Psalms 33 - Quichua Imbabura 2016

Tucuita ruraj Diosta alicachishcamanda

1Alitalla rurashpa causajcunaca,

Mandaj Diosta candaichiyari.

Alitalla rurashpa causajcunapajca,

Diosta alicachinaca juyaillagumari.

2Mandaj Diostaca, arpahuan candaichiyari.

Paitaca, salteriohuan, decacordiohuambash candaichiyari.

3Mushuj candanata candaichiyari.

Ninanda cushijushpa, aligutapacha candaichiyari.

4Mandaj Diospaj shimica, napacha llullachu.

Imatalla Pai rurashcacunapash, tucuita pactachij cajtami ricuchijun.

5Paica, imata rurana cajpipash, alitalla rurajtami juyajun.

Cai pachaca, Mandaj Diospaj juyaihuan jundami.

6Mandaj Dios rimashpallami, jahua pachataca rurarca.

Chaipi tucui ima tiyajcunatapash, Paipaj shimihuan fucushpallami rurarca.

7Paimi, mama cucha yacutapash, tandachishpa churan.

Manllanayai ucu ucu yacucunatapash, Paillatami tandachishpa churan.

8Mandaj Diostaca, tucui cai pachami manllana.

Tucui cai pachapi causajcunami, Paitaca alicachina canguichi.

9Pai rimajpica, ima tiyajcunapash rurarircallami.

Pai mandajpimi, tucui imapash tiyai callarirca.

10Mandaj Diosca, llactacunapi causajcuna yarinajushcataca yangapimi churan.

Gentecuna imatalla rurangapa parlarinajundapash jarcanllami.

11Mandaj Dios imatalla rurasha nishcapash, causaita causaicaman pactajungallami.

Pai imatalla yarishcataca, causaita causaicaman pactajungallami.

12Mandaj Dios, paicunapaj Taita Dios cajpi causanajuj llactaca, ninandami cushijun.

Paicunataca, Paipajlla cachunmi agllashca.

13Mandaj Diosca, jahua pachamandami ricujurca.

Huañuna aichayuj tucui gentecunatami ricujurca.

14Pai causajuj pushtumandami, ricujurca.

Cai pachapi tucui causajcunatami ricujurca.

15Paimi, tucuicunapaj shunguta rurarca.

Paicuna imatalla ruranajujtaca, tucuitami ricuriajun.

16Jatun mandajca,

na ashtaca macanajuj runacunata charishcamandalla quishpiri ushanllu.

Ninan shinlli runapash,

pai shinlli cashcamandalla, na quishpiri ushanllu.

17Caballota charishcapash yangallatami.

Ninan shinlli caballo cashpapash, pitapash na quishpichi ushangachu.

18Mandaj Diosca, tucui Paita manllajcunatami ricuriajun.

Paitalla shuyajcunatami ricuriajun.

19Huañunamanda cacharichingapami, ricuriajun.

Yarjai punllacunapipash, causaita cungapami ricuriajun.

20Ñucanchica, Mandaj Diostami shuyanchi.

Paica ñucanchita yanapaj, ñucanchi jarcarina escudoshnami.

21Ñucanchi shunguca, Paita yarishpami ninanda cushijun.

Jucha illaj Paipaj shutigutami, yariashpa causanchi.

22Mandaj Dioslla,

imashna ñucanchi canda shuyashcashnallata llaquihuayari.