachishpa, tulpapi shayachi.

4Shinallata, chaipica, ali aichatalla fitishpa churangui.

Changa aichata, huasha lomo aichatalla agllashpa churangui.

Tullucunatapash, alitalla agllashpa jundachingui.

5Shinallata, ali llama aichata agllashpa,

tullucunata ucuman churashpa, ali timbungacaman rupachingui.

Chai tullucunataca alipachami yanuna cangui’ ninmi.

6Mandaj Jatun Diosca, cashnatapashmi nin:

‘Canga, huañuchishpalla causaj cashpami,

jirru ismushpa na maillashca mangashna pueblo cangui.

Cunanga ¡aij imachari tucungui!

Chai aichacunataca, na agllashpa, asha asha llujchilla.

7Cai pueblopica yahuar jicharishcami.

Chai yahuartaca, ama alpa quilpashpa tapachunmi,

na alpapica jichashpa, ashtahuangarin, rumi jahuapi jichashca.

8Paicuna imashna llaquichishpa huañuchishcashna llaquichingapami,

imapash ama quilpachun, paicunapaj yahuartaca rumi jahuapi jichasha’ ninmi nishpa yachachi” nircami.

9Mandaj Jatun Diosca, cashnatapashmi nihuarca:

“Huañuchishpa yahuarta jichaj pueblomi cangui.

Cunanga ¡aij imachari tucungui!

Ñucapash, candaca rupachishpami tucuchisha.

10Ashtaca yamdahuanmi, aichataca apiyangacaman yanusha.

Tullucunatapashmi rupachishpa tucuchisha.

11Chai chushaj mangataca, manga ucupash, chaipi tiyaj mapapash rupachun,

ismushca jirrupash rupashpa tucurichunmi, ninapi churasha.

12Manga yanayashcataca, maillashpapash na anchuchi usharinllu.

Chaica, ninapimi rupashpallami tucuilla tucuringa.

13Canga, cambaj na ali munaicunatalla rurashpami llaquita apagringui. Can na alita rurashpa mapayashcata anchuchingapa munajpipash, na saquircanguichu. Ñuca ninanda fiñarishpa canda llaquichina punllacamanmi, chashna mapa causagringui.

14Mandaj Dios Ñucami chashna nini. Canda llaquichisha nishcataca, imatapash na llaquishpami pactachisha. Can imatalla rurashpa causashcashnallatami candaca llaquichinajunga” ninmi Mandaj Jatun Diosca.

Ezequielpaj huarmi huañushcamanda

15Mandaj Diosca cashnatapashmi nihuarca:

16“Huañuna aichayuj runa, cambaj juyashca huarmitaca, cungashcapimi causaita quichusha. Paimandaca, ama llaquiringuichu, ama huacanguichu.

17Shungupilla llaquirishpa, llaqui cashcataca ama ricuchinguichu. Umapica turbanteta churajushpa, chaquipipash aliguta churajushpa, ñavitapash ama fachahuan quilparinguichu. Huañuipi micunatapash, ama micunguichu” nihuarcami.

18Chaitaca, tutamandatami, chai pueblopi villarcani. Chishipaca, ñuca huarmica huañurcallami. Cayandi tutamandaca, Dios mandashcashnami tucuita pactachircani.

19Chaita ricushpami, gentecunaca: “Can chashna rurashca ima cajtaca, ¿nachu ñucanchiman villagringui?” ninajurca.

20Shina nijpimi, cashna nijurcani: “Mandaj Diosca cashnami nihuarca:

21‘Tucui Israelcunata, cashna ningui: Mandaj Jatun Diosca, cashnami nin: Canguna ninanda alicachishca, juyashca, ninanda cushijuna Ñuca huasitaca jichushpami saquisha. Shinallata, cangunapaj churicunatapash, ushicunatapash espadahuanmi huañuchinga.

22Cangunapash, ñuca imashna rurashcashnami, ñavitapash na fachahuan quilparishpa, huañuipi micunatapash na micuna canguichi.

23Umapica turbanteta churajushca, chaquipipash ali churajushcami cana canguichi. Na ninanda huacajunachu canguichi. Canguna, chashna na alita rurashcamandami, caishuj, chaishuj ninanda llaquirina canguichi.

24Ezequiel canmi, imashna llaquichinataca ricuchina cangui. Pai imashna rurashcatami, cangunapash tucuita rurana canguichi. Chaita rurajpimi Ñucataca, Mandaj Jatun Dios cajta yachanguichi’ ninmi ningui.

25Huañuna aichayuj runa, paicuna imahuan shinlli tucunatapash, ninanda cushijurinatapash, juyashpa ricunatapash, ninanda munashpa causanatapashmi shuj punlla quichugrini. Shinallata paipaj churicunatapash, ushicunatapashmi chai punllapica quichugrini.

26Chai punllapimi, huañunamanda quishpirishpa, shuj runa villangapa cambajman chayamunga.

27Chaipimi, chai shamuj runahuan tuparishpa rimai ushangui. Canmi paicunapaca, ima tucunata ricuchij cangui. Shina cajpimi Ñucataca, Mandaj Dios cajta yachanga nishpami villahuarca” nijurcami.