1 CRÓNICAS 21 - Quichua Imbabura 2016

Israelcuna gentecunata David yupashcamanda(2 Sam. 24:1-25)

1Satanasca, Israelcunata ninanda fiñashpami, Israelcuna mashna cashcata yupachun, Davidman yuyaita curca.

2Chaimandami Davidca, Joab runatapash, Israelcunata cati mandajcunatapash, cashna nirca:

“Beerseba pueblomanda callarishpa, Dan shuti pueblocaman mashna Israelcuna cajta yupashpa, ñucaman villangapa apamugrichi” nirca.

3Shina nijpimi Joab runaca, cashna nirca:

“Mandaj Diosca, Pai agllashca Israelcunataca, shujmandalla patsajta mirachishpami ali canman. Ñucata jatun mandajlla, ¿nachu can jatun mandajpajta rurashpa causanajun? ¿Canga imapata gentecunata yupachun mandangui? Chaita rurashpaca, Israelcunatami juchapi urmachishun” nircami.

4Ashtahuangarin, jatun mandaj mandashcatami, Joab runaca cazuna carca. Chaimandami, Joab runaca, tucuilla Israel llactata purishpa, mashna gentecuna cashcatapash yupashpa quilcashcata apashpa, Jerusalenbi Davidman curca.

5Israel llactapica, espadahuan macanajuj runacunaca, 1.100.000 runacunami tiyashca carca. Judá llactapipash, macanajuiman rinalla runacunaca, 470.000 runacunami tiyashca carca.

6Jatun mandaj mandashca, napacha ali cajpimi, Joab runaca, levitacunapaj miraitapash, Benjaminbaj miraicunatapash na yuparca.

7Taita Diospaj ñaupajpi na alitapacha rurashcamandami, Paica, Israelcunataca ninanda llaquichirca.

8Chaimandami Davidca, Taita Diostaca cashna nishpa mañarca:

“Cambajta ruraj ñucamari, cai na ali juchataca rurapashcani. Shuj juizu illaj runashnami, caitaca rurashcani. Cunanga, cai juchata rurashcataca, perdonahuai nipanimi” nircami.

9Shina mañajpimi, Mandaj Diosca, Davidman villaj profeta Gad runataca, cashna nirca:

10“Davidpajman rishpa, cashna nigri: Mandaj Diosca: ‘Quimsa llaquicunatami canman cachamunata charini. Chaimandaca, maijanda cashpapash, can llaquita apanata, agllailla’ ninmi nigri” nircami.

11Shina nijpimi, Gad runaca, Davidpajman shamushpa cashna nirca: “Mandaj Diosca, cashnami nin:

12‘¿Quimsa huatata yarjai llaquihuan cangapachu munangui? Na cashpaca, ¿canda fiñajcuna, espadahuan huañuchingapa catijpi, quimsa quillata pacajushpa puringapachu munangui? Na cashpaca ¿Mandaj Diosllata angelta cachamujpi, tucuilla Israel llactapi, quimsa punllacaman espadahuan llaquichijuchunllu munangui? Chai llaquica, tucui Israelcunata ungüihuan ninanda llaquichinami canga. Cai quimsamandaca, canllata agllailla’ ninmi. Can maijanda mañashcata, villangapa rishallami” nijurcami.

13Shina nijpimi Davidca, Gad runataca cashna nirca:

“Cunanga ninan llaquipimari cani. Mandaj Diosca, ninanda juyaj cajpimi, Paipaj maquipi llaquichi tucungapa munapani. Ashtahuangarin, runacunapaj maquipi llaquita apangapaca na munanichu” nirca.

14Mandaj Diosca, ninan llaqui ungüita cachamushpami, Israelcunataca llaquichirca. Chaimandami, canchis chunga huaranga runacuna huañurca.

15Mandaj Diosca, Jerusalenbi causajcunata tucuchijuchunga, shuj angeltami cachamurca. Ashtahuangarin chai ángel tucuchijunda Mandaj Dios ricushpami, ninanda llaquirishpa: “Ña saquilla, ama ashtahuan cambaj maquihuan llaquichijuichu” nirca. Mandaj Diospaj angelca, jebuseopura, Ornán shuti runapaj trillana pambapimi carca.

