RUT 1 - Quichua Imbabura 2016

Rutmandapash, Noemimandapash

1Israel llactata juezcuna mandanajui huatacunapimi, ninan yarjai punllacuna chayarca. Chaimandami, Judá llactapi tiyaj Belén pueblomanda shuj runaca, paipaj huarmindi, paipaj ishcai churicunandi, Moab llactapi causangapa rirca.

2Chai runaca, Elimelec shutimi carca. Paipaj huarmica, Noemí shutimi carca. Paipaj churicunaca, Mahlón shuti, Quelión shutimi carca. Paicunaca, Judá llactapi tiyaj Belén pueblomanda, Efrata llactapurami carca. Moab llactaman chayashpami, chaipi causangapa saquirirca.

3Chaipica, Noemipaj cusa Elimelec runa huañujpimi, ishcai churicunahuanlla saquirirca.

4Chai churicunaca, Moab llactamanda huarmicunahuanmi cazararca. Chai huarmicunaca, shujca Orfa shuti, caishujca Rut shutimi carca. Chaipimi paicunaca, chunga huatatashna causanajurca.

5Mahlón shuti, Quelión shuti, ishcandi churicunapash huañujpimi, Noemí huarmiguca, paipaj ishcandi churicunapash, cusapash illaj saquirirca.

6Noemica, Moab pambacunapi cashpami: “Mandaj Diosca, Pai agllashca gentecunata ricushpa, granocunata cutin fucuchijun” nijta uyarca. Shina uyashpami, Moab pambacunamandaca, paipaj jachungunandi tigrangapa yarijurca.

7Paica, pai causajushca llactamanda llujshishpami, ishcandi jachungunandi, Judá llactaman tigrai callarirca.

8Ashtahuangarin Noemica, paipaj ishcandi jachungunataca cashnami nirca: “Cangunaca, cangunapaj mamapaj huasiman tigrapaichilla. Ñuca huañuj churicunahuan, ñucahuambash ali cashcamandaca, Mandaj Diosca chashnallata cangunatapash ninanda llaquipachun ninimi.

9Shinallata, canguna cutin cazarajpipash, cangunapaj cusapaj huasipica, Mandaj Diosca ali causaiguta carashpa charipachun” nishpa muchajpimi, jachungunaca ninanda huacanajurca.

10Paicunaca: “Ñucanchica, cambaj llactaman ringapapachami munapanchi” ninajurcami.

11Shina ninajujpimi Noemica, cashna nirca: “Ñuca huahuacunalla, tigrapaichilla. ¿Imapata ñucahuan ringapa munanguichiyari? Cangunahuan cazarachunga, na ashtahuan huahuacunata chari ushanachu cani.

12Ñuca huahuacunalla, tigrashpa ripaichilla. Ñucaca, cutin cazarangapapash ñami paya cani. Cunan tutallata cusata tarishpa, huahuacunata charijpipash,

13paicuna viñangacaman ¿shuyai ushanguichimanllu? ¿Paicunata juyaimandalla, na cazarashpa shuyanguichimanllu? Ñuca huahuacunalla, na chashnachu. Mandaj Diospaj maquihuan llaquichijpimi, cangunatapash yali jatun llaquita apajuni” nircami.

14Cutinllatami paicunaca, ninanda huacanajurca. Orfa shuti huarmica, paipaj cusapaj mamata muchashpaca, saquishpa rircallami. Ashtahuangarin, Rut huarmiguca, napacha saquingapa munashpami, Noemihuan saquirirca.

15Shinamandami Noemica, cashna nirca: “Ricui, canhuanllata jachunpurapash, ñami paipaj llactaman, paipaj dioscunapajman tigrajun. Cambash, paita catishpa ripailla” nircami.

16Shina nijpimi Rut huarmiguca, cashna nirca: “Canda saquishpa, canmanda anchurishpa richunga, amapacha mañahuaichu. Can maiman rijpipash, ñucapashmi risha. Can maipi causajpipash, chaipimi causasha. Cambaj llactapash, ñuca llactami canga. Cambaj Taita Diospash, ñuca Taita Diosmi canga.

17Maipi can huañujpipash, chaipillatami huañushpa pambai tucusha. Canda saquishpa rijpica, Mandaj Diosllata ninandapacha llaquichihuachun ninimi. Ñucanchitaca, huañuillami shicanyachinga” nijurcami.

18Paihuan rinayachijujtapacha ricushpami, Noemica na ashtahuan imatapash nirca.

19Paicunaca, Belén puebloman chayangacamanmi, ishcandi rinajurca. Belenman ña chayajpimi, tucuicuna paicunata ricushpa manllarishpa, chaipi causaj huarmicunaca: “¿Nachu caica Noemí?” nishpa tapurinajurca.

20Shina ninajujpimi Noemica, cashna nijurca: “Noemí nishpaca, na rimanachu cahuanguichi, Mara nishpa rimahuaichi. Tucui Ushaita Charij Diosmi ñucataca ninanda llaquichihuashca.

21Caimandaca, ashtacata apashpami rircani. Ashtahuangarin, Mandaj Diosca, chushaj maquitami tigrachimuhuashca. ¿Imashpata Noemí ninajuhuanguichi? Mandaj Diosca, ñucata llaquichisha nishcatami pactachishca. Tucui Ushaita Charij Diosmi llaquichihuashca” nijurcami.

22Chashnami Noemica, Moab pambacunamandaca, Moab llactapura paipaj jachun Rut huarmigundi tigramurca. Cebadata cozechana punllacuna callarijujpimi, Belenman chayamunajurca.