PROVERBIOS 25 - Quichua Imbabura 2016

Aliguta causachun chimbapurashpa yachachishca shimicunami

1Caicunapash, Salomón yachachishca shimicunami. Caicunataca, Judá llactata jatun mandaj Ezequiaspaj quilcajcunami quilcarca.

2Taita Diosca, ninan ushaita charishpami, imatapash pacai ushan.

Ashtahuangarin, jatun mandajcunaca chaicunata yachajushpami, ashtahuan alicachi tucunga.

3Jahua pacha maicaman cajtapash,

cai pacha maicaman cajtapash, na yachai ushanallami.

Shinallata, jatun mandajcuna imata yarinajujtapash, na yachai ushanallami.

4Culquita yacuyachishpa, mapata anchuchishpami,

imatapash juyaillacunata rurai ushanga.

5Diosta na cazuj runataca,

jatun mandajpaj ñaupajmanda anchuchinami cangui.

Shina anchuchijpimi, aligutapacha ricushpa mandai ushanga.

6Jatun mandajpaj ñaupajpica, ama canllata jatun tucunguichu.

Alicachi tucushca gentecuna tiyarina pushtupipash, ama tiyaringuichu.

7Jatun mandaj runa: “Caiman shamui” nijpimi rina cangui.

Cati mandajcunapaj ñaupajpi pingai tucunaca, napacha alichu.

Imata cashpapash, alimi ricuna cangui.

8Na ñapash fiñanajuiman yaicunachu cangui.

Jipamanra imatapash na ni ushashpa,

cambaj cumba runapaj ñaupajpi, pingai tucunguiman.

9Cambaj cumbahuan fiñanajushca cashpaca,

chaitaca paihuanllami alichina cangui.

Imatapash canlla yachashcataca, ama pimambash villanguichu.

10Can parlajujta maijambash uyashpara, candallata na alicachinman.

Can chashna parlashcacunara, na alichi ushanalla tucunman.

11Aliguta yarishpa rimashca shimicunaca,

curi manzanapi, culquita churashpa, juyaillaguta rurashcashnami.

12Aliguta uyashpa cazuj, alipacha yachajushca runata jarcashpa rimaj runaca,

curi zarcilloshna, ashtahuan ali curihuan juyaillaguta rurashcashnami.

13Villachun cachajpi tucuita pactachij runaca,

granota tandachina rupai punllacunapi chirilla yacushnami.

Chai runaca, paita mandajtaca ninandami cushichin.

14Imagutapash carashapachami nishpa jariyashpapash, na pactachij runaca,

tamia fuyu shamushpalla, na tamianshnallami.

15Mandajcunataca, aliguman rimashpallami imatapash ari nichi usharin.

Aliguta rimashca shimicunahuanmi, ari nichi usharin.

16¿Balun mishquitaca tarircanguichu?

Usharishcagutalla micungui.

Yapata micushpara shungu tigrachinguiman.

17Cambaj quimiriajlla huasicunamanga, ama yapa chayanguichu.

pacta, canda na ricunayachishpa fiñanman.

18Pitapash yanga juchachishpa parlaj runaca,

martilloshna, cuchilloshna, filo filo flechashnami.

19Ninan llaqui punllacunapi, na cazuj runa yanapachun shuyanaca,

quiru faquirishcashna, chaqui quivishcashnami ashtahuan llaquichin.

20Llaquilla tiyajujpi, ashtahuan llaquilla candanacunata candaj runaca,

chiri punllacunapi churajunata quichunshnami.

Shinallata, chugrishcapi vinagreta talijshnami.

21Canda na ricunayachij runa yarjachijujpica, micunata caranguilla.

Yacunayaihuan cajpipash, yacuta caranguilla.

22Shina rurashpaca, ninandapachami pingaichingui.

Mandaj Diosmi, candaca ninanda alicachinga.

23Janajta huaira shamushpaca, tamiata apamunllami.

Fiña ñavihuan rimaj runaca, ashtahuanmi fiñanajuita jatarichin.

24Imatapash nirijujlla huarmihuan, jatun huasipi causanapaj randica,

uchilla ucugupi causanami ashtahuan ali canga.

25Caru llactamanda ali villanata villaj shamushpaca,

ninanda yacunayachijujpi chirilla yacuta caranshnami.

26Alitalla ruraj runa, Diosta na manllaj runapaj ñaupajpi pandarishpaca,

pugyumanda llujshijuj yacuta turuyachishpa, mapayachishcashnami.

27Balun mishquita yapata micunaca napacha alichu.

Ninanda alicachi tucunata mascanapash, napacha alichu.

28Imata cashpapash na jarcari ushaj runaca,

muyundi jatun pirca illaj puebloshnami llaquita apanga.