16David vichai ricushpaca, Mandaj Diospaj angeltaca, jahua pachapaj, cai pachapaj chaupipi shayarishpa, espadata Jerusalenman ricuchishpa shayajujtami ricurca. Chaimandami Davidpash, mandaj rucucunapash cañamuhuan quilparishpa alpaman chayajta urai cumurinajurca.

17Davidca, Taita Diostaca cashnami nijurca:

“Gentecunata yupachun mandashpami, na alita rurashpa, ninan juchata rurashcani. Ashtahuangarin, cai gentecunaca, ¿ima na alitata rurapashcayari? Ñucata Mandaj Taita Dioslla, cunanga ñucata, ñuca taitapaj huasi ucupurata, Cambaj maquihuan llaquichihuailla. Ama, Can agllashca gentecunataca, cai jatun ungüihuan llaquichipaichu” nijurcami.

18Mandaj Diospaj angelca, Gad runatami cashna nishpa mandarca: “Chai jebuseopura Ornán shuti runapaj trillana pambaman vichai rishpa: ‘Mandaj Diosman shuj altarta rurai’ ninmi nishpa, Davidman villagri” nircami.

19Chaimandami Davidca, Mandaj Diospaj shutipi, Gad runa ima nishcata pactachingapa vichai rirca.

20Ornán shuti runaca, trigota trillajushpami tigrarishpa ricushpaca, angelta ricurca. Chai angelta ricushpami, chaipi pacta cashca chuscundi churicunaca pacajugrirca.

21Trillana pambaman David chayamujujtami, Ornán shuti runaca ricurca. Chaimandami, trillana pambamanda llujshishpa, Davidpaj ñaupajpi cungurirca.

22Chaipimi Davidca, Ornán shuti runataca cashna nirca:

“Mandaj Diosman altarta rurangapami, cai trillana pambataca munani. Gentecuna ama ashtahuan ungüihuan huañuchunmi shuj altarta ruragrini. Cai alpamandaca, mashnata cuhuai nijpipash, cushallami” nirca.

23Shina nijpimi Ornán shuti runaca, Davidtaca cashna nijurca:

“Cai alpataca, can jatun mandaj imata rurangapa munashpapash japipailla. Diosman animalta cushpa tucuillata rupachijuchumbash huagracunata cushallami. Yamdata rurachumbash, trillana caspicunata cushallami. Shinallata, Diosman carachunga, trigotapash cushpa, tucui ima charishcatapash cushallami” nijurcami.

24Shina nijpimi, jatun mandaj Davidca, Ornán shuti runataca cashna nirca:

“Chaitaca napacha rurashachu. Ashtahuangarin, mashnata can mañashcata cushpami, Mandaj Diosman carangapaca, cambaj imata charishcatapash na yanga japisha. Shinallata, Mandaj Diosman cushpa tucuillata rupachina animalcunatapash, na yangaca japishachu” nircami.

25Chashna nishpami Davidca, chai alpamandaca, sucta kilo chaupi yalita pezaj curita, Ornán shuti runaman curca.

26Davidca, chaipimi Mandaj Diosman shuj altarta rurarca. Chai altarpimi, Diosman animalta cushpa tucuillata rupachirca. Dioshuan ali cangapa carashca ofrendacunatapash rupachishpami, Mandaj Diosta mañajurca. Pai mañajujta uyashpami, tucuillata rupachina animalta churashca altarman, jahua pachamanda ninata cachamurca.

27Chaimandami Mandaj Diosca, angeltaca, espadata alichilla nijpi, alichirca.

Diospaj huasita shayachina pushtumandami villajun

28Jebuseopura Ornán shuti runapaj trillana pambapi mañajpi, Mandaj Dios uyashcata ricushpami Davidca, Diosman animalcunata cushpa chaipi huañuchirca.

29Jichushca pambapi Moisés rurachishca, Mandaj Diospaj jatun carpapash, Diosman animalta cushpa tucuillata rupachina altarpash, Gabaón shuti lomapimi carca.

30Ashtahuangarin Davidca, Taita Diosta tapungapaca, na chaiman ri usharcachu. Mandaj Diospaj ángel charijushca espadata ricushca cashpami, ninanda manllashpa na ri usharca.