1“Alitalla ruraj runa huañujpica, pipash na yarinllu.
Ali shunguta charij runacuna huañujpica, llaqui causaimanda quishpirishpa rijujtaca na yuyaipi japinllu.
2Paicuna huañushpaca, ali samangapami rin.
Taita Diospaj ñaupajpi ali causajcuna huañujpica, Diosllatami samachinga.
3Ashtahuangarin Ñucapajman quimirimunami canguichi.
Cangunaca, brujucunata catijcunami canguichi.
Cazarashca jahua shujcunahuan causaj runapaj,
huainayashpa causaj huarmipaj miraicunami canguichi.
4¿Pitata cangunaca, asishpa ricurcanguichi?
¿Pitata, cangunaca shimita ninanda pascashpa, jalluta llujchishpa na alicachircanguichi?
Cangunaca, Ñucata na cazuj runacunapaj huahuacuna,
llulla runacunapaj miraicunami canguichi.
5Cangunaca, fanga junda quiru ucucunapimi,
rurashcalla dioscunahuan na alita ruranatalla ninanda munashpa puringuichi.
Cangunapaj huahuacunatapash, pugru pambacunapi, jaca rumicunapimi chai dioscunaman cushpa huañuchinguichi.
6Canga, pambacunapi tiyaj llambu rumicunatallami, cambaj cachun japingui.
Chai rumicunamanmi, vinota talishpa ashtahuan imatapash cararcangui.
Chashna alicunata rurashcamandaca, ¿nachu llaquichina cani?
7Jatun urcu jahuapimi, na alita rurashpa tiyarcangui.
Chaiman vichai rishpami, chai dioscunaman animalcunata carashpa huañuchircangui.
8Cambaj huasi pungu huashapimi, chai rurashcalla dioscunataca yaringapa churarcangui.
Canga, Ñucapajman shamunapa randica, rurashcalla dioscunahuanmi na alita rurashpa causarcangui.
Paicunahuanmi imata pactachingapapash, ari nijurcangui.
Chai rurashcalla dioscunapajta rurangapami, ashtahuan alicachijurcangui.
9Moloc shuti, rurashcalla diospajmanga,
jambicunata, mishquilla ashnajun yacucunata apashpami rijurcangui.
Cambaj randi parlajcunatapash, caru llactacunamanmi cacharcangui.
Chashna rurashpami, Seol ucuman richun tucuillata pandachircangui.
10Chashna causashpa, shaijushca cashpapash,
chashnallata catijurcanguillami.
Ashtahuangarin, ashtahuan ushaita japishpami, chashna causanataca na saquishpa catijurcangui.
11¿Pi manllachijpi manllarishpata, Ñucata crishpa causajunataca saquircangui?
¿Pi manllachijpita, Ñucata na crishpa yaritallapash na yaringui?
Pundamandapacha, Ñuca na imatapash nijpimi, chashna na manllashpa causangui.
12Can alitalla rurashca cajtapash, imatalla rurashcatapash, Ñucami tucuicunaman villagrini.
Chai rurashcacunaca, cambajca imapapash na alichu canga.
13Cacharichihuayari nishpa, rurashcalla dioscunata caparijujpipash, na cacharichi ushangachu.
Paicunataca, asha huaira shamushpalla, tucuillatami apanga.
Ashtahuangarin Ñucata crishpa causajcunami, llactata japishpa Ñucapajlla lomapi causanajunga” ninmi.
14Chaipica, cashnami ninga:
“Ñanda aliguta pascashpa, fichaichilla.
Ñuca agllashcacuna, chai ñanbi ama nitijashpa yalichun, pascaichi” ningami.
15Paica, causaita causaicaman jahua pachapi causajmi, tucuita yali Jatun Diosmi.
Paica, jucha illaj Diosmi. Paimi, cashna nin:
“Ñucaca, ima mapapash illaj, jahua pachapimi causajuni.
Llaquilla causajcunata, na jariyashpa causajcunata yanapaj Diosmi cani.
Llaquicunahuan causajcunata, llaquilla shunguta charijcunata cushichij Diosmi cani.
16Ñucaca, fiñarishca cashpapash, na causaita causaicaman llaquichishachu.
Ñuca churashca gentecunataca, llaquichijushpapash cutinmi juyasha.
17Israelcunataca, yapata na alitalla rurashcamandami, ninanda fiñarishpa llaquichircani.
Ninanda fiñarishca cashpami, paicunataca na tigrashpallapash ricurcani.
Paicunaca na cazushpami, paicunapaj shungu munashcata rurashpa catinajurca.
18Chashna causanajujtami ricurcani.
Shina cajpipash, Ñucallatami paicunataca alichishpa, michisha.
Paicunatapash, paicunahuan llaquilla causajcunatapash cushichishami.
19Paicunaca: Carupi causajcunapash, quimirialla causajcunapash, ‘ali causaimi tiyan, ali causaimi tiyan’ nishpami caparinajunga” ninmi.
Mandaj Diosca: “Ñucami paicunapaj llaquitaca alichisha” ninmi.
20Ashtahuangarin Diosta na manllajcunaca,
mama cucha jatarishpa, caiman chaiman rijuj yacushnami canga.
Chai yacucuna mapata, turuta manñaman shitajujshnami canga.
21Ñuca Taita Diosca: “Ñucata na manllajcunapajca, ali causaica na tiyanllu” nircami.
Who We AreWhat We EelieveWhat We Do
2025 by iamachristian.org,Inc All rights reserved.
