Psalms 143 - Quichua Imbabura 2016

Llaquimanda cacharichishpa, ali pushachun mañashcamandaDavid rurashca Salmomi.

1Mandaj Dioslla,

ñuca ninanda mañajujtaca uyahuayari.

Canga, na llullaj, alitalla ruraj cashcamanda, uyahuayari.

2Cambajta ruraj ñucataca, ama imata rurashcata ricushpa llaquichihuaichu.

Cambaj ñaupajpica, alitallami rurashcani nitaca, pipash napacha ushangachu.

3Ñucata fiñaj runaca, catiriyashpami llaquichihuashca.

Ñucataca, alpapimi shitahuashca.

Huañushcatashnami, yana tutapi causachun churahuashca.

4Ñucaca, ninandapachami llaquirijuni.

Ñuca shungupica, ninandapachami llaquirijuni.

5Punda imashna cashcatami yarijurcani.

Can imatalla rurashcacunatami, aligutapacha yarijurcani.

Cambaj maquihuan imatalla rurashcatami, ninanda yarijurcani.

6Cambaj ñaupajmanmi, ñuca maquitaca vichai churarcani.

Ñucaca, chaquishca alpa tamiata shuyajshnami Candaca shuyajurca. Selah

7Mandaj Dioslla,

huañugrinimari, ñuca mañajujtaca ucha tigrachihuailla.

Cambaj ñavitaca, ama shujman churapaichu.

Can na uyajpica, huañushcashnami tucusha.

8Cambaj ninan juyaitaca, tutamandata ricuchihuayari.

Ñucaca, Canda yariashpami causajuni.

Ñuca imashna causanata yachachihuayari.

Ñucaca, Cambaj maquipimi ñuca causaitaca churarcani.

9Mandaj Dioslla,

ñucata fiñajcunamanda cacharichihuayari.

Ñucataca, Canllami samachihuangui.

10Cambaj munaita ruranata yachachihuayari.

Canmi, ñuca Taita Dios capangui.

Cambaj ali Espirituhuan, alitalla rurashpa causanata yachachihuayari.

11Mandaj Dioslla,

Cambaj shutita juyaimandami causaita carahuangui.

Canga, alitalla ruraj cashpami,

ñucataca, ninan llaquimanda llujchihuangui.

12Canga ñucata juyaj cashpami, ñucata fiñajcunataca tucuchingui.

Ñucata na ricunayachij runacunataca, tucuillami tucuchingui.

Ñucaca, Cambajta rurajmari capani.