ISAÍAS 23 - Quichua Imbabura 2016

Tiro shuti pueblota llaquichinata villashcamanda

1Tiro shuti pueblota llaquichinatami villashca:

Tiro shuti pueblota, tucuilla huasicunandi tucuchishcamandaca,

Tarsis shuti pueblomanda barcocunapash huacaichiyari.

Chashna tucunataca, Quitim shuti llactamandami villanajurca.

2Mama cucha manñapi tiyajuj, Sidón pueblopi jatushpa randishpa causajcuna, upalla caichiyari.

Cangunamanga, mama cuchata yalimushpami, imatapash jatunajun carca.

3Nilo shuti jatun huaicumanda, yacuhuan fucuchishca granocunatami apamunajun carca.

Shuj llactacunamanda, randishpa jatuj gentecunapash, chaimanmi shamunajuj carca.

4Ninan ushaihuan shayajuj Sidón pueblolla, pingai tucuyari.

Mama cuchaca: “Ñucaca, unguna nanaitaca napacha rijsinichu, shuj huahuatallapash na ungushcanichu.

Shuj churitallapash na viñachishcanichu,

Shuj ushitallapash na charishcanichu” nircami.

5Tiro shuti pueblota llaquichishcata,

Egiptopi causajcuna yachashpaca, ninandami llaquirinajunga.

6Tarsis shuti pueblopipash villagrichi.

Mama cucha manñapi causajcunapash, tucuicuna huacaichiyari.

7¿Nachu cai puebloca, punda huatacunamandapacha cangunapaj ninanda cushijuna carca?

Cunanga, paicunapaj chaquihuan rishpami, carucunapi causanajunga.

8Mandana ushaita charij runacunapaj, cai juyailla Tiro pueblotaca,

¿pita cashna llaquichinajuchun mandarca?

Cai pueblopi jatushpa, randishpa purijcunaca mandajcunami carca.

Llactacunapi jatungapa, randingapa rijcunaca, tucui llactapi alicachi tucushcacunami carca.

9Paicunata tucuchinajuchunga, tucuita Mandaj Diosmi mandarca.

Ninanda alicachi tucushpa jariyajcunata yangapi churangapa,

cai llactapi jatun tucushcacunata pingaichingapami, chashna mandarca.

10Tarsis shuti pueblopi causajcunalla, cunanga alpapi tarpushpami causana canguichi.

Cangunaca, na ashtahuan ushaita chari ushanachu canguichi.

11Mandaj Diosca, Paipaj ninan ushaihuanmi, mama cucha yacuhuan llactacunataca llaquichirca.

Canaán llactapi tiyaj, jatun pircahuan muyundi jarcashca pueblocunata tucuchinajuchunga, Paimi mandarca.

12Paica cashnami nirca:

“Sidón shuti pueblopi llaquichi tucushca causajcunalla, cangunaca chaira cuitsashna cashpapash, na ashtahuan cushijunachu canguichi.

Quitim shuti puebloman chimbangapa jatarichiyari.

Chaipipash aliguta samashpa causaitaca, napacha ushanachu canguichi” nircami.

13Caldeocunapaj llactata ricuichiyari, chai llactaca na tiyarcachu.

Chai llactataca, jichushca pambacunapi causajcunamanmi, Asiria llacta runacuna callarichirca.

Paicunaca, shinlli torrecunata, mandana huasicunatami shayachinajurca.

Ashtahuangarin Diosmi, tucuillata tucuchirca.

14Tarsis shuti pueblomanda jatun barcocunalla, caparishpa huacaichiyari.

Cangunapaj shinlli torrecunaca tucurishcamari.

15Chai punllapica,Tiro shuti puebloca, jatun mandaj causana huatacunatashnami, canchis chunga huatata cungai tucushca canga. Chai canchis chunga huata jipami, Tiro shuti pueblopi causajcunaca, culquimanda huainayaj huarmitashna, cashna nishpa candanajunga:

16Culquimanda huainayaj huarmilla, candaca tucuicunami cungashca.

Cunanga, canda yarichunga, cutin cutin arpata juyailla taquishpa, tucui pueblota puriyari.

17Canchis chunga huata jipaca, Mandaj Diosmi, Tiro shuti pueblotaca ricuj shamunga. Shinamandami, cutin randishpa, jatushpa causanajunga. Shina causashpami, cai pachapi tiyaj tucui llactacunahuan cutinllata huainayanshna causajunga.

18Shina cashpapash, paicuna jatushpa, randishpa charijyashcacunaca, Mandaj Diospajlla shicanyachishcami canga. Chai charishcacunataca na alichinajungachu, na mirachinajungachu. Ashtahuangarin chaicunaca, Mandaj Diospaj ñaupajpi alita rurashpa causajcunapajmi canga. Chai alita rurajcuna imata cashpapash na munajta micuchun, juyailla churajunacunata churajuchunmi canga.