2 CORINTIOS 6 - Quichua Imbabura 2016

1Ñucanchipash, Diospajta rurajcuna cashpami cangunataca: “Taita Diospaj ninan juyaitaca, ama yanga chasquishca canguichi” nishpami, ninanda mañanajunchi.

2Dios quilcachishcapica cashnami nijun:

“Chasquina punlla chayajpica, uyajurcanimi.

Quishpichina punlla chayajpica, quishpichircanimi” nijunmi.

Ricuichi, cunanmi chasquina punlla chayamushca. Ricuichi, cunanllatami quishpirina punllapash chayamushca.

3Diospajta ñucanchi ruranajushcata ama na alicachishpa rimanajuchunmi, pitapash na pandachingapa munanchi.

4Ashtahuangarin, Taita Diospajta rurajcuna cashcatami ricuchinajunchi. Shina cashpami, na ñapash fiñarishpa, ninanda llaquichi tucushpapash, imagupash illashpapash, ninan llaquita apanajunchi.

5Shinallata, asti tucushpa, prezu churai tucushpa, gentecunapash na alicachishpa caparinajujpi, ninanda imatapash rurachijpi, na puñushpa, na micushpami tiyanajunchi.

6Imatapash ali yuyaihuan rurashpa, aliguta yachajushpa, imamandapash na fiñarishpa, pitapash llaquishpa, Jucha Illaj Espíritu ali yuyaita cujpimi, tucui shunguhuan juyashpa causanajunchi.

7Na llullashpa villaj shimitaca, Taita Diospaj ushaihuanmi villanajunchi. Imatapash alitalla ruranataca, ali maquimambash, lluqui maquimambashmi charinajunchi.

8Huaquimbica alicachi tucushca, na alicachi tucushca, huaquimbica alipi ricurishca, na alipi ricurishcami purinchi. Huaquimbica, umachijcunashnami ricurinchi yarin. Ashtahuangarin na llullashpa villajcunami canchi.

9Na rijsishcashnalla cashpapash, alipacha rijsishcami canchi. Huañunalla cashpapash, ashtahuangarin causanchirami. Macai tucunajushpapash, na huañuchi tucushcami causanajunchi.

10Llaquipilla causanajunshnalla cashpapash, cushijushcapachami causanchi. Imagutapash na charijcunashnalla cashpapash, taucacunatami Diosmanda charichun yachachinajunchi. Imaguta na charishpapash, tucuitami charinchi.

11Corinto pueblopi causajcunalla, cangunamanmi ñucanchi shungupi imata yarishcatapash, tucuita ñucanchi shimihuambacha villanajunchi.

12Ñucanchica tucui shunguhuan cangunata juyajpipash, cangunami na chashnallata juyaita charinguichi.

13Cangunataca tucui shunguhuanmi (huahuata taita yachachijshna) yachachijuni. Shinallatami, cangunapash shunguta pacashpa juyaita ricuchina canguichi.

Causajujlla Taita Diospaj huasimi canchi

14Na crijcunahuanga, na huatarishcashna tandanajunachu canguichi. ¿Alitalla ruranahuan, na alita ruranahuanga tandanajungachu? Shinallata ¿michapash, yana tutahuanga tandanajungachu?

15Shinallata ¿Cristopash, Belial shuti diablohuanga cumba tucungallachu? Na cashpaca, ¿crijpash, na crijhuanga paipurallatachu canga?

16Shinallata ¿Taita Diospaj huasipash, rurashcalla dioscunahuanga, shujllashnalla cai ushangachu? Cangunami, causajujlla Taita Diospaj huasi canguichi. Taita Diosllatami cashna nishca:

“Paicunahuanga causajushami, purijushami.

Ñucami, paicunapaca Taita Dios casha,

paicunapash, Ñuca huahuacunami canga” nishcami.

17Shinamandami Jatun Diosca, cashna nishca:

“Paicunapaj chaupimanda llujshishpa anchurinami canguichi.

Ima mapatapash na tacarinachu canguichi.

Shina causajpimi, cangunataca chasquisha.

18Shinallata cangunapaj Taitami casha.

Cangunaca, Ñuca churicuna,

Ñuca ushicunami canguichi” nijunmi, tucui ushaita charij Jatun Diosca.