1Yachachij cai shimicunataca, Davidpaj churi, Israelcunata jatun mandaj Salomón rurashcami.
2Cai shimicunaca, aliguta yachajushpa tucuipi aligutapacha ricushpa causangapa yachajunami.
Aliguta yarishpa rimanata yachajungapami.
3Aliguta yarishpa causachun yachachishcata chasquingapami.
Alitalla rurashpa, aliguta ricushpa, tucuicunapaj ali cachun ruranata yachachingapami.
4Nara ali yachajushca gentecunaman ali yachaita cungapami.
Shinallata, chairalla viñaicunamambash, ali yuyaita, aliguta yarishpa causanata yachachingapami.
5Alipacha yachajushca runa uyashpaca, ashtahuanmi yachajunga.
Shinallata, ali yachajushca runapash, ali yuyaita cushcataca chasquingami.
6Yachachij shimicunata uyashpa ashtahuan ali yachajungapa,
alipacha yachajushcacuna, na yachai ushanalla shimicunata yachajungapami.
7Alipacha yachajushca cangapaca, Mandaj Diosta manllashpami causana.
Juizu illajcunaca, aliguta yachajushpa, aligutapacha ricushpa causanataca yangapimi churan.
Ali yachajushca cachun, yachachishca shimicunami8Ñuca huahualla, cambaj taita yachachishcataca, cazunami cangui.
Cambaj mama yachachishcatapash, ama yangapi churanguichu.
9Cai yachachishcacunaca, juyailla coronata cambaj umapi churashcashnami canga.
Juyaillaguta, cungapi huatachishcashnami canga.
10Ñuca huahualla,
juchata rurajcuna umachingapa munajpica, ama chasquinguichu.
11Candaca cashnami ninajunga:
“Pacalla japishpa huañuchingapa ñucanchihuan jacu.
Ima na alitapash na ruraj runata,
pacalla japishpa llaquichingapa ñucanchihuan jacu.
12Seolman cachanshnami chingachishun.
Manllanayai ucucunaman tucui urmanshnami chinganga.
13Tucui ima tiyashcacunata japishpami charijyashun.
Ima tiyashcacunata quichushpami, ñucanchi huasicunapi jundachishun.
14Cambash ñucanchihuan tandanajuilla.
Imata cashpapash tucuillatami chaupirishun” ninajungami.
15Ñuca huahualla,
paicuna maita rinajujpipash na catinachu cangui.
Paicuna maita purinajujtapash, na catinachu cangui.
16Paicunaca, na alita rurangapami, calpashpa rinajun.
Huañuchingapami ucha rinajun.
17Alasyu animalcuna ricujujpica, yangallatami linllita churanga.
18Paicunaca, paicunallata llaquita apangapami, chashna ruranajun.
Paicunallata llaquita apangapami lazutaca churanajun.
19Ñapash charijyangapa munajcunami, chashna tucunajun.
Chai charishcallatami, causaita quichunga.
20Ali yachanaca, ñangunapi caparishpami cayajun.
Plazacunapimi ninanda caparijun.
21Jatun tandanajuicunapimi caparijun.
Puebloman yaicuna pungucunapimi, cashna nijun:
22“Nara yachajushca runacuna,
¿ima punllacamanda chashna causagringuichi?
Asishpa ricujcuna,
¿ima punllacamanda chashna causagringuichi?
Juizu illajcuna,
¿ima punllacamanda ali yachajunata na munashpa causagringuichi?
23Ñuca yachachishcataca uyanami canguichi.
Cangunamanga, ñuca espiritutami cachamusha.
Ñuca shimicunata yachajuchunmi villajusha.
24Cangunata cayajujpipash, na uyangapa munashpami causarcanguichi.
Maquita ricuchijujpipash, na chasquishpami causarcanguichi.
25Ali yuyaita ñuca cujpipash, yangapimi churarcanguichi.
Jarcashpa ñuca rimashcataca, na uyangapa munashpami causarcanguichi.
26Cangunata jatun llaqui japijpica, asishpami ricusha.
Canguna ninanda manllanajushca llaquicuna japijpipash, asishpami ricusha.
27Canguna ninanda manllashca llaquicunallatami, tucuchinga.
Jatun llaquicunaca, jatun acapanashnami chayamunga.
Ninanda llaquichij llaquicunami cangunataca japinga.
28Chai llaquicunahuan cashpa, ñucata cayanajujpica na uyashachu.
Ñucataca, tutamandata mascashpapash, na tarihuangachu.
29Ali yachanata na ricunayachishpa,
Mandaj Diosta na manllashcamandami chashna tucunga.
30Ali yuyaita cujpipash, na uyangapa munarcachu.
Jarcashpa rimajpipash, yangapimi churanajurca.
31Paicuna na alita rurashpa causanajushcamandami, llaquita apanajunga.
Paicunaca na ali yuyaicuna jundami causanajunga.
32Na ali yuyaicunallatami, na ali yachajushcacunataca huañuchinga.
Juizu illajcuna cushijushpa causashcapash, chingaimanmi apanga.
33Ashtahuangarin, Ñucata cazushpa causashpaca, imatallapash na manllashpami causanga.
Ima llaqui japinatapash na manllashpa, aligutami causanga” nishpami villajun.
Who We AreWhat We EelieveWhat We Do
2025 by iamachristian.org,Inc All rights reserved.
