2 SAMUEL 10 - Quichua Imbabura 2016

Amonitacunapash, Siriocunapash mishai tucushcamanda(1 Crón. 19:1-19)

1Chai jipaca, Amón shuti llactata jatun mandaj huañujpimi, paipaj churi Hanún shuti runa mandajurca.

2Chaita yachashpami Davidca: “Ñucami, Nahas shuti runapaj churi Hanún runamanga, paipaj taita ñucahuan ali cashcamanda, paimambash alita ruragrini” nirca. Shina nishpami, Hanún shuti runapaj taita huañushcamanda, cushichinajuchun, Davidca cacharca. Ashtahuangarin Davidpajta rurajcuna, Amón llactaman chayajpica,

3Amón llactata cati mandajcunaca, paicunata mandaj Hanún runamanmi, cashna ninajurca: “¿Davidca, cambaj taita huañushcamanda imatallapash nishpa cushichinajuchunmi cachamushca yanguichu? ¿Nachu cai pueblota tucuchingapa, ali ricuchun Davidca, paipajta rurajcunataca cachamushcanga?” ninajurcami.

4Shina nijpimi Hanún runaca, David cachashca runacunataca, chaupi barbasta rutushpa, paicunapaj churajunatapash, cinturasmanda uraiman liquishpaca, “cunanga richilla” nishpa cacharca.

5Chashna rurashcata Davidman villajpimi, paicunata tuparichun cacharca. Paicunaca, ninanda pinganayachijpimi jatun mandajca, cashna nichun cacharca: “Barbas viñangacaman, Jericó pueblopi shuyaichilla. Chai jipaca tigramunguichillami” nichunmi cacharca.

6Amón llacta gentecunaca, Davidta fiñachishcata yachashpami, Siria llactapi tiyajuj Bet-rehob shuti, Soba shuti pueblocunamandaca, ishcai chunga huaranga runacunata, Maaca llactata jatun mandajpajmandaca, huaranga runacunata, Is-tob shuti llactamandaca, chunga ishcai huaranga runacunata, culquita cushpa pushamuchun cacharca.

7Davidca, chaita uyashpami Joab runataca, macanajunata ali yachaj tucuilla runacunandi cacharca.

8Amón llactamanda runacuna llujshishpaca, puebloman yaicuna pungupimi macanajungapa alichirinajurca. Ashtahuangarin, Soba shuti llactapi, Rehob shuti pueblopi causaj siriocunaca, Is-tob shuti llactamanda, Maaca shuti llactamanda runacunandimi, shuj pambapi shuyanajurca.

9Ñaupatapash, huashatapash macanajungapa shamunajujta yachashpami, Joab runaca tucui Israelpuramanda ashtahuan ali macanajuj runacunata agllashpa, siriocunahuan macanajungapa alichirirca.

10Agllajpi puchushca runacunataca, paipaj huauqui Abisai runa pushashpa, amonitacunahuan tuparishpa macanajugrichunmi cacharca.

11Paitaca cashnami nirca: “Siriocuna ñucata mishai callarijpica, yanapahuangui. Shinallata, amonitacuna canda mishai callarijpica, ñucami yanapasha.

12Shinlli shayaringui. Ñucanchi gentecunamanda, ñucanchi Taita Diospaj pueblocunamandaca, shinllitapachami shayarina canchi. Mandaj Diosca, ima ali cana cajpipash, chaita rurachunlla” nircami.

13Shina nishpami Joab runaca, paipaj macanajuj runacunata pushashpa, Siria llacta runacunahuan macanajungapa chayagrirca. Ashtahuangarin siriocunaca, paicunapaj ñaupajmanda manllashpami calpanajurca.

14Shinallata siriocuna calpanajujta, Amón llacta runacuna ricushpami, paicunapash Abisai shuti runapaj ñaupajmandaca manllashpa calpashpa, pueblopi pacajugrirca. Joab runaca, amonitacunahuan macanajushpa tigrashpami, Jerusalenman shamurca.

15Ashtahuangarin siriocunaca, Israelcuna mishajpimi, cutin tandanajurca.

16Hadad-ezer shuti runaca, Éufrates yacu chimbamanda Siria llactamandallata caishuj runacunata llujchimuchunmi cacharca. Paicunaca, Hadad-ezer runapaj macanajuj runacunata mandaj Sobac shuti runatami, paicunata mandaj cachun churashpa, Helam shuti puebloman shamunajurca.

17Chaita Davidman villajpica, tucuilla Israelcunata tandachishpami, Jordán yacuta chimbashpa, Helam shuti puebloman shamurca. Siria llacta runacunapash, Davidhuan macanajungapa alichirishpami, macanajui callarirca.

18Ashtahuangarin siriocunaca, Israelcunapaj ñaupajmandaca manllashpami calpanajurca. Davidca, carretapi purij canchis patsaj runacunata, caballopi rij chuscu chunga huaranga runacunatami huañuchirca. Macanajuj runacunata mandaj Sobac shuti runatapash chaipillatami huañurca.

19Hadad-ezer shuti runata yanapaj tucui jatun mandajcunaca, Israelcunahuan imashna mishai tucushcata ricushpami, Israelcunahuan ali tucushpa, paicunapajta rurajcuna tucurca. Siria llacta runacunaca, chai punllamandapachami Amón llacta gentecunata yanapangapaca manllarca.