EZEQUIEL 18 - Quichua Imbabura 2016

Juchata rurajcuna huañuna cashcamanda

1Mandaj Diosca, cashnami nihuarca:

2“Israel llactapi, yarichij cai shimicunata rimajcunaca, ¿imatata yanguichi? Chai shimicunaca, cashnami nijun: ‘Jayaj uvacunata, taitacuna micushcamandami, churicunaca quiru nanaita charin’ nijunmi.

3Mandaj Jatun Diosca, causajunipachami. Israel llactapica, cai yarichij shimicunataca, cutinga napacha rimanachu canguichi.

4Tucui gentecunami Ñucapaj. Taitapash, churipash Ñucapajmi. Juchata ruraj runaca huañungapachami.

5Maijan runapash, alitalla ruraj cashpa, alitalla rurashpa causashpaca causangapachami.

6Lomacunapi micungapa na rishpa, Israelcunapaj rurashcalla dioscunatapash na mañashpa, shujpaj huarmitapash na quichushpa, quilla nanaihuan huarmitapash na tacarishpaca causangapachami.

7Pitapash na llaquichishpa charij, culquita mañachishcamanda imata charijushcatapash tigrachijcunaca causangami. Shinallata, na shuhuashpa, micuna illajcunamambash carashpa, churajuna illajcunamambash churachishpaca, causangapachami.

8Culquita mañachishpapash, mirachishpa japinata na shuyajcunapash, na alita ruranataca saquishpa, runacuna fiñanajushcatapash aliguta ricushpa alichishpaca, causangapachami.

9Tucui Ñuca mandashca shimicunata cazushpa causashpaca, alitalla ruraj runami canga. Paica, causangapachami. Mandaj Jatun Dios Ñucami, chashna nini.

10Ashtahuangarin chai runaca, shuhua churita, huañuchij churitami charinga. Na cashpaca, tucui na alicunata ruraj churitami charinga.

11Na chashna cashpapash, lomacunapi tiyaj altarcunapimi micujunga. Na cashpaca, shujpaj huarmitami quichunga.

12Shinallata, huajchacunatapash llaquichijunga. Culquita mañachishpapash ashtahuan mañashpami, shuhuajunga. Rurashcalla dioscunata mañashpami jatun na alita rurajunga.

13Culquita mañachishpapash, ashtahuan mirachishpami japijunga. Chashna runaca, ¿causangachu imashi? Napacha causangachu. Paica, chai tucui na alicunata rurashcamandaca huañungapachami. Paica, na ali cashcamandami huañunga.

14Ashtahuangarin, tucui chai juchacunata paipaj taita rurajujta ricushpapash, chaitaca na catishpa ruraj churitami charinga.

15Paica, lomacunapi tiyaj altarcunapipash na micugringachu, Israelcunapaj rurashcalla dioscunatapash ricuitapash na ricungachu, shujpaj huarmitapash na quichungachu.

16Pitapash na llaquichishpa, imata mañachishpapash na yapalla japishpa, na shuhuashpaca causangapachami. Shinallata, yarjaihuan causajcunamambash micunata carashpa, churajunata na charijmambash churachishpaca, causangapachami.

17Huajchacunatapash na llaquichishpa, culquita mañachishpapash na ashtahuan mirachishpa japingachu. Tucui ñuca mandashca shimicunata cazushpa causaj runami canga. Paica, paipaj taita na alita rurajushcamandaca na huañungachu, paica, causangapachami.

18Paipaj taitaca, llaquichij cashcamanda, shuhua cashcamanda, gentecuna ricujta na alita ruraj cashcamandami huañunga. Paillata na alita ruraj cashcamandaca, huañungapachami.

19Cangunaca: ‘¿Imashpashi churica, paipaj taitapaj juchamandaca, na llaquita apan?’ ninguichimi. Paipaj churica, alitalla rurashpa, Ñuca mandashca shimicunatapash, tucuita cazushpami pactachirca. Chashna ali cashcamandaca, paica causangami.

20Juchata ruraj runami huañunga. Churica, paipaj taitapaj juchamandaca, na llaquita apangachu. Taitapash, paipaj churipaj juchamandaca, na llaquita apangachu. Alitalla ruraj runaca, alitallatami japinga. Ashtahuangarin na alita ruraj runaca, llaquitami japinga.

Taita Diosca, tucuita alitalla ruraj cashcamanda(Ez. 33:10-20)

21Ashtahuangarin Diosta na manllaj runa, tucui juchacunata rurashpa causajushcata saquishpa, Ñuca mandashca shimicunata cazushpa, alitalla rurashpa causajushpaca, paica causangapachami.

22Na alita rurashpa, Ñucata fiñachishcataca cungashami. Ashtahuangarin paica, alitalla rurashcamandami causanga.

23Mandaj Jatun Dios Ñucaca, cashnami nini: ¿Ñucata na cazuj runa huañuchun munashallachu? ¿Nachu pai na alita rurashpa causajushcata saquishpaca causanga?

24Ashtahuangarin alitalla ruraj runa, alita ruranata saquishpa, Diosta na manllaj runashnallata, imatapash na alitalla rurashpa causajushpaca, ¿paica, causangachu imashi? Paitaca, ima alita rurashpa causajushcatapash na yarishachu. Ashtahuangarin, yachashca jahua Ñucata na cazushpa, juchata rurashcamandami huañunga.

25Shina cashcamanda cangunaca: ‘Jatun Diosca na tucuita ali pactachijunllu’ ninguichimi. Israelcuna, caita ali uyahuaichi: Ñucata catishpa causanaca, ¿nachu ali canga? ¿Nachu canguna na alita rurashpa causanajushca, na ali canga?

26Alitalla rurashpa causaj runa, alita ruranata saquishpa na alita rurashpaca huañungapachami. Na alita rurashcamandami huañunga.

27Ñucata na manllaj runa, juchata ruranata saquishpa, alitalla rurashpa causashpaca, causangapachami.

28Tucui na alicunata rurajushcata, paillata yarishpa saquishpaca, causangapachami.

29Shina cajpipash Israel gentecuna, cangunaca: ‘Jatun Diosca na tucuita ali pactachijunllu’ ninajunguichimi. Israel gentecuna, Ñucata cazushpa causanaca, ¿nachu na ali? Ashtahuangarin, canguna na alita rurashpa causashcami napacha ali” nihuarcami.

30Shina cashcamanda, Mandaj Jatun Diosca cashnami nin: “Israel gentecuna, canguna na alita rurashcamandami llaquichisha. Canguna na alita ruranata saquishpa, Ñucata cazushpa causajpica, na llaquichishachu.

31Na cazushpa juchata ruranataca saquinami canguichi. Cangunaca shungutapash, yuyaitapash mushujta ruraichi. Israel gentecuna, ¿cangunaca, imashpashi huañunguichi?” ninmi.

32Mandaj Jatun Diosca, cashnatapashmi nin: “Huañunapacha cajpipash, na huañuchun munanichu. Shina cajpica, na alita ruranata saquishpa, Ñucapajman shamuichi. Chashna cashpallami, causaita charinguichi” ninmi.